ମାଡ୍ରାସ୍, ୬।୨ : ଦେଶରେ ଅନ୍ୟ ଧର୍ମ ପ୍ରତି ଜନସାଧାରଣଙ୍କ ମଧ୍ୟରେ ଦେଖାଦେଉଥିବା ସହିଷ୍ଣୁତା ଆଚରଣ ଯୋଗୁ ଭିନ୍ନତାରେ ଏକତା ସୃଷ୍ଟି ହୋଇପାରିଛି। ଏଭଳି ମନୋଭାବ ପ୍ରତି ନାଗରିକଙ୍କ କ୍ଷେତ୍ରରେ ପ୍ରଦର୍ଶିତ ହେବା ଉଚିତ। ଏକ ମାମଲାର ବିଚାର କରି ମାଡ୍ରାସ୍ ହାଇକୋର୍ଟ ଏହା କହିଛନ୍ତି। ଚର୍ଚ୍ଚ ନିର୍ମାଣ ପାଇଁ କନ୍ୟାକୁମାରୀ ଜିଲାପାଳ ଜମି ଯୋଗାଇ ଦେଇଥିବାବେଳେ ଏହାକୁ ବିରୋଧ କରି ଏକ ରିଟ୍ ପିଟିଶନ୍ ହାଇକୋର୍ଟରେ ଦାଖଲ କରାଯାଇଛି। ଚର୍ଚ୍ଚରେ ଦିନରାତି ଲାଉଡ୍ ସ୍ପିକର ବାଜିବା ଦର୍ଶାଇ ସମ୍ପୃକ୍ତ ବ୍ୟକ୍ତି ଆବେଦନ କରିଛନ୍ତି।
ଏହାଦ୍ୱାରା ସ୍ଥାନୀୟ ଅଞ୍ଚଳର ଶାନ୍ତ ପରିବେଶରେ ଅଯଥା ଶବ୍ଦ ପ୍ରଦୂଷଣ ସୃଷ୍ଟି ହେବାର ଆଶଙ୍କା ଥିବା ସେ ଆବେଦନରେ ଉଲ୍ଲେଖ କରିଛନ୍ତି। ହାଇକୋର୍ଟ ଭାରତୀୟ ସାମ୍ବିଧାନିକ ବ୍ୟବସ୍ଥାର ଅନୁଚ୍ଛେଦ ୫୧-ଏ(ଇ) ଅନୁସାରେ ଏହା ଏକ ମୌଳିକ କର୍ତ୍ତବ୍ୟ ବୋଲି ଦର୍ଶାଇଛନ୍ତି। ପ୍ରତି ନାଗରିକ ପରସ୍ପର ମଧ୍ୟରେ ଭାଇଚାରା ସୃଷ୍ଟି କରିବା ଆବଶ୍ୟକ ବୋଲି କୋର୍ଟ କହିଛନ୍ତି।
ବିଚାରପତି ସି.ଭି. କାର୍ତ୍ତିକେୟନଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଏହି ମାମଲାର ବିଚାର କରି କହିଛନ୍ତି ଯେ, ଗୋଟିଏ ଅଞ୍ଚଳରେ ବିଭିନ୍ନ ଧର୍ମସ୍ଥଳ ରହିଥିବାବେଳେ ସହିଷ୍ଣୁତା ମନୋଭାବ ଦ୍ୱାରା ହିଁ ଏକତ୍ୱ ଭାବନା ସୃଷ୍ଟି ହୋଇପାରିବ। ଏହା ଦେଶ ପାଇଁ ଅପରିହାର୍ଯ୍ୟ ବୋଲି ଖଣ୍ଡପୀଠ କହିଛନ୍ତିି।
