ଛତ୍ରପୁର,୨୦।୪,(ଦିଲ୍ଲୀପ ସାମଲ): ଟାଟା ଦ୍ୱାରା ଜମି ହରା ଓ ତାଲିମ ପ୍ରାପ୍ତ ଯୁବତୀଯୁବକଙ୍କୁ ଦୀପକ ଫଟିଲାଇଜର ଓ ପେଟ୍ରୋକେମିକାଲ୍ସ କମ୍ପାନୀରେ ସ୍ଥାୟୀ ନିଯୁକ୍ତି ଦାବୀ ଜୋର ଧରିଛି, ଏନେଇ ଟାଟା ଷ୍ଟିଲ (ସ୍ବତନ୍ତ୍ର ଅର୍ଥନୈତିକ ଜୋନ ) ଶ୍ରମିକ ସଂଘ ପକ୍ଷରୁ ଛତ୍ରପୁର ବିଧାୟକ କୃଷ୍ଣ ଚନ୍ଦ୍ର ନାୟକଙ୍କୁ ଭେଟି ଘଟଣା ସମ୍ପର୍କରେ ଅବଗତ କରାଯାଇଛ। ଏହା ସହିତ ଜିଲାପ୍ରଶାସନ ଏବଂ କମ୍ପାନୀ କର୍ତ୍ତୁପକ୍ଷଙ୍କୁ ଜଣାଇ ଦିଆଯିବ ବୋଲି ମଧ୍ୟ ଶ୍ରମିକ ସଂଘ ପକ୍ଷରୁ କୁହାଯାଇଛି। ନଚେତ ଆସନ୍ତା ୩୦ ତାରିଖରେ ଦୀପକ ଫଟିଲାଇଜର ଓ ପେଟ୍ରୋକେମିକାଲ୍ସ କମ୍ପାନୀ ସମ୍ମୁଖରେ ଗଣ ଧାରଣା ଦିଆଯିବ ବୋଲି ଶ୍ରମିକ ସଂଘ ପକ୍ଷରୁ ଚେତାବନୀ ଦିଆଯାଇଛି। ଟାଟା ଆମକୁ ଧୋକା ଦେଇଛି ଜମି ଦେଲୁ ଓ ବିସ୍ଥାପିତ ହେଲୁ ଶେଷରେ ଆମକୁ ନିଯୁକ୍ତି ବଦଳରେ ଧୋକା ଦେବାରେ ଲାଗିଛି। ଏହାକୁ ବରଦାସ୍ତ କରାଯିବ ନାହିଁ। ଲଢେଇ ଜାରି ରହିବ ବୋଲି ଶ୍ରମିକ ସଂଘର ସଭାପତି ଏନ. ମୋହନ ରେଡ୍ଡୀ ଓ ସାଧାରଣ ସମ୍ପାଦକ ଏନ. ଗଣେଶ ରେଡ୍ଡୀ ଏବଂ ଅନ୍ୟାନ୍ୟ କର୍ମକର୍ତ୍ତାଗଣ ସୂଚନା ଦେଇଛନ୍ତି। ସେମାନେ କହିଛନ୍ତି କିଛି ଦିନ ତଳେ ଦୀପକ ଫଟିଲାଇଜର ଓ ପେଟ୍ରୋକେମିକାଲ୍ସ କମ୍ପାନୀରେ ନିଯୁକ୍ତି ନିମନ୍ତେ ଭୁବନେଶ୍ୱର ଓ ବିଶାଖାପାଟଣାଠାରେ ବିଭିନ୍ନ ପଦବୀ ପାଇଁ ନିଯୁକ୍ତି ବିଜ୍ଞାପନ ଦେଇଛି। ବଡ଼ ଦୁଃଖର କଥା ଆମ ଜମିହରା ଯୁବତୀଯୁବକ ସେଠାକୁ ଯାଇ ନିଯୁକ୍ତି ପ୍ରକ୍ରିୟାରେ ଭାଗ ନେଇ ନ ପାରି ଘରକୁ ଫେରି ଆସୁଛନ୍ତି। କାରଣ ପଚାରିଲେ ସେମାନଙ୍କ ପାଖରେ ଅଭିଜ୍ଞତା ନାହିଁ ବୋଲି ଦର୍ଶାଯାଉଛି। ତାହା ହେଲେ ସେମାନେ ଦୀର୍ଘ ୫ବର୍ଷ ହେଲା ଫେରୋକ୍ରୋମ, ଟାଟା ଚା କାରଖାନାରେ ଯେଉଁ ଅଭିଜ୍ଞତା ନେଇଛନ୍ତି ତାହା ବୃଥା ବୋଲି ସେମାନେ ଅଭିଯୋଗ କରିଛନ୍ତ। ଆଗରୁ ଗୋପାଳପୁର ଶିଳ୍ପ ପାର୍କରେ ଯେ କୌଣସି କମ୍ପାନୀ ଆରମ୍ଭ ହେଉଥିଲା, ଜମିହରା ଯୁବତୀଯୁବକଙ୍କୁ ଏନ ଟି ଟି ଏଫରେ ନିଯୁକ୍ତି ପ୍ରକ୍ରିୟା ହେଉଥିଲା। ଏଣୁ ସ୍ଥାନୀୟ ଜମିହରା ଓ ବିସ୍ଥାପିତଙ୍କ ପାଇଁ ଅତିଶୀଘ୍ର ନିଯୁକ୍ତି ପ୍ରକ୍ରିୟା ଆରମ୍ଭ କରାଯାଉ ବୋଲି ଶ୍ରମିକ ସଂଘ ପକ୍ଷରୁ କମ୍ପାନୀର ମୁଖ୍ୟଙ୍କୁ ଅନୁରୋଧ କରାଯାଇଛି। ଏହା ସହିତ ଗତ ଅଗଷ୍ଟ ୩୦ ୨୦୧୯ ଆରଡ଼ିସି ଅଫିସରେ ହୋଇଥିବା ଆର ପି ଡ଼ି ଏ ସି ବୈଠକ ନିୟମକୁ କାର୍ଯ୍ୟକାରୀ କରାଯାଉ। ନଚେତ ଆନ୍ଦୋଳନକୁ ଜୋରଦାର କରାଯିବ ବୋଲି ସେମାନେ କହିଛନ୍ତି।
