ନୂଆଦିଲ୍ଲୀ,୧୦।୧: ଚାଇନାର କମ୍ପାନୀ ବାଇଟ୍ଡାନ୍ସ ଭାରତରେ ଏହାର ଆପ ‘ଟିକଟକ୍’ର ସମସ୍ତ କର୍ମଚାରୀଙ୍କୁ ବରଖାସ୍ତ କରିଛି। କର୍ମଚାରୀମାନଙ୍କୁ ଏ ସମ୍ପର୍କରେ କମ୍ପାନୀ ପକ୍ଷରୁ ଇ-ମେଲ ପଠାଯାଇଛି। ଏଥିରେ କମ୍ପାନୀ କହିଛି ଯେ ଫେବୃଆରୀ ୨୮ ଏହି କମ୍ପାନୀରେ କର୍ମଚାରୀଙ୍କର ଶେଷ କାର୍ଯ୍ୟ ଦିବସ ଥିଲା। ଏହାର ପ୍ରତିବଦଳରେ କମ୍ପାନୀ ପ୍ରଭାବିତ କର୍ମଚାରୀମାନଙ୍କୁ ୯ ମାସର ଦରମା ପ୍ରଦାନ କରିବ।
ଜାତୀୟ ଗଣମାଧ୍ୟମ ରିପୋର୍ଟ ଅନୁଯାୟୀ, ଏହି ସପ୍ତାହ ଆରମ୍ଭରେ ଭାରତରେ କାମ କରୁଥିବା ୪୦ ଜଣ କର୍ମଚାରୀଙ୍କୁ ପିଙ୍କ ସ୍ଲିପ ଦିଆଯାଇଛି। ଏହା ସହିତ କମ୍ପାନୀ ବହିଷ୍କୃତ ହେବାକୁ ଥିବା କର୍ମଚାରୀଙ୍କୁ ୯ ମାସର ଦରମା ଦେବ। କର୍ମଚାରୀମାନଙ୍କୁ ଏହା ମଧ୍ୟ କୁହାଯାଇଛି ଯେ ଏକ ନୂତନ ଚାକିରି ପାଇବା ପାଇଁ କମ୍ପାନୀ ଦ୍ୱାରା କିଛି ଲାଭ ମଧ୍ୟ ଦିଆଯିବ। ଏହା ପଛର କାରଣ ଉପରେ କମ୍ପାନୀ କହିଛି ଯେ ଚାଇନାର ଆପ୍ ଉପରେ ସରକାରଙ୍କ ଆଭିମୁଖ୍ୟ ଯୋଗୁଁ କମ୍ପାନୀ ଭାରତରେ ପୁଣିଥରେ କାର୍ଯ୍ୟ ଆରମ୍ଭ କରିପାରିବ ନାହିଁ।
କହିରଖୁଛୁ, ଜୁନ ୨୦୨୦ ରେ କେନ୍ଦ୍ର ସରକାର ଟିକଟକ୍ ସମେତ ପ୍ରାୟ ୩୦୦ ଚାଇନିଜ୍ ଆପକୁ ଜାତୀୟ ସୁରକ୍ଷା ଦର୍ଶାଇ ନିଷିଦ୍ଧ କରିଥିଲେ। ଏହା ପରେ କମ୍ପାନୀର ଭାରତ କାର୍ଯ୍ୟାଳୟର ଅନେକ କର୍ମଚାରୀ ଦୁବାଇ ଏବଂ ବ୍ରାଜିଲର ଗ୍ରାହକଙ୍କ ପାଇଁ କାର୍ଯ୍ୟ କରୁଥିଲେ। ଯେତେବେଳେ ଭାରତରେ ଟିକଟୋକ ଉପରେ ପ୍ରତିବନ୍ଧକ ଲଗାଯାଇଥିଲା, ସେତେବେଳେ କମ୍ପାନୀର ୨୦୦ ମିଲିୟନରୁ ଅଧିକ ବ୍ୟବହାରକାରୀ ଥିଲେ।
