ମୁମ୍ବାଇ,୪।୭: ମହାରାଷ୍ଟ୍ର ରାଜନୀତିରେ ମହାନାଟକ। ରାଜ୍ୟ ରାଜନୀତିରେ ଘଡିକେ ଘୋଡ଼ା ଛୁଟୁଛି। ଯାହା ଜାତୀୟ ରାଜନୀତିରେ ଗୁରୁତର ପ୍ରଭାବ ପକାଇଛି। ଏମିତିକି ୨୪ ରଣାଙ୍ଗନ ପାଇଁ ବିରୋଧୀ ମହାମେଣ୍ଟକୁ ବଡ ଝଟକା ଲାଗିଛି। ଏବେ ପୁଣି ଭାଜପା ଏବଂ ଶିନ୍ଦେ ଶିବିରକୁ ଏଣ୍ଟ୍ରି ମାରିଛନ୍ତି ଛୋଟା ପାଓ୍ବର। ଏକାଥରକେ ହାତେଇଛନ୍ତି ଉପ ମୁଖ୍ୟମନ୍ତ୍ରୀ ପଦ। ଏହାପରଠୁ ବିରୋଧୀଙ୍କ ଭିତରେ ଛନକା ପଶିଛି। ସେପଟେ ବଡ଼ ପାଓ୍ବରଙ୍କ ନିଦ ଭାଙ୍ଗିଛି।
ଏନସିସି ମୁଖିଆ ଶରଦ ପାୱର କହିଛନ୍ତି, ‘ମୁଁ ଦିନକୁ ପଛେ ଓଳିଏ ଖାଇବି କିନ୍ତୁ ମୋ ପାର୍ଟିକୁ ପୁଣି ଥରେ ଛିଡା କରାଇବି’। ଏହାରି ଭିତରେ ଶୁଭେଚ୍ଛା ବାର୍ତ୍ତାକୁ ନେଇ ଜାତୀୟ ରାଜନୀତିରେ ଖୋରାକ ଯୋଗାଇଛି। ଏଥର କିନ୍ତୁ କିଛି ବ୍ୟତିକ୍ରମ ଦେଖାଦେଇଛି। ଭାଜପା-ସିନ୍ଦେ(ଶିବସେନା) ସରକାରରେ ଅଜିତ ଉପ- ମୁଖ୍ୟମନ୍ତ୍ରୀ ଭାବେ ଶପଥ ନେଇଥିବାବେଳେ ପ୍ରଧାନମନ୍ତ୍ରୀ ମୋଦି କିମ୍ବା ଅମିତ ଶାହ ଶୁଭେଚ୍ଛା ଜଣାଇ ନାହାନ୍ତି। ଯେତେବେଳେ କି ୨୦୧୯ରେ ଅଜିତ ଉପ-ମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ ସେତେବେଳେ ଏହି ଦୁଇ ଶୀର୍ଷ ଭାଜପା ନେତା ଟ୍ବିଟ କରି ଶୁଭେଚ୍ଛା ଜଣାଇଥିଲେ। ଯାହାକୁ ରାଜନୈତିକ ସମୀକ୍ଷକମାନେ ଭିନ୍ନ ଦୃଷ୍ଟିରେ ଦେଖୁଛନ୍ତି। ମହାରାଷ୍ଟ୍ର ମହାନାଟକର ସ୍କ୍ରିପ୍ଟରେ ଆହୁରି ସିନ୍ ବାକି ଅଛି ବୋଲି ଅନେକେ ଅନୁମାନ କରୁଛନ୍ତି।
ସୂଚନାଯୋଗ୍ୟ, ଅଜିତ ପାୱାର ଡେପୁଟି ସିଏମ ଭାବରେ ଶପଥ ଗ୍ରହଣ କରିବା ଦିନଠାରୁ ମହାରାଷ୍ଟ୍ର ରାଜନୀତିରେ ଅଶାନ୍ତି ଦେଖାଦେଇଛି। ୨୦୧୯ରେ, ଯେତେବେଳେ ତତ୍କାଳୀନ ରାଜ୍ୟପାଳ ଦେବେନ୍ଦ୍ର ଫଡନାଭିସଙ୍କୁ ମୁଖ୍ୟମନ୍ତ୍ରୀ ଏବଂ ଅଜିତ ପାୱାରଙ୍କୁ ଉପମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଥିଲେ, ସେତେବେଳେ ମହାରାଷ୍ଟ୍ର ରାଜନୀତିରେ ଏକ ବଡ଼ ଆଲୋଡ଼ନ ସୃଷ୍ଟି ହୋଇଥିଲା। ଶପଥ ଗ୍ରହଣ କରିବାର କିଛି ସମୟ ପରେ ପ୍ରଧାନମନ୍ତ୍ରୀ ମୋଦି ତାଙ୍କ ଅଫିସିଆଲ ଟ୍ବିିଟର ଆକାଉଣ୍ଟରେ ଟ୍ବିଟ୍ କରି କହିଥିଲେ, ଦେବେନ୍ଦ୍ର ଫଡନାଭିସ ଏବଂ ଅଜିତ ପାୱାରଙ୍କୁ ଯଥାକ୍ରମେ ମହାରାଷ୍ଟ୍ରର ସିଏମ ଏବଂ ଡେପୁଟି ସିଏମ ଭାବରେ ଶପଥ ଗ୍ରହଣ କରିଥିବାରୁ ଅଭିନନ୍ଦନ। ମୁଁ ନିଶ୍ଚିତ ଯେ ସେମାନେ ମହାରାଷ୍ଟ୍ରର ଉଜ୍ଜ୍ୱଳ ଭବିଷ୍ୟତ ପାଇଁ ଯତ୍ନବାନ ହେବେ। ସେହିପରି କେନ୍ଦ୍ର ଗୃହମନ୍ତ୍ରୀ ଅମିତ ଶାହ, ଜେପି ନଡ୍ଡା, ରାଜନାଥ ସିଂହ, ନିତିନ ଗଡକରୀ, ନିର୍ମଳା ସୀତାରମଣ ଏବଂ ପୀୟୁଷ ଗୋୟଲଙ୍କ ସମେତ ବରିଷ୍ଠ ଭାଜପା ନେତା ଉଭୟଙ୍କୁ ଅଭିନନ୍ଦନ ଜଣାଇଥିଲେ।
ଏହି ଟ୍ବିଟର ରିପ୍ଲାଏରେ ଅଜିତ ପାୱାର ମଧ୍ୟ ତାଙ୍କ ଟ୍ବିଟ୍ ମାଧ୍ୟମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଧନ୍ୟବାଦ ଜଣାଇଥିଲେ। ସେ ମୋଦିଙ୍କୁ ଧନ୍ୟବାଦ ଜଣାଇ କହିଥିଲେ, ଆମେ ମହାରାଷ୍ଟ୍ରରେ ସ୍ଥିର ସରକାର କରିବୁ। ଯାହା ମହାରାଷ୍ଟ୍ରର ବିକାଶ ପାଇଁ କଠିନ ପରିଶ୍ରମ କରିବ। ଏଥିସହ ସେ ସମସ୍ତ ଶୁଭେଚ୍ଛା ବାର୍ତ୍ତାକୁ ଧନ୍ୟବାଦ ଜଣାଇଥିଲେ। ସେତେବେଳେ ଏନସିପି ସଭାପତି ଶରଦ ପାୱାର ତାଙ୍କ ପୁତୁରା ଅଜିତ ପାୱାରଙ୍କ ସେହି ପଦକ୍ଷେପକୁ ନେଇ ଗଣମାଧ୍ୟମରେ ନିଜକୁ ଦୂରେଇ ରଖିଥିଲେ। ଭାଜପାକୁ ସମର୍ଥନ କରିବା ଅଜିତ ପାୱାରଙ୍କ ବ୍ୟକ୍ତିଗତ ନିଷ୍ପତ୍ତି। ଏଥିରେ ଏନସିପିର କୌଣସି ଭୂମିକା ନାହିଁ ବୋଲି ସେ ସମୟରେ ବୟାନ ଦେଇଥିଲେ।
