ନୂଆଦିଲ୍ଲୀ, ୧୧।୮ : ପାଇଲଟ ହେବାକୁ ଚାହୁଁଥିବା କିନ୍ନରଙ୍କ ଫିଟନେସର ଏରୋମେଟିକାଲ ମୂଲ୍ୟାଙ୍କନ ବିଷୟରେ ନୂଆ ମାର୍ଗଦର୍ଶିକା ଜାରି ହୋଇଛି। ଫଳରେ ଏଣିକି କିନ୍ନରଙ୍କ ବ୍ୟବସାୟିକ ପାଇଲଟ ହେବାର ସ୍ବପ୍ନ ପୂରଣ ହୋଇପାରିବ। ଏଥିପାଇଁ ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (ଡିଜିସିଏ) ବୁଧବାର ଦିନ ଏକ ସର୍କୁଲାର ଜାରି କରିଛନ୍ତି। ଏଣ୍ଡୋକ୍ରାଇନୋଲୋଜିଷ୍ଟ କିମ୍ବା ଏହାର ସଂପୃକ୍ତ ପ୍ରାର୍ଥୀଙ୍କ ସମ୍ବନ୍ଧରେ ବିଶେଷଜ୍ଞଙ୍କ ଦ୍ୱାରା ଦାଖଲ ହୋଇଥିବା ଡାକ୍ତରୀ ରିପୋର୍ଟର କେସ-ଟୁ-ମେଡିକାଲ ମୂଲ୍ୟାଙ୍କନ ହେବା ଆବଶ୍ୟକ ବୋଲି ମାର୍ଗଦର୍ଶିକାରେ ଡିଜିସିଏ ପକ୍ଷରୁ ନିର୍ଦ୍ଦେଶ ଦିଆଯାଇଛି।
ମିଡିଆ ରିପୋର୍ଟ ଅନୁଯାୟୀ, ଏହି ମାର୍ଗଦର୍ଶିକାର ପ୍ରବର୍ତ୍ତନ ପରେ ପାଇଲଟ ହେବାକୁ ଚାହୁଁଥିବା କିନ୍ନରମାନଙ୍କ ପାଇଁ ଏହା ଏକ ଐତିହାସିକ ମୁହୂର୍ତ୍ତ। ଅଦ୍ୟାବଧି, ଯେତେବେଳେ ଭାରତରେ କିନ୍ନର ବାଣିଜି୍ୟକ ପାଇଲଟ ପାଇଁ ଫିଟନେସ ସମ୍ବନ୍ଧରେ କୌଣସି ଡାକ୍ତରୀ ମୂଲ୍ୟାଙ୍କନର ବ୍ୟବସ୍ଥା ନ ଥିଲା। ବିଦେଶରେ ପୂର୍ବରୁ ଏପରି ବ୍ୟବସ୍ଥା ପ୍ରଚଳନ କରାଯାଇଛି। ଆମେରିକା, ବ୍ରିଟେନ ପରି ଦେଶରେ ୭ ବର୍ଷ ପୂର୍ବେ ଏହି ପ୍ରକାର ସର୍କୁଲାର ଆସିଥିଲା ।
ଗତ ମାସରେ କିନ୍ନର ଆଡାମ ହ୍ୟାରିଙ୍କ ବ୍ୟବସାୟିକ ଲାଇସେନ୍ସକୁ ନେଇ ବିବାଦ ଉପୁଜିଥିଲା। ହ୍ୟାରିଙ୍କୁ ଲାଇସେନ୍ସପ୍ରାପ୍ତ ହେବାକୁ ଦିଆଯାଇ ନ ଥିଲା। ପ୍ରକୃତରେ, ପାଇଲଟ ଲାଇସେନ୍ସ ଚାହୁଁଥିବା ଜଣେ ପ୍ରାର୍ଥୀଙ୍କୁ ଦୁଇଟି ପରୀକ୍ଷାରେ ଉତ୍ତୀର୍ଣ୍ଣ ହେବାକୁ ପଡିଥାଏ। କିନ୍ନରଙ୍କ କ୍ଷେତ୍ରରେ, ପ୍ରାର୍ଥୀ ନିଶ୍ଚିତ ଭାବରେ ଦ୍ୱିତୀୟ ଶ୍ରେଣୀ ଯୋଗ୍ୟତା ପାସ କରିବାକୁ ହୋଇଥାଏ। ଡାକ୍ତରୀ ପରୀକ୍ଷା ଅନ୍ତର୍ଗତ ଚିକିତ୍ସା ବିଶେଷଜ୍ଞଙ୍କଠାରୁ ବିସ୍ତୃତ ଡାକ୍ତରୀ ରିପୋର୍ଟ ଆଣିବାକୁ ପଡିଥାଏ।
