ଦାରିଙ୍ଗବାଡ଼ି,୧୫ା୧୨(ଅରୁଣ ସାହୁ): ଓଡ଼ିଶାର କଶ୍ମୀର କୁହାଯାଉଥିବା ଦାରିଙ୍ଗବାଡ଼ିରେ ବଢୁଛି ପର୍ଯ୍ୟଟକଙ୍କ ଭିଡ଼। ରବିବାର ହଜାର ସଂଖ୍ୟାରେ ପର୍ଯ୍ୟଟକ ଦାରିଙ୍ଗବାଡ଼ିର ହିଲଭିୟୁ ପାର୍କ ସମେତ ଲଭର୍ସ ପଏଣ୍ଟ, ମିଡିୟୁବାନ୍ଦା ଜଳପ୍ରପାତ, କଫି ବଗିଚା, ଡ଼ୁଲୁରୀ ପାଇନ ବଣ, କିସୁବାଡ଼ି ଜଳପ୍ରପାତ, ଶାନ୍ତି ଉପତ୍ୟକା ସମେତ ପ୍ରକୃତି ଉଦ୍ୟାନ ଓ ବିଭିନ୍ନ ସ୍ଥାନରେ ବୁଲିଥିବା ଜଣାପଡ଼ିଛି। କେବଳ କଫି ବଗିଚା ଓ ହିଲଭିୟୁ ପାର୍କରେ ପର୍ଯ୍ୟଟକଙ୍କଠାରୁ ୫୦ ହଜାର ଆୟ ହୋଇଥିବା ବ୍ଲକ ପ୍ରଶାସନ ସୂତ୍ରରୁ ଜଣାପଡ଼ିଛି। ଅନ୍ୟ ପର୍ଯ୍ୟଟନ କ୍ଷେତ୍ରରେ ମଧ୍ୟ ସେହିପରି ଆୟ ହୋଇଥାଇପାରେ କୌଣସି ରିପୋର୍ଟ ହସ୍ତଗତ ହୋଇ ନ ଥିବା ବିଡିଓ ପ୍ରୀତିରଞ୍ଜନ ରଥ କହିଛନ୍ତି। ତେବେ ଛୁଟିଦିନ ରହିଥିବାରୁ ପର୍ଯ୍ୟଟକ ଶୀତର ମଜା ନେବାକୁ ଦାରିଙ୍ଗବାଡ଼ିରେ ପହଞ୍ଚିଥିବା ଜଣାପଡ଼ିଛି।
ଆଗକୁ ଆହୁରି ଛୁଟି ଦିନମାନଙ୍କରେ ପର୍ଯ୍ୟଟକଙ୍କ ଭିଡ଼ ଜମିବା ଆଶଙ୍କା କରାଯାଇଛି। ସେହିପରି ଗତ ୫ ଦିନ ହେଲା ଅଞ୍ଚଳରେ ତୁଷାରପାତ ଜାରି ରହିଛି। ଏଥିସହ ତାପମାତ୍ରା ୬ ଡିଗ୍ରୀ ରହିଛି। ଧାନ ବିଲ, ଖୋଲା ପଡ଼ିଆରେ ଏହି ତୁଷାରପାତ ଜାରି ରହିଛି। ପ୍ରବଳ ଶୀତ ଲୋକଙ୍କୁ ଅସ୍ତବ୍ୟସ୍ତ କରିପକାଉଛି।
Dharitri – Odisha’s No.1 Odia Daily
