ମନ୍ଦିରରେ ସମସ୍ତେ ଧୂପ, ଦୀପ ଜଳାଇ କଦଳୀ, ନଡିଆ, ମିଠା ଆଦି ପ୍ରସାଦ ଲଗାନ୍ତି। କିନ୍ତୁ ଆମେ ଏଠାରେ ଯେଉଁ ମନ୍ଦିର କଥା କହୁଛୁ ସେଠି ପ୍ରସାଦଭାବେ ଚଢ଼ାଯାଏ ଗାଡ଼ିର ପାର୍ଟସ୍, ଗାଡ଼ିର ନମ୍ବର ପ୍ଲେଟ୍, ଘରର ପୁରୁଣା ହତିଆର ଆଦି। ଉକ୍ତ ମନ୍ଦିର ହିମାଚଳ ପ୍ରଦେଶର ମଗରୁଲା ନାମକ ଦୁର୍ଗମ ଅଞ୍ଚଳରେ ରହିଛି। ଏଠାରେ ‘ବନଶୀରା ଦେବତା’ଙ୍କ ପୂଜା କରାଯାଏ, ଯାହାଙ୍କୁ କି ଜଙ୍ଗଲର ଦେବତା କୁହାଯାଏ। ସେଥିପାଇଁ ମନ୍ଦିରଟି ଜଙ୍ଗଲ ମଝିରେ ରହିଛି। ଏହି ମନ୍ଦିରର ନା ଛାତ ଅଛି, ନା ପୂଜା କରିବା ପାଇଁ କୌଣସି ପୂଜାରୀ। ଏହି ମନ୍ଦିର ଓ ତନ୍ମଧ୍ୟସ୍ଥ ଦେବତାଙ୍କ ଇତିହାସର କୌଣସି ପ୍ରମାଣ ନାହିଁ। କିନ୍ତୁ କାହିଁ କେଉଁ କାଳରୁ ଏହି ଦେବତା ଏଠାରେ ଅବସ୍ଥାନ କରିଛନ୍ତି। ନିକଟସ୍ଥ ମଗରୁ ମହାଦେବ ମନ୍ଦିରର ପୂଜାରୀ ହେତରାମ କହନ୍ତି, ପ୍ରାଚୀନ ସମୟରୁ ହିଁ ଲୋକେ ଏଠାରେ ନିଜ ଘରର ପୁରୁଣା ହତିଆର ଚଢ଼ାଇ ଆସୁଛନ୍ତି। କାଳକ୍ରମେ ଏଠାରେ ଗାଡ଼ିର ପାର୍ଟସ୍ ଓ ନମ୍ବର ପ୍ଲେଟ୍ ଚଢ଼ାଇବା ବି ସାମିଲ ହୋଇଗଲା। ବିଶ୍ୱାସ କରାଯାଏ ଏଭଳି କଲେ ସେହି ବସ୍ତୁ ଉପରେ ଦେବତାଙ୍କ କୃପା ଦୃଷ୍ଟି ପଡିଥାଏ ଓ ସଙ୍କଟ ବି ଆସି ନ ଥାଏ। ମନ୍ଦିର ପରିସରରେ ଥିବା ହଜାର ହଜାର ଗାଡି ପାର୍ଟସ୍ ଓ ନମ୍ବର ପ୍ଲେଟ୍କୁ ଦେଖିଲେ ହିଁ ଜଣାପଡ଼ିଯାଏ ଲୋକଙ୍କର ଏହି ଦେବତାଙ୍କ ଉପରେ କେତେ ଆସ୍ଥା ରହିଛି। ମନ୍ଦିର ବାଟ ଦେଇ ଯଦି କେଉଁ ଗାଡ଼ି ଯାଏ, ଗାଡ଼ି ଚାଳକ ଗାଡି ଅଟକାଇ ନିଶ୍ଚୟ ପ୍ରଣାମ କରନ୍ତି। ଜଣେ ଶ୍ରଦ୍ଧାଳୁ କହନ୍ତି, ଯଦି ଗାଡ଼ିର କୌଣସି ପାର୍ଟସ୍ ବାରମ୍ବାର ଖରାପ ହେଉଛି, ତେବେ ତାକୁ ଏହି ମନ୍ଦିରରେ ପ୍ରସାଦ ରୂପେ ଚଢ଼ାଇଲେ ସେହି ପାର୍ଟ ଆଉ ଖରାପ ହୁଏ ନାହିଁ। ଗାଡ଼ିର ନମ୍ବର ପ୍ଲେଟ ଏଥିପାଇଁ ଏଠାରେ ରଖାଯାଏ, ଯେମିତିକି ସେହି ଗାଡ଼ି ଉପରେ ଦେବତାଙ୍କ ଶୁଭ ଦୃଷ୍ଟି ରହିବ।
