କୋରାପୁଟ, ୮।୩( ଅମିତାଭ ବେହେରା ): କୋରାପୁଟ କୋଲାବ ଜଳଭଣ୍ଡାରରେ ଶନିବାର ନବୋଦୟ ବିଦ୍ୟାଳୟର ତିନି ଛାତ୍ର ବୁଡ଼ି ମୃତ ଘଟଣାରେ ରବିବାର ନବୋଦୟ ସଂସ୍ଥାର ଆଞ୍ଚଳିକ କେନ୍ଦ୍ର ପକ୍ଷରୁ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । କୋରାପୁଟ ନବୋଦୟ ବିଦ୍ୟାଳୟର ୨ ଜଣ ଶିକ୍ଷକ ଓ ଜଣେ କେୟାର ଟେକରଙ୍କୁ ନିଲମ୍ବିତ କରିଥିବା ସୂଚନା ରହିଛି । ଅପାରପକ୍ଷେ ଘଟଣାର ତଦନ୍ତ ପାଇଁ ଜିଲାପାଳ ମନୋଜ ସତ୍ୟବାନ ମହାଜନଙ୍କ ନିର୍ଦ୍ଦେଶକ୍ରମେ ରବିବାର କୋରାପୁଟ ନବୋଦୟ ବିଦ୍ୟାଳୟକୁ ଜିଲା ପ୍ରଶାସନର ଚାରି ଜଣିଆ ଟିମ୍ ପରିଦର୍ଶନ କରିଥିଲେ ।
ଚାରି ଜଣିଆ ଟିମରେ କୋରାପୁଟ ତହସିଲଦାର ସୟଦ ସବୀର ସାହାଙ୍କ ନେତୃତ୍ୱରେ ଏସଡିପିଓ ସଞ୍ଜୟ କୁମାର ମଣ୍ଡଳ ଜିଲା ମଙ୍ଗଳ ଅଧିକାରୀ ସୁନୀଲ କୁମାର ତାଣ୍ଡି, ଜିଲା ଶିକ୍ଷା ଅଧିକାରୀ କରୁଣାକର ଭୁଏ ପ୍ରମୁଖ ବିଦ୍ୟାଳୟ ଯାଇ ଘଟଣା ସମ୍ପର୍କରେ ବିଦ୍ୟାଳୟ ଶିକ୍ଷକ ଅଧ୍ୟକ୍ଷା, କେୟାର ଟେକର ସମେତ ବିଭିନ୍ନ ଜଣକ ସହ ପଚାରି ବୁଝିଛନ୍ତି । ଏହାସହ ତଦନ୍ତ କରି ଜିଲାପାଳଙ୍କୁ ରିପୋର୍ଟ ପ୍ରଦାନ କରିବା ପାଇଁ କୁହାଯାଇଛି ।
ଅନ୍ୟପକ୍ଷେ ମୃତକ ୩ ଛାତ୍ରଙ୍କ ଶବକୁ ବ୍ୟବଛେଦ କରାଯାଇ ସେମାନଙ୍କ ପରବାରକୁ ହସ୍ତାନ୍ତର କରାଯାଇଥିବା କୋରାପୁଟ ତହସିଲଦାର ସବୀର ସାହା ପ୍ରକାଶ କରିଛନ୍ତି । ଘଟଣା ଅନୁଯାୟୀ ପରୀକ୍ଷା ସାରିବା ପରେ ନବୋଦୟ ବିଦ୍ୟାଳୟର ୧୦ ଜଣ ନିକଟରେ ଥିବା କୋଲାବ ଜଳଭଣ୍ଡାରକୁ ଗାଧୋଇବାକୁ ଯାଇଥିଲେ । ୫ ଜଣ ଗାଧଉଥିବା ବେଳେ ୩ ଜଣ ପାଣିରେ ବୁଡ଼ିଯାଇଥିଲେ ୨ ଜଣ ପହଁରି ବାହାରକୁ ଆସିଯାଇଥିଲେ । ବାହାରେ ଥିବା ଅନ୍ୟ ପିଲାଙ୍କ ସହ ବିଦ୍ୟାଳୟକୁ ଆସି ବିଦ୍ୟାଳୟ ଶିକ୍ଷକଙ୍କୁ କହିବା ପରେ ସ୍ଥାନୀୟ ଗ୍ରାମବାସୀ ସହାୟତାରେ ୩ ଜଣଙ୍କୁ ଉଦ୍ଧାର କରି କୋରାପୁଟ ମେଡିକାଲକୁ ପଠାଇଥିଲେ ।
