ଜଳେଶ୍ୱର, ୨୨ ।୩(ଡି.ଏନ.ଏ.) ବାଲେଶ୍ୱର ଜିଲା ଜଳେଶ୍ୱର ବ୍ଲକର ୧୪ ପଞ୍ଚାୟତ ରାଇବଣିଆ ଥାନା ଅଧୀନରେ ରହିଛି। ଏହି ଅଞ୍ଚଳରୁ ପ୍ରତିଦିନ ବହୁ ଜଙ୍ଗଲଜାତ ଦ୍ରବ୍ୟ ଓ ମୂଲ୍ୟବାନ କାଠ ପଶ୍ଚିମବଙ୍ଗକୁ ଚାଲାଣ ହୋଇଆସୁଛି ା ସୁବର୍ଣ୍ଣରେଖା ନଦୀର ବିଭିନ୍ନ ସ୍ଥାନରେ ଘରୋଇ କାଠପୋଲ ନିର୍ମାଣ କରି ମାଫିଆମାନେ ରାଇବଣିଆ ଓ ଓଡ଼ିଶାର ବିଭିନ୍ନ ଅଞ୍ଚଳରୁ କାଠ ପଶ୍ଚିମବଙ୍ଗକୁ ସିଧା ଚୋରାଚାଲାଣ କରୁଛନ୍ତି। ଏ ସମ୍ପର୍କରେ ଜଙ୍ଗଲ ବିଭାଗ ନିକଟରେ ଖବର ଥିଲେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ ା
କିନ୍ତୁ ରାଇବଣିଆ ଥାନାରେ ନୂତନ ଥାନା ଅଧିକାରୀ ଯୋଗ ଦେବା ପରେ ଚୋରା ବାଲିଗାଡ଼ି ଓ କାଠଗାଡ଼ି ଜବତ ହେବାରେ ଲାଗିଛି। ଗତ ରବିବାର ପୋଲିସ୍ ଏକ ଟ୍ରାକ୍ଟର (ନଂ.ଓଆର୍୦୧ପି-୪୦୩୮)କୁ ସନ୍ଦେହରେ ଜବତ କରିଛି ା
ସେଥିରୁ ଲକ୍ଷାଧିକ ଟଙ୍କାର ଶାଗୁଆନ୍ କାଠ ଜବତ ହୋଇଥିବା ବେଳେ ଏକ ମାମଲା(ନଂ.୧୧୭/୨୨) ରୁଜୁ ହୋଇଛି ା ଥାନା ଅଧିକାରୀ ପ୍ରଫୁଲ୍ଲ ମଲ୍ଲିକ, ଡ୍ରାଇଭର ଅବନୀ ଘୋଷଙ୍କୁ ଗିରଫ କରି କୋର୍ଟଚାଲାଣ କରିଛି। ଏହି ଟ୍ରାକ୍ଟରରେ ଉପରେ ଆକାଶିଆ କାଠ ଲଦା ଯାଇଥିବା ବେଳେ ଭିତରେ ଶାଗୁଆନ କାଠ ଚାଲାଣ ହୋଇ ଆସୁଥିବା ପୋଲିସ ନଜରକୁ ଆସିଛି। ରାଇବଣିଆ ଅଞ୍ଚଳରୁ କେବଳ କାଠ ନୁହେଁ, ମୋରମ୍, ପଥର, ମାଟି ମଧ୍ୟ ପଶ୍ଚିମବଙ୍ଗକୁ ପ୍ରତିଦିନ ଚାଲାଣ ହୋଇଆସୁଛି।
