ଆଡିଲେଡ,୨୪।୧୦:ଭାରତ ଅଷ୍ଟ୍ରେଲିଆ ବିପକ୍ଷ ଦ୍ୱିତୀୟ ଏକଦିବସୀୟ ମ୍ୟାଚ୍ରେ ୨ ଉଇକେଟରେ ପରାସ୍ତ ହୋଇଛି। ଏହି ହାଇଭୋଲଟେଜ ମ୍ୟାଚ୍ରେ ସବୁଠାରୁ ଚର୍ଚ୍ଚିତ ଘଟଣା ଥିଲା ବିରାଟ କୋହଲିଙ୍କ ଲଗାତାର ଦ୍ୱିତୀୟଥର ପାଇଁ ଶୂନରେ ଆଉଟ ହେବା। ଏକଦା ରନ ମେସିନ ଭାବରେ ଜଣାଶୁଣା କୋହଲି ଏକ ଲଜ୍ଜାଜନକ ରେକର୍ଡ କରିଛନ୍ତି,ଯାହାକୁ କୌଣସି ବ୍ୟାଟ୍ସମ୍ୟାନ ଭାଙ୍ଗିବାକୁ ଚାହିଁବେ ନାହିଁ। ଅନ୍ତର୍ଜାତୀୟ କ୍ରିକେଟ୍ରେ ୪୦ତମ ଥର ବିରାଟଙ୍କୁ ବିନା ରନ୍ରେ ଆଉଟ କରାଯାଇଛି।
ପୂର୍ବତନ ଭାରତୀୟ ଦ୍ରୁତ ବୋଲର ଜାହିର ଖାନ ତାଲିକାର ଶୀର୍ଷରେ ଅଛନ୍ତି। ତିନୋଟି ଫର୍ମାଟରେ ଭାରତ ପାଇଁ ୩୦୯ ମ୍ୟାଚ ଖେଳିଥିବା ଜାହିର ୪୩ ଥର ବିନା ସ୍କୋର୍ରେ ଆଉଟ ହୋଇଥିଲେ। ସେ ବଲ୍ରେ ଦଳ ପାଇଁ ଅନେକ ମ୍ୟାଚ ଜିତାଇଥିଲେ, କିନ୍ତୁ ବ୍ୟାଟ୍ରେ ତାଙ୍କର ଅବଦାନ ସୀମିତ ଥିଲା।
ଭାରତର ସବୁଠାରୁ ନିର୍ଭରଯୋଗ୍ୟ ବ୍ୟାଟ୍ସମ୍ୟାନ ବିବେଚିତ ବିରାଟ କୋହଲି ୨ ନମ୍ବରରେ ଅଛନ୍ତି। ତଥାପି, ପରିସଂଖ୍ୟାନ ଦର୍ଶାଉଛି ଯେ, କୋହଲିଙ୍କ ନାମରେ ଏବେ ୪୦ ଡକ ଅଛି। ତାଙ୍କ ଚମତ୍କାର କ୍ୟାରିୟରରେ, କୋହଲି ପ୍ରାୟ ୨୮,୦୦୦ ଅନ୍ତର୍ଜାତୀୟ ରନ ଏବଂ ୮୨ ଶତକ ହାସଲ କରିଛନ୍ତି, କିନ୍ତୁ ଏହି ‘ଡକ ରେକର୍ଡ’ ତାଙ୍କ ଗୌରବମୟ କ୍ୟାରିୟରରେ ଏକ ଦାଗ। ଆଡିଲେଡରେ ଦ୍ୱିତୀୟ ଏକଦିବସୀୟ ମ୍ୟାଚ୍ରେ ସେ ପୁଣି ଥରେ ବିନା ସ୍କୋରରେ ଆଉଟ ହୋଇଥିଲେ।
ଇଶାନ୍ତ ଶର୍ମା ଏହି ତାଲିକାରେ ତୃତୀୟ ସ୍ଥାନରେ ଅଛନ୍ତି। ଏହି ଦ୍ରୁତ ବୋଲର ତାଙ୍କ ଅନ୍ତର୍ଜାତୀୟ କ୍ୟାରିୟରରେ ୪୦ ଥର ଡକ କରିଛନ୍ତି। ଭାରତର କିମ୍ବଦନ୍ତୀ ସ୍ପିନର ହରଭଜନ ସିଂହ ଚତୁର୍ଥ ସ୍ଥାନରେ ଅଛନ୍ତି। ପ୍ରାୟ ୨୦ ବର୍ଷର କ୍ୟାରିୟରରେ, ସେ ଦୁଇଟି ଟେଷ୍ଟ ଶତକ ହାସଲ କରିଥିଲେ କିନ୍ତୁ ୩୭ ଥର ଡକରେ ଆଉଟ ହୋଇଥିଲେ। ହରଭଜନ ବଲ ସହିତ ଭାରତକୁ ଅନେକ ଥର ବିଜୟୀ କରାଇଥିଲେ, କିନ୍ତୁ ବ୍ୟାଟ ସହିତ ଅନେକ ଥର ଶୀଘ୍ର ଆଉଟ ହୋଇଥିଲେ।
ବର୍ତ୍ତମାନର ଦ୍ରୁତ ବୋଲର ଜସପ୍ରିତ ବୁମରା ପଞ୍ଚମ ସ୍ଥାନରେ ଅଛନ୍ତି। ସେ ଏପର୍ଯ୍ୟନ୍ତ ୩୫ ଥର ଡକ କରିଛନ୍ତି। ବୁମରା ତାଙ୍କ ବୋଲିଂ ପାଇଁ ଜଣାଶୁଣା। ତାଙ୍କର ୟର୍କର ବ୍ୟାଟସମ୍ୟାନଙ୍କୁ ଥରହର କରାଏ, କିନ୍ତୁ ଯେତେବେଳେ ବ୍ୟାଟିଂ କଥା ଆସେ, ସେ ମଧ୍ୟ ‘ଡକ କ୍ଲବ’ରେ ସାମିଲ ହୋଇଯାଇଛନ୍ତି।
Dharitri – Odisha’s No.1 Odia Daily
