ଚେନ୍ନାଇ,୮।୧୦: ଦିନିକିଆ ବିଶ୍ୱକପ ୨୦୨୩ର ପ୍ରଥମ ମ୍ୟାଚରେ ଭାରତୀୟ କ୍ରିକେଟ୍ ଦଳ ଏକ ଲଜ୍ଜାଜନକ ରେକର୍ଡ କରିଛି। ଚେନ୍ନାଇର ଚେପକ ଷ୍ଟାଡିୟମରେ ଅଷ୍ଟ୍ରେଲିଆ ବିପକ୍ଷରେ ଖେଳାଯାଇଥିବା ଏହି ମ୍ୟାଚରେ ଉଭୟ ଭାରତୀୟ ଓପନର୍ ଖାତା ଖୋଲି ପାରି ନ ଥିଲେ। ଅଷ୍ଟ୍ରେଲୀୟ ଦ୍ରୁତ ବୋଲର ମିଚେଲ ଷ୍ଟାର୍କ ଏବଂ ଜୋଶ ହାଜଲେଉଡ ଭାରତୀୟ ଓପନରଙ୍କୁ ଆଉଟ୍ କରିଥିଲେ। ବିଶ୍ୱକପରେ ୪୦ ବର୍ଷ ପରେ ଭାରତର ଉଭୟ ଓପନିଂ ବ୍ୟାଟ୍ସମ୍ୟାନ ଶୂନ୍ୟରେ ଆଉଟ୍ ହୋଇଛନ୍ତି। ଏହା ପୂର୍ବରୁ ୧୯୮୩ ବିଶ୍ୱକପରେ ଘଟିଥିଲା।
ଆଜିର ମ୍ୟାଚରେ ଇଶାନ କିଶନ ଅଧିନାୟକ ରୋହିତ ଶର୍ମାଙ୍କ ସହ ଭାରତ ପାଇଁ ଖୋଲିବାକୁ ଆସିଥିଲେ। ଇଶାନ କିଶନ ଇନିଂସର ପ୍ରଥମ ଓଭରରେ ମିଚେଲ ଷ୍ଟାର୍କଙ୍କ ଦ୍ୱାରା ଶୂନରେ ଆଉଟ ହୋଇଥିଲେ। ଏହା ପରେ ଇନିଂସର ଦ୍ୱିତୀୟ ଓଭରରେ ରୋହିତ ଶର୍ମା ଖାତା ନ ଖୋଲି ଜୋଶ ହାଜଲେଉଡଙ୍କ ଶିକାର ହୋଇଥିଲେ। ୫ଟି ବଲ ଖେଳିବା ପରେ ରୋହିତ ଶର୍ମା ଷଷ୍ଠ ବଲରେ ଆଉଟ ହୋଇଥିଲେ।
ଏହା ପୂର୍ବରୁ ୧୯୮୩ ବିଶ୍ୱକପରେ ଭାରତୀୟ ଓପନର୍ ଜିମ୍ବାୱେ ବିପକ୍ଷ ମ୍ୟାଚରେ ଆକାଉଣ୍ଟ ନ ଖୋଲି ପ୍ୟାଭିଲିୟନକୁ ଫେରିଥିଲେ। ଜିମ୍ବାୱେ ବିପକ୍ଷ ମ୍ୟାଚରେ ସୁନୀଲ ଗାଭାସ୍କର ଏବଂ କେ ଶ୍ରୀକାନ୍ତ ଭାରତ ପାଇଁ ଖୋଲିବାକୁ ଆସିଥିଲେ। ଦ୍ୱିତୀୟ ବଲରେ ଆକାଉଣ୍ଟ ଖୋଲିବା ପରେ ଗାଭାସ୍କର ଫେରିଥିଲେ ଏବଂ ଶ୍ରୀକାନ୍ତ ୧୩ତମ ବଲରେ ଶୂନ ସ୍କୋରରେ ପ୍ୟାଭିଲିୟନକୁ ଫେରିଥିଲେ।
