ପୁଣେ,୨୨।୨: ଆଜିକାଲି ମହାରାଷ୍ଟ୍ର ରାଜନୀତିରେ ଅଶାନ୍ତି ଦେଖାଦେଇଛି। ଶିବସେନାର ନାଁ ଏବଂ ନିର୍ବାଚନୀ ପ୍ରତୀକକୁ ନେଇ ବିବାଦ ଥମିବାର ନାଁ ନେଉନାହିଁ। ଏନେଇ ଏନସିପି ମୁଖ୍ୟ ଶରଦ ପାୱାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଭାଜପା ସରକାରକୁ ଟାର୍ଗେଟ୍ କରିଛନ୍ତି। ଗୋଟିଏ ଆଦର୍ଶ ଏବଂ ଦଳ ଦେଶରେ ଭାଇଚାରାକୁ ନଷ୍ଟ କରୁଥିବା ସେ ଅଭିଯୋଗ କରିଛନ୍ତି।
ସେ କହିଛନ୍ତି, ଅଟଳ ବିହାରୀ ବାଜପେୟୀ ପ୍ରଧାନମନ୍ତ୍ରୀ ଥିଲେ, ସେତେବେଳେ ଦେଶର ସଂସ୍ଥା ଉପରେ ସେପରି ଆକ୍ରମଣ ହୋଇ ନ ଥିଲା। ନରେନ୍ଦ୍ର ମୋଦିଙ୍କ ଶାସନରେ ଦେଶର ସଂସ୍ଥା ଉପରେ ଆକ୍ରମଣ କରାଯାଇଥିଲା। ଆଜିର ସରକାର ଅନ୍ୟ ରାଜନୈତିକ ଦଳମାନଙ୍କୁ କାମ କରିବାକୁ ଅନୁମତି ଦେବାକୁ ଚାହୁଁନାହାଁନ୍ତି। ନିର୍ବାଚନ ଆୟୋଗ ବ୍ୟବହାର କରାଯାଉଛି। ମହାରାଷ୍ଟ୍ରରେ ରାଜନୈତିକ ଦଳକୁ ଟାର୍ଗେଟ୍ କରାଯାଇଛି। ନିର୍ବାଚନ ଆୟୋଗ ଏପରି ନିଷ୍ପତ୍ତି କେବେ ଦେଇ ନ ଥିଲେ। ପ୍ରଥମ ଥର ପାଇଁ ନିର୍ବାଚନ ଆୟୋଗର ଏପରି ନିଷ୍ପତ୍ତି ଦେଖିଛି।
ଏହା ବ୍ୟତୀତ ଶରଦ ପାୱାର କଂଗ୍ରେସ ଏବଂ ଏନସିପି ମଧ୍ୟରେ ହୋଇଥିବା ଲଢେଇ ମନେ ପକାଇ କହିଛନ୍ତି, ବାଲାସାହେବ ଠାକରେଙ୍କ ଦ୍ୱାରା ଶିବସେନା ଗଠନ କରାଯାଇଥିଲା ଏବଂ ଏହାର ନିର୍ବାଚନ ପ୍ରତୀକ ଆୟୋଗ ଅନ୍ୟ କାହାକୁ ଦିଆଯାଇଛି। ପାର୍ଟି ଏବଂ ନିର୍ବାଚନ ଚିହ୍ନକୁ ନେଇ ମୋର ମଧ୍ୟ କଂଗ୍ରେସ ସହ ଝଗଡା ହୋଇଥିଲା। କିନ୍ତୁ ସେହି ସମୟରେ ନିର୍ବାଚନ ଆୟୋଗର ନିଷ୍ପତ୍ତି ସଠିକ ଥିଲା।
ସୂଚନାଯୋଗ୍ୟ, ଏକନାଥ ଶିନ୍ଦେ ଗୋଷ୍ଠୀକୁ ଅସଲ ଶିବସେନା ଭାବେ ନିର୍ବାଚନ ଆୟୋଗ ସ୍ବୀକୃତି ଦେଇଛନ୍ତି। ଏହାକୁ ନେଇ ସୁପ୍ରିମକୋର୍ଟରେ ଚ୍ୟାଲେଞ୍ଜ୍ କରିଛି ଉଦ୍ଧବ ଗୋଷ୍ଠୀ।
