ନୂଆଦିଲ୍ଲୀ,୨।୨: ସୁବର୍ଣ୍ଣପୁର ଜିଲାପାଳ ନୃପରାଜ ସାହୁଙ୍କ ବୟାନକୁ ନେଇ ଓଡ଼ିଶା ରାଜନୀତିରେ ହଟଚମଟ ସୃଷ୍ଟି ହୋଇଛି। ରବିବାର ସୁବର୍ଣ୍ଣପୁରରେ ଆୟୋଜିତ ‘ସୁଭଦ୍ରା ଶକ୍ତି ମେଳା’ ଶୁଭାରମ୍ଭ ହୋଇଥିଲା। ଏଠାରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଉପସ୍ଥିତିରେ ଜିଲାପାଳ ପରୋକ୍ଷରେ ପୂର୍ବ ବିଜେଡି ସରକାରଙ୍କୁ ଟାର୍ଗେଟ କରିଥିଲେ। ନୂଆ ସରକାରରେ ପ୍ରଶାସନିକ ସଂସ୍କୃତିରେ ଆସିଥିବା ପରିବର୍ତ୍ତନ ବିଷୟରେ ମତ ରଖିଥିଲେ। ଏହାକୁ ନେଇ ବିରୋଧୀ ବିଜେଡି ତୀବ୍ର ପ୍ରତିକ୍ରିୟା ପ୍ରକାଶ କରିବା ସହ ଜିଲାପାଳଙ୍କ ନିରପେକ୍ଷତା ଉପରେ ପ୍ରଶ୍ନ ଉଠାଇଛି।
ସୋନପୁରରେ ଆୟୋଜିତ ଏହି ସରକାରୀ କାର୍ଯ୍ୟକ୍ରମରେ ସ୍ୱାଗତ ଭାଷଣ ଦେବା ବେଳେ ଜିଲାପାଳ ଡକ୍ଟର ନୃପରାଜ ସାହୁ କହିଥିଲେ ଯେ, “ଦିନ ଥିଲା ଶାସକଙ୍କୁ ଦେଖି ହେଉନଥିଲା, କଥା ହୋଇ ହେଉନଥିଲା କିମ୍ବା ଛୁଇଁ ହେଉନଥିଲା। ସେହି ‘ଟଚ୍ ମି ନଟ୍, ସ୍ପିକ୍ ମି ନଟ୍, ସି ମି ନଟ୍’ ସଂସ୍କୃତିକୁ ବର୍ତ୍ତମାନର ସରକାର ଉପାଡ଼ି ଫିଙ୍ଗିଛନ୍ତି।” ଜିଲାପାଳଙ୍କ ଏହି ମନ୍ତବ୍ୟ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ୨୪ ବର୍ଷର ଶାସନ ପ୍ରତି ଏକ କଟାକ୍ଷ ବୋଲି ଚର୍ଚ୍ଚା ହେଉଛି।
Has the Collector of Subarnapur, Mr Nruparaj Sahoo, joined the BJP? BJD condemns the conduct of the Collector of Subarnapur, Mr Nruparaj Sahoo, for allegedly trying to act as an agent of a political party, keeping in mind his vested interests for the future.
How can the common… pic.twitter.com/qioqUukt4G
— Dr Lenin Mohanty (@DrLeninMohanty1) February 2, 2026
ଏହି ବୟାନକୁ ନେଇ ବିଜେଡି ମୁଖପାତ୍ର ଲେନିନ୍ ମହାନ୍ତି ଜିଲାପାଳଙ୍କୁ କଡ଼ା ସମାଲୋଚନା କରିଛନ୍ତି। ସେ ପ୍ରଶ୍ନ କରିଛନ୍ତି ଯେ, “ଜିଲାପାଳ କ’ଣ ଭଜାପରେ ଯୋଗ ଦେଇଛନ୍ତି? ସେ ଜଣେ ସରକାରୀ ଅଧିକାରୀ ନା କୌଣସି ରାଜନୈତିକ ଦଳର ଏଜେଣ୍ଟ ଭାବେ କାମ କରୁଛନ୍ତି?” ବିଜେଡି ପକ୍ଷରୁ କୁହାଯାଇଛି ଯେ, ମୁଖ୍ୟମନ୍ତ୍ରୀଙ୍କୁ ଖୁସି କରିବା ପାଇଁ ଜିଲାପାଳ ନିଜର ସାମ୍ବିଧାନିକ ମର୍ଯ୍ୟାଦା ଭୁଲି ଏପରି ରାଜନୈତିକ ବୟାନ ଦେଉଛନ୍ତି। ଯଦି ସେ ରାଜନୀତି କରିବାକୁ ଚାହୁଁଛନ୍ତି, ତେବେ ଚାକିରିରୁ ଇସ୍ତଫା ଦେଇ ମଇଦାନକୁ ଆସନ୍ତୁ ବୋଲି ଦଳ ଚ୍ୟାଲେଞ୍ଜ କରିଛି। ଏହି ଘଟଣା ଏବେ ପ୍ରଶାସନିକ ନିରପେକ୍ଷତାକୁ ନେଇ ଏକ ବଡ଼ ବିତର୍କ ସୃଷ୍ଟି କରିଛି।
