ହାଇଦ୍ରାବାଦ୍,୮।୧୧: ତେଲେଙ୍ଗାନାରେ ହେବାକୁ ଥିବା ବିଧାନସଭା ନିର୍ବାଚନ ପାଇଁ ନିକଟରେ ବିଜ୍ଞପ୍ତି ଜାରି କରାଯାଇଛି। ଏହା ସହିତ ନାମାଙ୍କନ ପ୍ରକ୍ରିୟା ମଧ୍ୟ ସେଠାରେ ଆରମ୍ଭ ହୋଇଛି। ଅନେକ ବଡ ନେତା ସେମାନଙ୍କ ନାମାଙ୍କନପତ୍ର ଦାଖଲ କରିଛନ୍ତି, କିନ୍ତୁ ଜଣେ ସ୍ବାଧୀନ ପ୍ରାର୍ଥୀ ଚର୍ଚ୍ଚାକୁ ଆସିଛନ୍ତି। ଏହି ପ୍ରାର୍ଥୀ ଅନ୍ୟମାନଙ୍କଠାରୁ ଟିକିଏ ଅଲଗା।
ଏହି ପ୍ରାର୍ଥୀଙ୍କ ନାମ ପଦ୍ମରାଜନ। ଗଜୱେଲ ନିର୍ବାଚନମଣ୍ଡଳୀରୁ ଜଣେ ସ୍ବାଧୀନ ପ୍ରାର୍ଥୀ ଭାବେ ପଦ୍ମରାଜନ ତାଙ୍କ ନାମାଙ୍କନପତ୍ର ଦାଖଲ କରିଛନ୍ତି। ଏଠାରେ ତାଙ୍କର ପ୍ରତିଯୋଗିତା ରାଜ୍ୟ ମୁଖ୍ୟମନ୍ତ୍ରୀ ଏବଂ ବିଆର୍ଏସ୍ ମୁଖ୍ୟ କେ ଚନ୍ଦ୍ରଶେଖର ରାଓଙ୍କ ସହ ହେବ। ନାମାଙ୍କନ ଦାଖଲ କରିବା ପରେ ପଦ୍ମରାଜଜ ମଧ୍ୟ ନିର୍ବାଚନ ପ୍ରଚାର ଆରମ୍ଭ କରିଛନ୍ତି।
ପଦ୍ମରାଜନ ନିର୍ବାଚନ କିଙ୍ଗ ଭାବରେ ଜଣାଶୁଣା, ସାରା ଦେଶରେ ୨୩୬ଟି ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିଛନ୍ତି। ପଦ୍ମରାଜ କହିଛନ୍ତି ଯେ, ତାମିଲନାଡୁ, କର୍ନାଟକ, ୟୁପି ଏବଂ ଦିଲ୍ଲୀ ଭଳି ରାଜ୍ୟରେ ସ୍ଥାନୀୟ ସଂସ୍ଥା ଠାରୁ ରାଷ୍ଟ୍ରପତି ନିର୍ବାଚନ ସମେତ ଏହା ତାଙ୍କର ୨୩୭ ତମ ନାମାଙ୍କନ ପତ୍ର ଦାଖଲ। ଲୋକମାନେ ମଧ୍ୟ ତାଙ୍କୁ ଭେଟି ଫଟୋ ନିଅନ୍ତି।
ଟାୟାର ମରାମତି ଦୋକାନ ଚଳାଉଥିବା ପଦ୍ମରାଜନ କହିଛନ୍ତି, ୧୯୮୮ରେ ତାମିଲନାଡୁ ବିଧାନସଭା ନିର୍ବାଚନ ସମୟରେ ସେ ମେଟୁର ନିର୍ବାଚନମଣ୍ଡଳୀରୁ ପ୍ରଥମ ଥର ପାଇଁ ନାମାଙ୍କନ ଦାଖଲ କରିଥିଲେ। ସେବେଠାରୁ ଏହି ଧାରା ଜାରି ରହିଛି। ସେ ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀ ଏବଂ ପିଭି ନରସିଂହ ରାଓଙ୍କ ବିରୋଧରେ ନିର୍ବାଚନରେ ମଧ୍ୟ ପ୍ରତିଦ୍ୱନ୍ଦ୍ୱିତା କରିଛନ୍ତି।
ପଦ୍ମରାଜନ କହିଛନ୍ତି, ସେ ଜଣେ ହୋମିଓପାଥିକ ଡାକ୍ତର ମଧ୍ୟ। ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବା ପାଇଁ ସେ ଅନେକ ରେକର୍ଡ ସୃଷ୍ଟି କରିଛନ୍ତି। ବର୍ତ୍ତମାନ ପର୍ଯ୍ୟନ୍ତ ସେ ଏହି ଆଗ୍ରହ ପାଇଁ ପ୍ରାୟ ୧ କୋଟି ଟଙ୍କା ଖର୍ଚ୍ଚ କରିଛନ୍ତି। ସେ ମଧ୍ୟ ଏସିଆର ପୂର୍ବତନ ମୁଖ୍ୟ ରାହୁଲ ଗାନ୍ଧୀଙ୍କ ବିରୋଧରେ କେରଳର ୱାୟାନାଡରୁ ୨୦୧୯ ସାଧାରଣ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିଥିଲେ। ଏତେ ସଂଖ୍ୟକ ନିର୍ବାଚନରେ ସେ ୨୦୧୧ ତାମିଲନାଡୁ ବିଧାନସଭା ନିର୍ବାଚନରେ ମେଟୁର ନିର୍ବାଚନମଣ୍ଡଳୀରୁ ସର୍ବାଧିକ ୬୨୭୩ ଖଣ୍ଡ ଭୋଟ ପାଇଲେ। ଏଥି ସହିତ ସେ କିଛି ପଞ୍ଚାୟତ ନିର୍ବାଚନରେ ଗୋଟିଏ ବି ଭୋଟ ପାଇନାହାଁନ୍ତି।
