ଭଞ୍ଜନଗର,୩।୧(ବାବୁଲା ପ୍ରଧାନ): ଗଞ୍ଜାମ ଜିଲା ବ୍ରହ୍ମପୁର ଆଞ୍ଚଳିକ ମୁଖ୍ୟ ବନ ସଂରକ୍ଷକଙ୍କ ଅଧୀନରେ ଥିବା ଭଞ୍ଜନଗରସ୍ଥିତ ଘୁମୁସର ଉତ୍ତର ବନଖଣ୍ଡ, ଘୁମୁସର ଦକ୍ଷିଣ ବନଖଣ୍ଡ, ବଉଦ, ବ୍ରହ୍ମପୁର ଓ ବାଲିଗୁଡା ବନଖଣ୍ଡରେ ଶୁକ୍ରବାରଠାରୁ ବାଘ ଗଣନା ଆରମ୍ଭ ହୋଇଛି। ଏହା ୬ ଦିନ ବ୍ୟାପି ଚାଲି ୭ ତାରିଖରେ ସରିବ। ଏହାପରେ ଯେଉଁ ଅଞ୍ଚଳରେ ବାଘ ଥିବା କିଛିଟା ପ୍ରମାଣ ମିଳିବ ସେଠୀ ଟ୍ରାପ କ୍ୟାମେରା ଏକ ମାସ ପର୍ଯ୍ୟନ୍ତ ଲାଗିବ। ଏହାପରେ ଚୁଡାନ୍ତ ରିପୋର୍ଟ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ହସ୍ତାନ୍ତର କରାଯିବ। ବର୍ତ୍ତମାନ ଚାଲିଥିବା ଗଣନା ସମୟରେ କର୍ମଚାରୀ ମାନେ ପ୍ରଥମ ତିନିଦିନ ୫ କିମି ପର୍ଯ୍ୟନ୍ତ ଚାଲି ଚାଲି ସର୍ଭେ କରିବେ। ଏହାପରେ ୩ ଦିନ ବାଘର ପାଦ ଚିହ୍ନ, ମଳ ସମେତ ଅନ୍ୟାନ୍ୟ ପ୍ରମାଣ ଯୋଗାଡ ପାଇଁ ଆବଶ୍ୟକ ପଦକ୍ଷେପ ନିଆଯିବ। ଏହି ସମୟରେ ହାତୀ, ଗୟଳ ସମେତ ଅନ୍ୟାନ୍ୟ ପ୍ରାଣୀ ମଧ୍ୟ ଗଣତି କରାଯିବ। ଯେଉଁ ଅଞ୍ଚଳରେ ଉକ୍ତ ପ୍ରାଣୀ ମାନେ ରହୁଛନ୍ତି। ସେଠି କେଉଁ ସବୁ ଗଛ ଅଛି ତାହାର ମଧ୍ୟ ରିପୋର୍ଟ ପ୍ରସ୍ତୁତ କରାଯିବ ଏହି ସମୟ ମଧ୍ୟରେ। ଦୈନନ୍ଦିନର ରିପୋର୍ଟ ଅନଲାଇନ ମାଧ୍ୟମରେ ପୋର୍ଟାଲରେ ଅପଲୋଡ଼ ହେବ। ପୋର୍ଟାଲରେ ତ୍ରୁଟି ଯୋଗୁ ଉପରୋକ୍ତ ବନଖଣ୍ଡ ଗୁଡିକ ବିଳମ୍ବରେ ବାଘ ଗଣନା କରୁଛନ୍ତି। ପୁର୍ବରୁ ବ୍ରହ୍ମପୁର ଆର୍ସିସିଏଫ ଅଧିନରେ ଥିବା ଫୁଲବାଣୀ ଓ ପାରଳାଖେମୁଣ୍ଡି ବନଖଣ୍ଡରେ ପୂର୍ବ ନିର୍ଦ୍ଧାରିତ ଅନୁସାରେ ନଭେମ୍ବର ମାସ ୧୫ ରୁ ୨୧ ତାରିଖ ମଧ୍ୟରେ ହୋଇଥିଲା । ବଳକା ବନଖଣ୍ଡ ଗୁଡ଼ିକରେ ପୋର୍ଟାଲ ରେ ତ୍ରୁଟି ଯୋଗୁ ତାହାକୁ ସଜଡ଼ା ଯିବା ପରେ ଗତକାଲିଠାରୁ ଗଣନା ଆରମ୍ଭ ହୋଇଛି।
ସୂଚନାଯୋଗ୍ୟ ଯେ, ପ୍ରତି ୪ ବର୍ଷକୁ ଥରେ ଦେଶରେ ବାଘ ଗଣନା ହେଉଛି। ତେଣୁ ଇତିମଧ୍ୟରେ ଚଳିତ ବର୍ଷ ଦେଶରେ ବାଘ ଗଣନା ପ୍ରକ୍ରିୟା ଚାଲିଛି। ଏହିଭଳି ବ୍ରହ୍ମପୁର ଆଞ୍ଚଳିକ ବନ ସଂରକ୍ଷକ କାର୍ଯ୍ୟାଳୟ ପକ୍ଷରୁ ମଧ୍ୟ ବିଭିନ୍ନ ବନଖଣ୍ଡରେ ବାଘ ଗଣନା ପ୍ରକ୍ରିୟା ନଭେମ୍ବର ମାସ ୧୫ ରୁ ୨୧ ତାରିଖ ମଧ୍ୟରେ କରିବାର ଥିଲା। କିନ୍ତୁ ପୋର୍ଟାଲରେ ତ୍ରୁଟି ଯୋଗୁ ତାହାକୁ କେତେକ ବନଖଣ୍ଡରେ ସ୍ଥଗିତ ରଖାଯାଇଥିଲା। ବର୍ତ୍ତମାନ ତାହା ଆରମ୍ଭ ହୋଇଛି। ଗଣତି ପୂର୍ବରୁ ନଭେମ୍ବର ମାସରେ କର୍ମଚାରୀ ମାନଙ୍କୁ ତାଲିମ ପ୍ରଦାନ କରାଯାଇଥିଲା। କର୍ମଚାରୀମାନେ ବାଘ ଗଣନା ସମୟରେ ଜଙ୍ଗଲରେ ଟ୍ରାପ କ୍ୟାମେରା ଲଗାଇବେ। ପଗମାର୍କ ଓ ମଳ ବିଶ୍ଲେଷଣ କରିବେ। ଏଥିସହ ଜିନେଟିକ ଅନୁଶୀଳନ ଓ ସାଟେଲାଇଟ ଡାଟା ମ୍ୟାପିଂ ମଧ୍ୟ ହେବ। ବାଘ ଗଣନାର ମୂଳ ଲକ୍ଷ୍ୟ ହେଲା ଭାରତରେ ବାଘମାନଙ୍କ ନିକଟ ଆନୁମାନିକ ସଂଖ୍ୟା ଜାଣିବା । ବାଘମାନଙ୍କ ବାସସ୍ଥଳୀ ଅବସ୍ଥା ଅନୁଶୀଳନ କରିବା। ଏହାପରେ ସରକାର ଦେଶରେ ବାଘ ସଂରକ୍ଷଣ ପାଇଁ ଯୋଗ୍ୟ ନୀତି ଓ ପଦକ୍ଷେପ ଗ୍ରହଣ କରିବେ। ଉତ୍ତର ଘୁମୁସର ବନଖଣ୍ଡ ଅଧିକାରୀ ହିମାଂଶୁ ଶେଖର ମହାନ୍ତିଙ୍କ ନେତୃତ୍ୱରେ କର୍ମଚାରୀମାନେ ଗଣନା କାର୍ଯ୍ୟରେ ନିୟୋଜିତ ଅଛନ୍ତି। ଏନେଇ ଏସିଏଫ ବିବେକ ଦାସ, ବିମଳ ପ୍ରସାଦ ପ୍ରଧାନ, ରେଞ୍ଜର ବିମ୍ବାଧର ସାହୁ, ପୃଥିବୀରାଜ ପ୍ରଧାନଙ୍କ ନେତୃତ୍ୱରେ ୭୪ଟି ଟିମ ଗଠନ ହୋଇଛି।
Dharitri – Odisha’s No.1 Odia Daily
