ନୂଆଦିଲ୍ଲୀ,୧୦।୨: ନିଜର ଅପ୍ରକାଶିତ ବହିକୁ ନେଇ ବିବାଦ ଜୋର ଧରିବା ପରେ ମୁହଁ ଖୋଲିଛନ୍ତି ପୂର୍ବତନ ସ୍ଥଳସେନା ମୁଖ୍ୟ ଜେନେରାଲ ଏମ୍.ଏମ୍. ନରଭାଣେ। ତାଙ୍କର ଏହି ଆତ୍ମଜୀବନୀ ‘ଫୋର୍ ଷ୍ଟାର୍ସ ଅଫ୍ ଡେଷ୍ଟିନି’କୁ ନେଇ ସଂସଦରୁ ରାଜପଥ ପର୍ଯ୍ୟନ୍ତ ବିବାଦ ତେଜିବାରେ ଲାଗିଛି। ଏହି ପ୍ରସଙ୍ଗରେ ପବ୍ଲିଶର ସଂସ୍ଥା ‘ପେଙ୍ଗୁଇନ୍ ରାଣ୍ଡମ ହାଉସ୍ ଇଣ୍ଡିଆ’ ପକ୍ଷରୁ ସ୍ପଷ୍ଟୀକରଣ ଜାରି ହେବା ପରେ ଏବେ ଜେନେରାଲ ନରଭାଣେ ନିଜେ ନୀରବତା ଭାଙ୍ଗିଛନ୍ତି।
ପେଙ୍ଗୁଇନ୍ ପକ୍ଷରୁ କୁହାଯାଇଛି ଯେ, ଏହି ପୁସ୍ତକର ସମସ୍ତ ପ୍ରକାଶନ ଅଧିକାର ସେମାନଙ୍କ ପାଖରେ ସଂରକ୍ଷିତ ଅଛି। କିନ୍ତୁ ବର୍ତ୍ତମାନ ସୁଦ୍ଧା ବହିଟି କୌଣସି ବି ଆକାରରେ (ମୁଦ୍ରିତ କିମ୍ବା ଡିଜିଟାଲ୍) ପ୍ରକାଶିତ ହୋଇନାହିଁ।
ପ୍ରକାଶକଙ୍କ ଏହି ବୟାନକୁ ସୋସିଆଲ ମିଡିଆରେ ସେୟାର କରି ଜେନେରାଲ ନରଭାଣେ ଲେଖିଛନ୍ତି, “ଏହା ହିଁ ପୁସ୍ତକର ସ୍ଥିତି”। ଏହା ଜରିଆରେ ସେ ପରୋକ୍ଷରେ ସ୍ୱୀକାର କରିଛନ୍ତି ଯେ ବହିଟି ଏପର୍ଯ୍ୟନ୍ତ ବଜାରକୁ ଆସିନାହିଁ।
ବର୍ତ୍ତମାନ ସୋସିଆଲ ମିଡିଆ ବା PDF ଆକାରରେ ବୁଲୁଥିବା ବହିର ଯେକୌଣସି ଅଂଶ ବେଆଇନ ଏବଂ କପିରାଇଟ୍ ନିୟମର ଉଲ୍ଲଂଘନ ବୋଲି ପ୍ରକାଶକ ଚେତାବନୀ ଦେଇଛନ୍ତି। ଏହି ମାମଲାରେ ଦିଲ୍ଲୀ ପୋଲିସ ଏକ FIR ରୁଜୁ କରି ତଦନ୍ତ ଆରମ୍ଭ କରିଛି।
ଏହି ବିବାଦ ସେତେବେଳେ ଉଗ୍ର ରୂପ ନେଇଥିଲା, ଯେତେବେଳେ କଂଗ୍ରେସ ନେତା ରାହୁଲ ଗାନ୍ଧୀ ସଂସଦ ପରିସରରେ ଏହି ବହିର ଏକ କପି ଦେଖାଇଥିଲେ। ରାହୁଲ ଗାନ୍ଧୀ ଦାବି କରିଛନ୍ତି ଯେ, ଏହି ବହିରେ ୨୦୨୦ ଭାରତ-ଚାଇନା ସୀମା ବିବାଦ (ଲଦାଖ) ସମୟର ସାଂଘାତିକ ସତ୍ୟ ଲୁଚି ରହିଛି, ଯାହାକୁ ସରକାର ଚାପି ଦେବାକୁ ଚାହୁଁଛନ୍ତି।
ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଏବଂ ଗୃହମନ୍ତ୍ରୀ ଅମିତ ଶାହ ସଂସଦରେ ଏହାକୁ ବିରୋଧ କରିଛନ୍ତି। ସେମାନଙ୍କ କହିବା କଥା, ଯେଉଁ ବହି ଏପର୍ଯ୍ୟନ୍ତ ପ୍ରକାଶିତ ହୋଇନାହିଁ ଏବଂ ଯାହାର ସତ୍ୟତା ପ୍ରମାଣିତ ହୋଇନାହିଁ, ତାହାକୁ ଆଧାର କରି ଗୃହରେ କୌଣସି ଆଲୋଚନା ହୋଇପାରିବ ନାହିଁ।
ସୂଚନାଯୋଗ୍ୟ ଯେ, ସେନା ଅଧିକାରୀଙ୍କ ଦ୍ୱାରା ଲିଖିତ ପୁସ୍ତକ ପ୍ରକାଶନ ପୂର୍ବରୁ ପ୍ରତିରକ୍ଷା ମନ୍ତ୍ରଣାଳୟର ଅନୁମତି ଆବଶ୍ୟକ ହୋଇଥାଏ, ଯାହା ଏହି ବହି କ୍ଷେତ୍ରରେ ଏପର୍ଯ୍ୟନ୍ତ ବିଚାରଧୀନ ରହିଛି।
