ଓ୍ବାଶିଂଟନ,୨୦।୬ : ରବିବାର ଦିନ ଆଟଲାଣ୍ଟିକ ମହାସାଗରରେ ଟାଇଟାନିକର ଧ୍ୱଂସାବଶେଷ ଦେଖିବାକୁ ଯାଇଥିବା ଏକ ପର୍ଯ୍ୟଟନ ବୁଡ଼ାଜାହାଜ ନିଖୋଜ ହୋଇଯାଇଥିଲା। କୁହାଯାଉଛି ଯେ ଏହି ବୁଡ଼ାଜାହାଜରେ ଜଣେ ପାଇଲଟ ଏବଂ ଚାରିଜଣ ପର୍ଯ୍ୟଟକ ଥିଲେ। ଏହି ଲୋକମାନଙ୍କ ମଧ୍ୟରେ ବ୍ରିଟିଶ ବିଲିୟନେୟାର ହମିଶ ହାର୍ଡିଂ ମଧ୍ୟ ଅନ୍ତର୍ଭୁକ୍ତ। ଏଠାରେ, ବୁଡ଼ାଜାହାଜ ବୁଡ଼ିଯିବା ଖବର ପ୍ରସାରିତ ହେବା ମାତ୍ରେ ଆମେରିକା ଏବଂ କାନାଡା ଏକ ସର୍ଚ୍ଚ ଅପରେଶନ ଆରମ୍ଭ କରିଛନ୍ତି।
ସୂଚନା ଅନୁଯାୟୀ, ପର୍ଯ୍ୟଟନ ବୁଡ଼ାଜାହାଜ ରବିବାର ଆଟଲାଣ୍ଟିକ ମହାସାଗରରେ ଯାତ୍ରା ଆରମ୍ଭ କରିଥିଲା। ପାଣିରେ ଯାତ୍ରା କରିବାର ପ୍ରାୟ ଅଢ଼େଇ ଘଣ୍ଟା ପରେ ଜାହାଜ ସହିତ ଯୋଗାଯୋଗ ସମ୍ପର୍କ ବିଚ୍ଛିନ୍ନ ହୋଇଥିଲା। ଏହା ନିଖୋଜ ହୋଇଯାଇଥିଲେ। ଏହି ବୁଡ଼ାଜାହାଜ ଖୋଜିବା ପାଇଁ ବହୁତ କମ ସମୟ ଅଛି, କାରଣ ଏଥିରେ କେବଳ ୯୬ ଘଣ୍ଟା ପାଇଁ ଅମ୍ଳଜାନ ମହଜୁଦ ଅଛି ।
ଆମେରିକା ଏବଂ କାନାଡା ଦ୍ୱାରା ପରିଚାଳିତ ସର୍ଚ୍ଚ ଅପରେଶନରେ ଏପର୍ଯ୍ୟନ୍ତ କୌଣସି ସନ୍ଧାନ ସାମ୍ନାକୁ ଆସିନାହିଁ। ଉଭୟ ଦେଶର ଉଦ୍ଧାରକାରୀ ଦଳ ନିରନ୍ତର ପାଣିରେ ଖୋଜୁଛନ୍ତି। ବୁଡ଼ାଜାହାଜ ଖୋଜିବା ପାଇଁ ସୋନାର ବାୟକୁ ପାଣିକୁ ପଠାଯାଇଛି, ଯାହାଫଳରେ ପାଣିରେ ଏହା ନଜର ରଖିପାରିବ ଏଥି ସହିତ, ଅନ୍ୟ ଜାହାଜରୁ ମଧ୍ୟ ସାହାଯ୍ୟ ଲୋଡ଼ାଯାଉଛି ।
ଟାଇଟାନିକର ଧ୍ୱଂସାବଶେଷ ଦେଖିବାକୁ ପ୍ରାୟ ଦୁଇ କୋଟି ଟଙ୍କା ଖର୍ଚ୍ଚ ହୋଇଛି । ଏହି ଯାତ୍ରା ସେଣ୍ଟ ଜୋନ୍ସର ନ୍ୟୁଫାଉଣ୍ଡଲାଣ୍ଡରୁ ଆରମ୍ଭ ହୋଇଥିଲା। ଟାଇଟାନିକ ଜାହାଜ ୧୦ ଏପ୍ରିଲ ୧୯୧୨ ରେ ଯାତ୍ରା କରି ୧୪-୧୫ ଏପ୍ରିଲରେ ଆଟଲାଣ୍ଟିକ ମହାସାଗରରେ ଏକ ବରଫ ପାହାଡ଼ରେ ମାଡ଼ ହେବା ପରେ ବୁଡ଼ି ଯାଇଥିଲା। ଏଥିରେ ୧୫୦୦ ରୁ ଅଧିକ ଲୋକଙ୍କର ମୃତ୍ୟୁ ଘଟଥିଲା। ୧୯୮୫ରେ ଟାଇଟାନିକର ଧ୍ୱଂସାବଶେଷ ଆବିଷ୍କୃତ ହୋଇଥିଲା।
