କେନ୍ଦୁଝର,୧୭ା୯(ନରେଶ ଚନ୍ଦ୍ର ପଟ୍ଟନାୟକ): ଜିଲାପାଳଙ୍କ କାଯର୍ୟାଳୟ ପରିସରରେ ଥିବା ଶୌଚାଳୟରେ ବିଶ୍ୱକର୍ମା ଓ ଗଣେଶ ପୂଜା ପାଇଁ ବାହାରୁ ମୃଣ୍ମୟ ମୂର୍ତ୍ତି ଆଣି ବିକ୍ରି କରୁଥିବା ଜଣେ ବ୍ୟବସାୟୀଙ୍କ କବ୍ଜାରେ ରହିଛି। ଉକ୍ତ ଅପରିଷ୍କାର ପରିସ୍ରାଗାରରେ ବାହାରୁ ଆଣିଥିବା ମୂର୍ତ୍ତିଗୁଡ଼ିକୁ ରଖିଥିବାରୁ ଭକ୍ତଙ୍କ ଭାବାବେଗ ଉପରେ କୁଠାରଘାତ ସଦୃଶ୍ୟ ହୋଇଛି। ଫଳରେ ଠାକୁରଙ୍କ ପ୍ରତି ଅସମ୍ମାନ ହୋଇଛି ବୋଲି ମତ ପ୍ରକାଶ ପାଉଛି।
ସୂଚନାଯୋଗ୍ୟ, ପ୍ରାୟ ୨୦ ଲକ୍ଷ ଟଙ୍କା ବ୍ୟୟରେ ନିର୍ମିତ ଉକ୍ତ ସାମୂହିକ ଶୌଚାଳୟଟି ରକ୍ଷଣାବେକ୍ଷଣ ଅଭାବରୁ ଅପରିଷ୍କାର ହୋଇରହିଛି। ଫଳରେ ଜିଲାପାଳଙ୍କ କାର୍ଯ୍ୟାଳୟକୁ ଆସୁଥିବା ଲୋକମାନେ ଉକ୍ତ ଶୌଚାଳୟ ଭିତରେ ଏଣେ ତେଣେ ପରିସ୍ରା କରୁଥିବାରୁ ଦୁର୍ଗନ୍ଧମୟ ପରିବେଶ ସୃଷ୍ଟି କରିବା ସହ ରୋଗର ଗନ୍ତାଘର ପାଲଟିଛି। ଫଳରେ ଅନେକ ଶୌଚାଳୟ ବାହାରେ ପରିସ୍ରା କରୁଥିବାରୁ ତାହା ମଧ୍ୟ ଅସ୍ବାସ୍ଥ୍ୟକର ପରିବେଶରେ ପରିଣତ ହୋଇଛି। ଜିଲାପାଳଙ୍କ କାର୍ଯ୍ୟାଳୟ ପରିସରରେ ଏଭଳି ମୂର୍ତ୍ତି ଗୋଦାମ ନେଇ କିଭଳି ଜଗୁଆଳି ତଥା ପ୍ରଶାସନିକ ଅଧିକାରୀ ଜାଣି ଚୁପ୍ ରହିଛନ୍ତି ତାହାକୁ ନେଇ ମଧ୍ୟ ବଡ଼ ପ୍ରଶ୍ନ ସୃଷ୍ଟି ହୋଇଛି। ତୁରନ୍ତ ଏହାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଦାବି ହେଉଛି।
