ପ୍ରତ୍ୟେକ ପିଲାଙ୍କ ପାଇଁ ଶିକ୍ଷା ଗୁରୁତ୍ୱପୂର୍ଣ୍ଣ। ଆଜିର ସମୟରେ ଲୋକମାନେ ଶିକ୍ଷାର ମୂଲ୍ୟ ଜାଣନ୍ତି। କିନ୍ତୁ ସମୟ ସହିତ ଶିକ୍ଷା ମଧ୍ୟ ମହଙ୍ଗା ହୋଇଯାଇଛି। ଏହି କାରଣରୁ ପ୍ରତ୍ୟେକ ମାତାପିତା ନିଜ ପିଲାଙ୍କ ଭଲ ଶିକ୍ଷା ପାଇଁ ଟଙ୍କା ସଞ୍ଚୟ କରିବା ଆରମ୍ଭ କରନ୍ତି, କିନ୍ତୁ ଆମ ଦେଶରେ ଏମିତି କିଛି ସ୍କୁଲ ଅଛି, ଯାହାକି ଶିଶୁର ଶିକ୍ଷା ପାଇଁ ସମସ୍ତ ପ୍ରକାର ପ୍ରୟାସ କରିଥାଏ। ଏହା ଦ୍ୱାରା ପିଲା ଭଲ ଶିକ୍ଷା ସହିତ ପର୍ଯ୍ୟାୟ କ୍ରମେ ଆଗକୁ ବଢିପାରିବ। ଏଭଳି ଏକ ସ୍କୁଲ ଭାରତର ଆସାମ ରାଜ୍ୟରେ ଅଛି। ନିକଟରେ ସୋସିଆଲ ମିଡିଆରେ ଏହି ସ୍କୁଲ ଚର୍ଚ୍ଚାର ବିଷୟ ପାଲଟିଛି।
ଗୁଆହାଟିରେ ଥିବା ଏହି ସ୍କୁଲ ଅନେକ ମାଇଲଖୁଣ୍ଟ ପ୍ରତିଷ୍ଠା କରିଛି, ଯାହା ବର୍ତ୍ତମାନ ଅନ୍ୟ ରାଜ୍ୟ ପାଇଁ ଆଦର୍ଶ ପାଲଟିଛି। ଆଶ୍ଚର୍ଯ୍ୟଜନକ କଥା ହେଉଛି, ସ୍କୁଲରେ ପିଲାମାନଙ୍କୁ ଫି’ ହିସାବରେ ଟଙ୍କା ନୁହେଁ, ୧୦୦ଟି ପ୍ଲାଷ୍ଟିକ ବୋତଲ ଜମା କରିବାକୁ ପଡେ। ଏଠାରେ ପଢୁଥିବା ପିଲାମାନେ ସେମାନଙ୍କ ଅଧ୍ୟୟନ ସହିତ ଟଙ୍କା ରୋଜଗାର କରିବାରେ ସକ୍ଷମ ହୋଇଥାନ୍ତି। କୁହାଯାଉଛି ଯେ, ଗ୍ରାମାଞ୍ଚଳର ଶହେରୁ ଅଧିକ ପିଲା ଏଠାରେ ଜ୍ଞାନ ଆହରଣ କରୁଛନ୍ତି।
ପ୍ରତି ସପ୍ତାହରେ ପିଲାମାନେ ୨୫ଟି ଖାଲି ପାଣି ବୋତଲ ସଂଗ୍ରହ କରନ୍ତି। ଏହିଭଳି ପ୍ରତି ମାସରେ ୧୦୦ ବୋତଲ ଜମା କରନ୍ତି। ଜଣେ ଦମ୍ପତି ଏହି ସ୍କୁଲ ଖୋଲିବାର ସଂକଳ୍ପ ନେଇଥିଲେ। ଅଳିଆ ଆବର୍ଜନା ଏବଂ ଶିକ୍ଷାର ଅଭାବ ଦେଖି ଏହି ସ୍କୁଲ ଖୋଲିବାକୁ ଦୁହେଁ ନିଷ୍ପତ୍ତି ନେଇଥିଲେ। ସେଥିପାଇଁ ସେମାନେ ପିଲାମାନଙ୍କୁ ଭଲ ଶିକ୍ଷା ଏବଂ ସମାଜ ପାଇଁ କିଛି ଭଲ ବାର୍ତ୍ତା ଦେବାକୁ ଚାହୁଁଥିଲେ। ଏହି ସ୍କୁଲରେ ପିଲାମାନେ ଅଧ୍ୟୟନ ସହିତ ପ୍ଲାଷ୍ଟିକ ବୋତଲରୁ ଅନେକ ପ୍ରକାରର ଜିନିଷ କିପରି ତିଆରି କରାଯାଏ, ବଗିଚା ଏବଂ ଅନ୍ୟାନ୍ୟ କଳା ଶିଖାଯାଏ।
