ମହାକାଳପଡ଼ା, ୨୨ା୮ (ଡି.ଏନ.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ମହାନଦୀ ବାହାକୁଦ ଘାଟରୁ ପାରାଦୀପ ମୂଷାଡିଆ ଫେରି ଘାଟରେ ଗତ ୧୬ ତାରିଖରୁ ରାମନଗର ପଞ୍ଚାୟତ ପକ୍ଷରୁ ମହାନଦୀରେ ବନ୍ୟା ଯୋଗୁ ଡଙ୍ଗା ଚଳାଚଳକୁ ବନ୍ଦ କରାଯାଇଥିଲା। ପୁଣି ନିର୍ଦ୍ଦେଶ ନ ଆସିବା ପର୍ଯ୍ୟନ୍ତ ଡଙ୍ଗା ନ ଚଳାଇବା ଲାଗି ଘାଟ ନିଲାମଧାରୀଙ୍କୁ କୁହାଯାଇଥିଲା। ହେଲେ ସେ ସରକାରୀ ନିର୍ଦ୍ଦେଶକୁ ନ ମାନି ଯାତ୍ରୀମାନଙ୍କୁ ନେଇ ଶନିବାର ଡଙ୍ଗା ଚଳାଇଥିଲେ। ଫେରି ଘାଟ ଡଙ୍ଗାଟି ଯାତ୍ରୀ ପରିବହନ କରୁଥିବା ବେଳେ ମହାନଦୀ ମଝିରେ ଇଞ୍ଜିନ ଅଚଳ ହୋଇଯାଇଥିଲା। ଅଚଳ ଡଙ୍ଗାକୁ କୂଳକୁ ଆଣିବାକୁ ଯାଇ ଅନ୍ୟ ଏକ ଡଙ୍ଗା ମଧ୍ୟ ମହାନଦୀର ପ୍ରଖର ସ୍ରାତରେ ଭାସିଯାଇଥିଲା। ଯାତ୍ରୀମାନଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଥିଲା। ପରେ ଫେରି ଘାଟକୁ ବ୍ଲକ ପ୍ରଶାସନ ପକ୍ଷରୁ ୭ ଦିନ ପାଇଁ ଡଙ୍ଗା ଚଳାଚଳ ବନ୍ଦ ରଖିବାକୁ ମହାକାଳପଡ଼ା ତହସିଲଦାର ସୌଭାଗ୍ୟ ରଞ୍ଜନ ପଣ୍ଡା ସୂଚନା ଦେଇଥିଲେ। ହେଲେ ଏହି ଘଟଣାକୁ ୧୨ ଘଣ୍ଟା ନ ପୂରୁଣୁ ପୁଣି ସ୍ଥାନୀୟ ଅଞ୍ଚଳରେ କେତେଗୋଟି ଘରୋଇ ଡଙ୍ଗା ରବିବାର ବାହାକୁଦ ଘାଟରୁ ପାରାଦୀପର ମୂଷାଡିଆ ଘାଟ କୂଳକୁ ଯାତ୍ରୀମାନଙ୍କଠାରୁ ଚଢ଼ା ଦରରେ ମହାନଦୀ ପାର କରୁଥିବା ଦେଖିବାକୁ ମିଳିଥିଲା, ଯାହା ଯାତ୍ରୀଙ୍କ ଜୀବନ ସହ ଖେଳାଯାଉଛି। ଫେରି ଘାଟ ଡଙ୍ଗା ଭାସିଯିବା ଘଟଣାକୁ ନେଇ ରାମନଗର ପଞ୍ଚାୟତ ପକ୍ଷରୁ ରବିବାର ସରପଞ୍ଚ ମିଲନ ଦେବନାଥ, କାର୍ଯ୍ୟନିର୍ବାହୀ ଅଧିକାରୀ ମୃତ୍ୟୁଞ୍ଜୟ ରାଉତ ଜମ୍ବୁ ସାମୁଦ୍ରିକ ଥାନାରେ ନିଲାମଧାରୀ ଆନନ୍ଦ ଚନ୍ଦ୍ର ସାହୁଙ୍କ ବିରୋଧରେ ଲିଖିତ ଅଭିଯୋଗ କରିଥିଲେ। ଏହାକୁ ଭିତ୍ତିକରି ପୋଲିସ ପକ୍ଷରୁ ଦଫା ୨୮୦, ୨୮୨ରେ ନଂ.୧୦୭/୨୨ରେ ମାମଲା ରୁଜୁ କରାଯାଇଛି। ଘଟଣାର ତଦନ୍ତ ଚାଲିଛି ବୋଲି ଆଇଆଇସି ପରେଶ କୁମାର ମହାନ୍ତି କହିଛନ୍ତି। ଏଥିସହ ରାଜ୍ୟ ସରକାରଙ୍କ ୨୦୦୪ ଡଙ୍ଗା ଚଳାଚଳ ରୁଲ୍କୁ ଫେରି ଘାଟରେ ଖୋଲାଖୋଲି ଉଲ୍ଲଂଘନ କରାଯାଇଥିଲା।
ଚଳିତ ବନ୍ୟାରେ ମହାନଦୀ ସମେତ ବିଭିନ୍ନ ନଦୀରେ ବନ୍ୟାଜଳ ବିପଦସଙ୍କେତ ଉପରେ ପ୍ରବାହିତ ହେଉଛି। ଫଳରେ ରାଜ୍ୟ ସ୍ବତନ୍ତ୍ର ରିଲିଫ୍ କମିଶନ ପକ୍ଷରୁ ଜିଲାପାଳମାନଙ୍କୁ ପ୍ରଖର ବନ୍ୟାଜଳ ପ୍ରବାହିତ ଅଞ୍ଚଳରେ ଫେରି ଘାଟ ଡଙ୍ଗା ଚଳାଚଳକୁ ବନ୍ଦ କରାଯାଇଥିଲା। ହେଲେ ଜିଲାର ମହାକାଳପଡ଼ା ବ୍ଲକ ଅଧୀନ ରାମନଗର ପଞ୍ଚାୟତ ମହାନଦୀ ବାହାକୁଦ ଘାଟରୁ ପାରାଦୀପ ମୂଷାଡିଆକୁ ଶନିବାର ସା ୬ରେ ଯାତ୍ରୀବାହୀ ଡଙ୍ଗା ଚଳା ଯାଇଥିଲା। ପାରାଦୀପର ମୂଷାଡିଆକୁ ଏକ ଯାତ୍ରୀ ବୋଝେଇ ଡଙ୍ଗା ବାହାକୁଦ ଘାଟ କୂଳରୁ ଆସୁଥିଲା। ଫେରି ଘାଟ ଡଙ୍ଗାଟିର ମହାନଦୀ ମଝିରେ ଇଞ୍ଜିନ ଅଚଳ ହେବାରୁ ଡଙ୍ଗାଟି ବନ୍ୟାଜଳର ପ୍ରଖର ସ୍ରୋତରେ ମୁହାଣ ଅଭିମୁଖେ ଭାସିଯାଇଥିଲା। ଯାତ୍ରୀବାହୀ ଡଙ୍ଗାଟି ବତୀଘର ପଞ୍ଚାୟତର ବଡ଼ ଟୁବି-ନିପାଣିଆ ମହାନଦୀ କୂଳରେ ପିଟି ହେଇ ସୌଭାଗ୍ୟବଶତଃ ଏକ ବୁଦାମୂଳେ ବିପଦପୂର୍ଣ୍ଣ ଭାବେ ଅଟକି ଯାଇଥିଲା। ଯାତ୍ରୀଙ୍କଠାରୁ ଖବର ପାଇ ଜିଲାପାଳଙ୍କ ନିର୍ଦ୍ଦେଶରେ ବିଡିଓ ଦେବାଶିଷ ରାଉତ ଓ ତହସିଲଦାର ପଣ୍ଡା ଓ ଜମ୍ବୁ ସାମୁଦ୍ରିକ ଥାନା ଅଧିକାରୀ ମହାନ୍ତି ପ୍ରମୁଖ ଘଟଣାସ୍ଥଳରେ ପହଞ୍ଚତ୍ଥିଲେ। ଥାନା କର୍ମଚାରୀ ଓ ଖରିନାସୀ ରାମଚଣ୍ଡୀ ବୋଟ୍ ମାଲିକ ସଂଘର କେତେଜଣ କର୍ମକର୍ତ୍ତା ଦକ୍ଷ ନାବିକମାନଙ୍କ ଦ୍ୱାରା ଏକ ହାଇସ୍ପିଡ୍ ବୋଟ୍ ନେଇ ଘଟଣାସ୍ଥଳରେ ପହଞ୍ଚତ୍ଥିଲେ। ପରେ ସ୍ଥାନୀୟ ଖରିନାସୀ ଗ୍ରାମର ଯୁବ ମତ୍ସ୍ୟଜୀବୀମାନଙ୍କ ସହଯୋଗରେ ଫସି ରହିଥିବା ଯାତ୍ରୀଙ୍କୁ ରାତି ୧୧ଟାରେ ସୁରକ୍ଷିତ ଭାବେ ଉଦ୍ଧାର କରାଯାଇଥିଲା। ଯାତ୍ରୀମାନେ ପାରାଦୀପ ଶିଳ୍ପ କାରଖାନାରେ ଦୈନିକ କାର୍ଯ୍ୟ କରନ୍ତି। ଉଦ୍ଧାର ହୋଇଥିବା ଯାତ୍ରୀମାନେ ଜମ୍ବୁ, ବତୀଘର, ଖରିନାସୀ, ରାମନଗର, ପେଟଛେଲା ଆଦି ପଞ୍ଚାୟତର ପ୍ରମୁଖ ଶ୍ରମିକ ବୋଲି ଜଣାପଡ଼ିଛି।
ଅପରପକ୍ଷରେ ଏହି ଫେରି ଘାଟରେ ୨୦୦୪ ବୋଟ୍ ରୁଲ୍କୁ ଖୋଲାଖୋଲି ଉଲ୍ଲଂଘନ କରାଯାଇଥିବା ଅଭିଯୋଗ ହେଉଛି। ରାଜ୍ୟ ସରକାରଙ୍କ ସଂଶୋଧିତ ବୋଟ୍ ରୁଲ ଆଇନ ଅନୁସାରେ, ଫେରି ଘାଟର ପଞ୍ଜୀକୃତ ପ୍ରମାଣପତ୍ର, ବୋଟ୍ ଚାଳକ ବା ନାଉରିଆ ପଞ୍ଜୀକୃତ ପ୍ରମାଣପତ୍ର, ବୋଟ୍ରେ ଲାଇଫ୍ ଜ୍ୟାକେଟ୍, ବୋଟ୍ର ଯାତ୍ରୀଧାରଣ କ୍ଷମତା ପ୍ରମାଣପତ୍ର, ଯାତ୍ରୀଙ୍କ ଜୀବନ ବୀମା, ପ୍ରାଥମିକ ଔଷଧ କିଟ୍ ଆଦି ମହଜୁଦ ରଖିବାକୁ ଆଇନରେ ଉଲ୍ଲେଖ ରହିଛି। ଏ ନେଇ ରବିବାର ପୂର୍ବାହ୍ନରେ ସାମାଜିକ କର୍ମୀ ଆଳୟ ସାମନ୍ତରାୟ ମହାନଦୀରେ ଯାତ୍ରୀବାହୀ ଡଙ୍ଗା ବନ୍ୟାଜଳରେ ଭାସିଯିବା ଘଟଣାକୁ ନେଇ ଜମ୍ବୁ ସାମୁଦ୍ରିକ ଥାନାରେ ଲିଖିତ ଅଭିଯୋଗ କରିଛନ୍ତି।
