ମୁମ୍ବାଇ,୧୪।୩ : ଅଧିକରୁ ଅଧିକ ଯୌନ ନିର୍ଯାତନା ମାମଲା ସାମ୍ନାକୁ ଆସୁଛି। ଏହି କାରଣରୁ ଦେଶରେ ଏଥିପାଇଁ ଆଇନ ପ୍ରଣୟନ କରାଯାଇଛି। କିନ୍ତୁ ଅନେକ ଥର ଏପରି ମାମଲା ଆସିଛି ଯେଉଁଠାରେ ଏହି ନିୟମଗୁଡ଼ିକର ଫାଇଦା ନିଆଯାଉଛି । ନିକଟରେ ଏପରି ଏକ ମାମଲା ସାମ୍ନାକୁ ଆସିଛି। ଏହି ମାମଲାରେ ବମ୍ବେ ହାଇକୋର୍ଟ କହିଛନ୍ତି ଯେ କେବଳ ମୁଣ୍ଡ ଓ ପିଠି ସ୍ପର୍ଶ କରିବାକୁ ଯୌନ ନିର୍ଯାତନା ବୋଲି କୁହାଯାଇପାରିବ ନାହିଁ।
ବମ୍ବେ ହାଇକୋର୍ଟର ନାଗପୁର ବେଞ୍ଚ ଏହିତ ମାମଲାରେ ଜଣେ ୨୮ ବର୍ଷ ବୟସ୍କା ବ୍ୟକ୍ତିଙ୍କୁ ନିର୍ଦ୍ଦୋଷରେ ଖଲାସ କରି କହିଛି ଯେ କୌଣସି ମନ୍ଦ ଉଦ୍ଦେଶ୍ୟ ବିନା ଏଭଳି କରିବାକୁ ଯୌନ ନିର୍ଯାତନା କୁହାଯାଇ ପାରିବ ନାହିଁ। ଏହି ମାମଲା ୨୦୧୨ମସିହାର। ଜଣେ ୧୮ ବର୍ଷ ବୟସ୍କା ବ୍ୟକ୍ତି ୧୨ ବର୍ଷ ବୟସ୍କା ଜଣେ ନାବାଳିକାଙ୍କ ପ୍ରତି ଏଭଳି ବ୍ୟବହାର ପ୍ରଦର୍ଶନ କରିଥିବାରୁ ତାଙ୍କୁ ଗିରଫ କରାଯାଇଥିଲା। ପୀଡିତାଙ୍କ କହିବାନୁସାରେ, ଅଭିଯୁକ୍ତ ଜଣକ ତାଙ୍କ ପିଠି ଓ ମୁଣ୍ଡକୁ ସ୍ପର୍ଶ କରିଥିଲେ।
କୋର୍ଟ କହିଛନ୍ତି, ’୧୨-୧୩ ବର୍ଷ ବୟସ୍କା ପୀଡିତା କୌଣସି ମନ୍ଦ ଉଦ୍ଦେଶ୍ୟରେ ଏଭଳି କରାଯାଇଥିବା ଉଲ୍ଲେଖ କରିନାହାଁନ୍ତି। ସେ କହିଥିଲେ ଯେ କିଛି ଅସ୍ବାଭାବିକ ଆଚରଣ ଯୋଗୁଁ ସେ ନିଜକୁ ଅସହଜ ମନେ କଲେ।
ଫେବୃଆରୀ ୧୦ ରେ କୋର୍ଟ ଏହାର ରାୟ ପ୍ରଦାନ କରିଥିଲେ, ଯାହାର ଏକ ନକଲ ୧୩ ମାର୍ଚ୍ଚରେ ଉପଲବ୍ଧ ହୋଇଥିଲା। ଜଷ୍ଟିସ ଭାରତୀ ଡାଙ୍ଗରେଙ୍କ ନେତୃତ୍ୱରେ ଗଠିତ ଏକକ ବେଞ୍ଚ କହିଛନ୍ତି ଯେ ଅଭିଯୁକ୍ତଙ୍କର କୌଣସି ମନ୍ଦ ଉଦ୍ଦେଶ୍ୟ ଥିବା ଜଣାପଡୁ ନାହିଁ, ବରଂ ତାଙ୍କ ଶବ୍ଦରୁ ଜଣାପଡିଛି ଯେ ସେ କେବଳ ପୀଡିତାଙ୍କୁ ଜଣେ ଛୋଟ ପିଲା ଭାବେ ଦେଖି ଏଭଳି କରିଥିଲେ। ବିଚାରପତି କହିଛନ୍ତି, ଜଣେ ମହିଳାଙ୍କ ବିନମ୍ରତାକୁ ଭଙ୍ଗ କରିବା ପାଇଁ, ତାଙ୍କ ବିନମ୍ରତାକୁ ଅପମାନିତ ଅବା ନିର୍ଯାତିତ କରିବାର ମନ୍ଦ ଉଦ୍ଦେଶ୍ୟ ରହିବା ଜରୁରୀ ଅଟେ।
ଓକିଲଙ୍କ କହିବାନୁସାରେ, ୧୫ ମାର୍ଚ୍ଚ ୨୦୧୨ ରେ, ଅଭିଯୁକ୍ତଙ୍କୁ ୧୮ ବର୍ଷ ହୋଇଥିଲା ଏବଂ କିଛି କାଗଜପତ୍ର ଦେବାକୁ ସେ ନାବାଳିକାଙ୍କର ଘରକୁ ଯାଇଥିଲେ। ସେହି ସମୟରେ ନାବାଳିକା ଘରେ ଏକୁଟିଆ ଥିଲା। ସେ ନାବାଳିକାଙ୍କର ମୁଣ୍ଡ ଓ ପିଠିରେ ସ୍ପର୍ଶ କରିଥିଲେ। ନାବାଳିକା ଜଣଙ୍କ ଭୟଭୀତ ହୋଇ ସାହାଯ୍ୟ ପାଇଁ ଚିତ୍କାର କରିଥିଲେ। ଏହି ମାମଲାରେ ଟ୍ରାଏଲ କୋର୍ଟ ତାଙ୍କୁ ଦୋଷୀ ସାବ୍ୟସ୍ତ କରି ୬ ମାସ ଜେଲ ଦଣ୍ଡାଦେଶ କରିଥିଲେ। ପରେ ଅଭିଯୁକ୍ତ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ହାଇକୋର୍ଟ ତାଙ୍କ ନିଷ୍ପତ୍ତିରେ କହିଛନ୍ତି ଯେ ନିମ୍ନ ଅଦାଲତର ନିଷ୍ପତ୍ତି ଠିକ ନୁହେଁ ଏବଂ ପ୍ରିମା ଫେସୀ ଏହା ଜଣାପଡୁଛି ଯେ ବ୍ୟକ୍ତି ଜଣକ ବିନା କୌଣସି ମନ୍ଦ ଉଦ୍ଦେଶ୍ୟରେ ଏହି କାର୍ଯ୍ୟ କରିଥିଲେ।
