ଢେଙ୍କାନାଳ ଅଫିସ,୨୬।୫: ଢେଙ୍କାନାଳ ଜିଲାରେ ଗୁରୁବାର ମଧ୍ୟାହ୍ନରେ କାଳବୈଶାଖୀ ତାଣ୍ଡବ ରଚିଛି। ପ୍ରାୟ ଘଣ୍ଟାଏ ଧରି ହୋଇଥିବା ମୂଷଳଧାରାରେ ବର୍ଷା, କୁଆପଥର ମାଡ଼ ସାଙ୍ଗକୁ ଝଡ଼ତୋଫାନରେ ବିଭିନ୍ନ ସ୍ଥାନରେ ବଡ଼ ବଡ଼ ଗଛ, ବିଦ୍ୟୁତ୍ ଖୁଣ୍ଟ ଧରାଶାୟୀ ହୋଇଯାଇଛି। ସହରାଞ୍ଚଳରେ ବିଦ୍ୟୁତ୍ ବିଭ୍ରାଟ ଦେଖାଦେଇଛି। ଅନ୍ୟପଟେ ପ୍ରାୟ ସପ୍ତାହେ ହେଲା ପ୍ରବଳ ଗ୍ରୀଷ୍ମପ୍ରବାହରେ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଥିବାବେଳେ ବର୍ଷା ପରିବେଶରେ ଶୀତଳତା ଭରିଛି।
ଢେଙ୍କାନାଳରେ ଗୁରୁବାର ସକାଳୁ ପାରଦ ଉପରମୁହଁା ହୋଇଥିଲା। ୧୦ଟା ବେଳକୁ ଝାଞ୍ଜିମାଡ଼ ଆରମ୍ଭ ହୋଇଯାଇଥିଲା। ପ୍ରବଳ ଗୁଳୁଗୁଳିରେ ସହରବାସୀ ସନ୍ତୁଳି ହେଉଥିବାବେଳେ ମଧ୍ୟାହ୍ନ ୧୨ଟା ବେଳକୁ ହଠାତ୍ ପାଗ ବଦଳି ଯାଇଥିଲା। ଚତୁର୍ଦ୍ଦିଗରୁ କଳାହାଣ୍ଡିଆ ମେଘ ଘୋଟି ଆସିଥିଲା। ପ୍ରବଳ ବେଗର ପ୍ରବନ ବୋହିବା ସହ କୁଆପଥର ବର୍ଷା ହୋଇଥିଲା। ଏହାର ପ୍ରଭାବରେ ପୌରାଞ୍ଚଳରେ ବ୍ୟାପକ କ୍ଷୟକ୍ଷତି ହୋଇଛି। କୁଞ୍ଜକାନ୍ତ-ଲଳିତନଗର ଅଞ୍ଚଳର ପୋଖରୀ ହୁଡ଼ାରେ ଥିବା ବଡ଼ ଗଛ ଉପୁଡ଼ି ରାସ୍ତା ଉପରେ ପଡ଼ିଥିଲା। ଏଥିସହ ୨ଟି ବିଦ୍ୟୁତ୍ ଖୁଣ୍ଟ ଭାଙ୍ଗି ଯାଇଛି। କାଠଗଡ଼ା ଆନନ୍ଦନଗରଠାରେ କେତେକ ଘରର ଟିଣ ଛପର ଉଡ଼ିଯାଇଛି। ବ୍ରଜନାଥ ବଡ଼ଜେନା ଉଚ୍ଚ ବିଦ୍ୟାଳୟ ପାଚେରି ଉପରେ ଗଛ ଭାଙ୍ଗି ପଡ଼ିଛି। ଝଡ଼ତୋଫାନରେ ୧୫ରୁ ଊର୍ଦ୍ଧ୍ୱ ଘର କ୍ଷତିଗ୍ରସ୍ତ ହୋଇଛି। ସେହିପରି ଗଁଦିଆ-ଯୋରନ୍ଦା-କପିଳାସ ରାସ୍ତାରେ ବିଭିନ୍ନ ସ୍ଥାନରେ ଗଛ ଉପୁଡ଼ି ପଡ଼ିଛି। ସୂଚନା ପାଇ ଅଗ୍ନିଶମ କର୍ମଚାରୀ ପହଞ୍ଚତ୍ ଗଛ କାଟି ରାସ୍ତା ସଫା କରିଛନ୍ତି। କେତେକ ସ୍ଥାନରେ ଯାତାୟାତ ସ୍ବାଭାବିକ ହୋଇଛି। ସେହିପରି ବିଦ୍ୟୁତ୍ ବିଭ୍ରାଟ ସ୍ବାଭାବିକ କରିବା ଲାଗି ବିଭାଗୀୟ କର୍ମଚାରୀ ଉଦ୍ୟମ ଚଳାଇଛନ୍ତି।
ଅନ୍ୟପଟେ ବୁଧବାର ସହରର ତାପମାତ୍ରା ୪୨.୩ ଡିଗ୍ରୀ ଛୁଇଁଥିବା ବେଳେ କାଳବୈଶାଖୀ ପ୍ରଭାବରେ ହୋଇଥିବା ବର୍ଷା ପରେ ଏହା ୩୮.୩ ଡିଗ୍ରୀକୁ ଖସି ଆସିଛି। ଫଳରେ ଅସହ୍ୟ ଗୁଳୁଗୁଳିରେ ସାମାନ୍ୟ ବ୍ରେକ୍ ଲାଗିଛି। କ୍ଷୟକ୍ଷତି ଆକଳନ କରି କ୍ଷତିଗ୍ରସ୍ତ ପରିବାରକୁ ସହାୟତା ଯୋଗାଇ ଦେବାକୁ ଦାବି ହେଉଛି।
