ଭୁବନେଶ୍ୱର, ୨୨।୫(ବ୍ୟୁରୋ): କରୋନା ଭୟ ନ ଯାଉଣୁ ଏବେ ଦେଶରେ ଆଉ ଏକ ସଂକ୍ରାମକ ରୋଗ ‘ଟମାଟୋ ଫ୍ଲୁ’କୁ ନେଇ ଭୟ ଘାରିଛି। ଏହା ସାଧାରଣତଃ ଶିଶୁଙ୍କଠାରେ ଦେଖିବାକୁ ମିଳୁଛି। ତେବେ ରାଜ୍ୟରେ ଏ ଯାଏ ଟମାଟୋ ଫ୍ଲୁ ରୋଗୀ ଚିହ୍ନଟ ହୋଇ ନ ଥିଲେ ମଧ୍ୟ ବିଭିନ୍ନ ହସ୍ପିଟାଲକୁ ସନ୍ଦିଗ୍ଧ ରୋଗୀ ଚିକିତ୍ସା ପାଇଁ ଆସୁଥିବା ସୂଚନା ମିଳିଛି। ହେଲେ ଏଥିରେ ଭୟଭୀତ ନ ହେବାକୁ ସ୍ବାସ୍ଥ୍ୟ ବିଶେଷଜ୍ଞମାନେ ପରାମର୍ଶ ଦେଇଛନ୍ତି।
ଭୁବନେଶ୍ୱର କ୍ୟାପିଟାଲ ହସ୍ପିଟାଲକୁ ଗତ ପ୍ରାୟ ୧୫ ଦିନ ହେଲାଣି ଦିନକୁ ୫ରୁ ୬ଜଣ ଟମାଟୋ ଫ୍ଲୁ ସନ୍ଦିଗ୍ଧ ରୋଗୀ ଆସୁଛନ୍ତି ବୋଲି ନିର୍ଦ୍ଦେଶକ ଡା. ଲକ୍ଷ୍ମୀଧର ସାହୁ ସୂଚନା ଦେଇଛନ୍ତି। ସେ କହିଛନ୍ତି, ଯେଉଁମାନେ ଆସୁଛନ୍ତି ପ୍ରାୟତଃ ଛୋଟ ପିଲା। ସେମାନଙ୍କ ପାଟିରେ ଚିହ୍ନ ରହିବା ସହିତ ପୂରା ଶରୀର କୁଣ୍ଡେଇ ହେଉଛି। ସାଧାରଣ ଚିକିତ୍ସା ପରେ ୨ ରୁ ୪ଦିନ ଭିତରେ ସେମାନେ ଭଲ ହୋଇଯାଉଛନ୍ତି। ତେବେ ପ୍ରତିଦିନ ସନ୍ଦେହ ହେଉଥିବା କିଛି ନମୁନା ରିଜିଓନାଲ ମେଡିକାଲ ରିସର୍ଚ୍ଚ ସେଣ୍ଟର(ଆର୍ଏମ୍ଆର୍ସି)କୁ ପରୀକ୍ଷା ପାଇଁ ପଠାଯାଉଛି। ବର୍ତ୍ତମାନ ସ୍ଥିତି ନିୟନ୍ତ୍ରଣରେ ଅଛି ଓ ଭୟଭୀତ ହେବାର ଆବଶ୍ୟକ ନାହିଁ ବୋଲି ଡା. ସାହୁ ପରାମର୍ଶ ଦେଇଛନ୍ତ। ସେହିଭଳି ଭୁବନେଶ୍ୱର ଏମ୍ସକୁ ମଧ୍ୟ ପ୍ରତିଦିନ ୪ରୁ ୫ ଜଣ ସନ୍ଦିଗ୍ଧ ଟମାଟୋ ଫ୍ଲୁ ରୋଗୀ ଆସୁଛନ୍ତି। ପ୍ରାୟ ୨ ସପ୍ତାହ ହେବ ଏଭଳି ଲକ୍ଷଣ ଥିବା ରୋଗୀ ଆସୁଥିବା ଏମ୍ସ ଆଡିଶନାଲ ସୁପରିଣ୍ଟେଣ୍ଡେଣ୍ଟ ଡା. ପ୍ରଭାସ ରଞ୍ଜନ ତ୍ରିପାଠୀ କହିଛନ୍ତି।
ରାଜ୍ୟ ଜନସ୍ବାସ୍ଥ୍ୟ ନିର୍ଦ୍ଦେଶକ ଡା. ନିରଞ୍ଜନ ମିଶ୍ର କହିଛନ୍ତି, କେରଳରେ ଏବେ ସୁଦ୍ଧା ଟମାଟୋ ଫ୍ଲୁର ୮୨ କେସ୍ ଚିହ୍ନଟ ହୋଇଛି। ତେବେ କେନ୍ଦ୍ର ସରକାରଙ୍କ ପକ୍ଷରୁ ଓଡ଼ିଶାକୁ କୌଣସି ଆଡ୍ଭାଇଜରି ଆସିନାହିଁ କିମ୍ବା ସର୍ଭେଲାନ୍ସ କରିବାକୁ ଆଲର୍ଟ ଜାରି କରାଯାଇ ନାହିଁ। ଡାକ୍ତର ଓ ବିଶେଷଜ୍ଞଙ୍କ ସହ ଆଲୋଚନା କରାଯାଇଛି। ସେମାନଙ୍କ ମତ, ଟମାଟୋ ଫ୍ଲୁ ଏକ ଭାଇରାଲ ରୋଗ। ଏହା ଗ୍ରୀଷ୍ମ ଦିନରେ ହିଁ ହୁଏ। ଏହାର ଲକ୍ଷଣ-ପିଲା ଖାଇବେ ନାହିଁ, ବାନ୍ତି ହେବ, ଦେହ ଯାକ ଫଳିିଯିବ, ନାଲି ପଡ଼ିଯିବ ଏବଂ ଜ୍ୱର ହେବ। ଓଡ଼ିଶାରେ କେତେ କେସ୍ ଏଭଳି ଅଛି ଜାଣିବା ପାଇଁ ମେଡିକାଲ କଲେଜଗୁଡ଼ିକୁ ରିପୋର୍ଟ ମଗାଯାଇଥିଲା। ଆର୍ଏମ୍ଆର୍ସି ଏହି ଭୂତାଣୁର ଚିହ୍ନଟ ସହ ନମୁନା ସଂଗ୍ରହ କରି ପଠାଇବେ ବୋଲି ଜନସ୍ବାସ୍ଥ୍ୟ ନିର୍ଦ୍ଦେଶକ କହିଛନ୍ତି।
