ପୁଣେ,୨୦।୧୦: ଆଇସିସି କ୍ରିକେଟ ବିଶ୍ୱକପ୍ ୨୦୨୩ରେ ଟିମ୍ ଇଣ୍ଡିଆ ଗୁରୁବାର ଟୁର୍ନାମେଣ୍ଟରେ ଲଗାତାର ଚତୁର୍ଥ ବିଜୟ ହାସଲ କରିଥିଲା। ମ୍ୟାଚ୍କୁ ଷ୍ଟାର ବ୍ୟାଟ୍ସମ୍ୟାନ୍ ବିରାଟ କୋହଲି ଏବଂ ଉଇକେଟକିପର ବ୍ୟାଟ୍ସମ୍ୟାନ୍ କେଏଲ୍ ରାହୁଲ ଫିନିଶ କରିଥିଲେ। ବିଜୟ ପରେ ପାଭିଲିୟନ ଫେରିବା ସମୟରେ ଅଧିନାୟକ ରୋହିତ ଶର୍ମା ଉଭୟଙ୍କୁ ସ୍ବାଗତ କରିବା ସହ ଆଲିଙ୍ଗନ କରିଥିବା ଦେଖାଯାଇଥିଲା।
ଖୁସିର ଏହି ମୁହୁର୍ତ୍ତକୁ ପ୍ରଶଂସକଙ୍କ ସହ ବାଣ୍ଟିବା ଲାଗି ରୋହିତ ନିଜ ଇନଷ୍ଟାଗ୍ରାମ ପୃଷ୍ଠାରେ ‘ଟୁଗେଦର’ କ୍ୟାପ୍ଶନ ଲେଖି ଏକ ଫଟୋ ମଧ୍ୟ ଶେୟାର କରିଥିଲେ। ଏହାକୁ ଦେଖି ପ୍ରଶଂସକ ଭାବବିହ୍ବଳ ହୋଇ ନିଜର ଖୁସି ଜାହିର କରୁଛନ୍ତି। କେହି କେହି ଏହି ଟିମ୍କୁ ନଜର ନ ଲାଗୁ ବୋଲି ପ୍ରତିକ୍ରିୟା ଦେଉଥିବା ଦେଖାଯାଇଛି।
ପ୍ରକାଶ ଯେ, ରୋହିତ(୪୮) ଏବଂ ଗିଲ(୫୩) ରନ୍ ସହ ପ୍ରଥମ ଉଇକେଟ ଲାଗି ୮୮ ରନ୍ ଯୋଡ଼ି ଦଳକୁ ଭଲ ଆରମ୍ଭ ଦେଇଥିଲେ। କୋହଲି ୯୭ ବଲରେ ଅପରାଜିତ ୧୦୩ ରନ୍ କରିଥିଲେ। ରାହୁଲ(ଅପରାଜିତ ୩୪) ରନ୍ ସହ ଚତୁର୍ଥ ଉଇକେଟ ଲାଗି ୮୩ ରନ୍ ଯୋଡ଼ି ଭାରତର ସ୍କୋରକୁ ୪୧.୩ ଓଭରରେ ୨୬୧/୩ରେ ପହଞ୍ଚାଇଥିଲେ। ମ୍ୟାଚ୍ରେ କୋହଲି ବିଜୟୀ ଛକା ସହ ନିଜ କ୍ୟାରିୟରର ୪୮ତମ ଶତକ ପୂରଣ କରିଥିଲେ।
