ରିଓ ଡି ଜେନିରୋ,୧୨।୭: ଦକ୍ଷିଣ ଆମେରିକାର ସର୍ବବୃହତ୍ ଫୁଟ୍ବଲ ଟୁର୍ନାମେଣ୍ଟ କୋପା ଆମେରିକାରେ ଏଥର ଲିଓନେଲ ମେସିଙ୍କ ନେତୃତ୍ୱାଧୀନ ଆର୍ଜେଣ୍ଟିନା ଚାମ୍ପିୟନ ହେବାର ଗୌରବ ଅର୍ଜନ କରିଛି। ଶନିବାର ସ୍ଥାନୀୟ ଐତିହାସିକ ମାରାକାନା ଷ୍ଟାଡିୟମରେ ଖେଳାଯାଇଥିବା କଡ଼ା ସଂଘର୍ଷପୂର୍ଣ୍ଣ ଫାଇନାଲ ମ୍ୟାଚ୍ରେ ଆର୍ଜେଣ୍ଟିନା ୧-୦ ଗୋଲରେ ପାରମ୍ପରିକ ପ୍ରତିଦ୍ୱନ୍ଦ୍ୱୀ ତଥା ଅନ୍ୟତମ ଫୁଟ୍ବଲ ପାଓ୍ବାର ହାଉସ ନେମାରଙ୍କ ବ୍ରାଜିଲକୁ ହରାଇ ଟାଇଟଲ ହାସଲ କରିଛି। ୧୯୯୩ ପରେ ଦୀର୍ଘ ୨୮ ବର୍ଷ ପରେ ଆର୍ଜେଣ୍ଟିନା କୌଣସି ପ୍ରଥମ ମେଜର ଟ୍ରଫିରେ ଚାମ୍ପିୟନ ହୋଇଛି। ମେସିଙ୍କୁ ୬ ବର୍ଷ ହୋଇଥିବା ବେଳେ ଆର୍ଜେଣ୍ଟିନା ଶେଷଥର ପାଇଁ ଏହି ଟୁର୍ନାମେଣ୍ଟରେ ଚାମ୍ପିୟନ ହୋଇଥିଲା। ଟୁର୍ନାମେଣ୍ଟରେ ଅପରାଜେୟ ରହିବା ସହ ଆର୍ଜେଣ୍ଟିନା ଏଥିସହ ମୋଟ ୧୫ତମ କୋପା ଆମେରିକା ଟାଇଟଲ ଜିତି ଉରୁଗୁଏର ସମକକ୍ଷ ହୋଇଛି। ଅନ୍ୟପଟେ ବ୍ରାଜିଲ ୯ଥର ଏହି ଟୁର୍ନାମେଣ୍ଟରେ ଚାମ୍ପିୟନ ହୋଇଛି। କେବଳ ଫାଇନାଲ ମ୍ୟାଚ୍ରେ କେତେ ହଜାର ଦର୍ଶକଙ୍କୁ ଷ୍ଟାଡିୟମ ଭିତରକୁ ଯିବାର ଅନୁମତି ପ୍ରଦାନ କରାଯାଇଥିଲା।
୨୨ତମ ମିନିଟ୍ରେ ମ୍ୟାଚ୍ର ଏକମାତ୍ର ଗୋଲ ଆର୍ଜେଣ୍ଟିନା ତରଫରୁ ସ୍କୋର କରାଯାଇଥିଲା। ଦଳ ତରଫରୁ ୩୩ ବର୍ଷୀୟ ଅଭିଜ୍ଞ ଷ୍ଟ୍ରାଇକର ଆଞ୍ଜେଲ ଡି ମାରିଆ ଗୋଲ ଦେଇ ଆର୍ଜେଣ୍ଟିନାକୁ ଅଗ୍ରଣୀ କରାଇଥିଲେ। ରୋଡ୍ରିଗୋ ଡି ପଲ୍ ଏକ ଲମ୍ବା ପାସ୍ ମାରିଆଙ୍କୁୁ ଦେଇଥିଲେ। ବ୍ରାଜିଲ ଡିଫେନ୍ସର ଦୁର୍ବଳତାରୁ ଫାଇଦା ଉଠାଇ ମାରିଆ ଏହାର ସଦ୍ବ୍ୟବହାର କରି ବାମ୍ ଗୋଡରେ ହାଲକା ଶଟ୍ ମାରି ଗୋଲକିପର ଏଡେରସନଙ୍କ ମୁଣ୍ଡ ଉପରେ ଗୋଲ ଦେବାକୁ ସକ୍ଷମ ହୋଇଥିଲେ। ଏହାପରେ ଉଭୟ ଦଳ ମଧ୍ୟରେ ଜବରଦସ୍ତ ସଂଘର୍ଷ ଦେଖିବାକୁ ମିଳିଥିଲେ ମଧ୍ୟ ଗୋଲ ସମ୍ଭବ ହୋଇ ନ ଥିଲା। ଫଳରେ ଆର୍ଜେଣ୍ଟିନା ବିଜୟୀ ହୋଇଥିଲା। ୬୦ ପ୍ରତିଶତ ବଲ୍ ପଜେସନ କରିଥିଲେ ମଧ୍ୟ ବ୍ରାଜିଲ ଗୋଲ ଦେବାକୁ ସକ୍ଷମ ହୋଇ ନ ଥିଲା। ପ୍ରଥମାର୍ଦ୍ଧରେ ପଛରେ ପଡିବା ପରେ ବ୍ରାଜିଲ ଦ୍ୱିତୀୟାଦ୍ଧରେ ପ୍ରତ୍ୟାବର୍ତ୍ତନ କରିବାକୁ ପ୍ରୟାସ କରିଥିଲା ଓ କାଉଣ୍ଟର ଆଟାକ କରିଥିଲା। ଆର୍ଜେଣ୍ଟିନା ୪୦ ପ୍ରତିଶତ ବଲ୍ ପଜେସ କରିଥିଲା। ପାସ୍ ଓ ପାସ୍ ଆକ୍ୟୁରେସିରେ ମଧ୍ୟ ଆର୍ଜେଣ୍ଟିନାଠାରୁ ବ୍ରାଜିଲ ଯଥେଷ୍ଟ ଆଗରେ ରହିଥିଲା।
ପୂର୍ବରୁ ଆର୍ଜେଣ୍ଟିନା କ୍ୱାର୍ଟର ଫାଇନାଲରେ ୩-୦ ଗୋଲରେ ଇକ୍ୱେଡର, ସେମିରେ କଲମ୍ବିଆକୁ ପେନାଲ୍ଟିରେ ୩-୨ ଗୋଲରେ ପରାସ୍ତ କରିଥିଲା। ସେହିପରି ବ୍ରାଜିଲ କ୍ୱାର୍ଟରରେ ୧-୦ ଗୋଲରେ ଚିଲିକୁ ଓ ସେମିରେ ପେରୁକୁ ୧-୦ ଗୋଲରେ ପରାସ୍ତ କରିଥିଲା।
