ଭୁବନେଶ୍ୱର: ବଡ଼ଦିନ ବା ଖ୍ରୀଷ୍ଟମାସ ଅବସରରେ ରାଜଧାନୀ ଭୁବନେଶ୍ୱରର ଏବଂ ଶ୍ରୀକ୍ଷେତ୍ର ପୁରୀର ରାସ୍ତା କଡ଼ରେ ସାନ୍ତା କ୍ଲଜ୍ ଟୋପି ଓ ଅନ୍ୟାନ୍ୟ ସାମଗ୍ରୀ ବିକ୍ରି କରୁଥିବା ବେପାରୀଙ୍କୁ କିଛି ବ୍ୟକ୍ତି ଦୁର୍ବ୍ୟବହାର ଏବଂ ହଇରାଣ କରିଥିବା ଅଭିଯୋଗ ହୋଇଛି। ଏହି ସମ୍ପର୍କିତ ଏକ ଭିଡିଓ ବର୍ତ୍ତମାନ ସୋସିଆଲ ମିଡିଆରେ ବେଶ୍ ଭାଇରାଲ ହେବାରେ ଲାଗିଛି।
ଭାଇରାଲ ଭିଡିଓରେ ଦେଖିବାକୁ ମିଳିଛି ଯେ, ଏକ ସଫେଦ ରଙ୍ଗର କାର୍ରୁ କିଛି ବ୍ୟକ୍ତି ଓହ୍ଲାଇ ରାସ୍ତା କଡ଼ରେ ଟୋପି ବିକ୍ରି କରୁଥିବା ବେପାରୀଙ୍କ ଉପରେ ଚିଲାଉଛନ୍ତି। ଖ୍ରୀଷ୍ଟମାସ ସାମଗ୍ରୀ ବିକ୍ରିକୁ ସେମାନେ ତୀବ୍ର ବିରୋଧ କରିବା ସହ ତୁରନ୍ତ ସେଠାରୁ ଚାଲିଯିବାକୁ ଧମକ ଦେଇଥିଲେ।
ସମ୍ପୃକ୍ତ ବ୍ୟକ୍ତିମାନେ ଓଡ଼ିଶାକୁ ଏକ ‘ହିନ୍ଦୁ ରାଷ୍ଟ୍ର’ ବୋଲି ଦର୍ଶାଇ ଏଠାରେ ଅନ୍ୟ ଧର୍ମର ସାମଗ୍ରୀ ବିକ୍ରି କରାଯାଇପାରିବ ନାହିଁ ବୋଲି କହିଥିଲେ। ହିନ୍ଦୀ ଏବଂ ଓଡ଼ିଆ ଭାଷାରେ ଗାଳିଗୁଲଜ କରିବା ସହ “ଯଦି ଗରିବ, ତେବେ ମହାପ୍ରଭୁ ଜଗନ୍ନାଥଙ୍କ ସାମଗ୍ରୀ ବିକ୍ରି କର, ଖ୍ରୀଷ୍ଟମାସ ସାମଗ୍ରୀ କାହିଁକି?” ବୋଲି ପ୍ରଶ୍ନ କରିଥିଲେ।
ହଇରାଣର ଶିକାର ହୋଇଥିବା ବେପାରୀମାନେ ନିଜକୁ ରାଜସ୍ଥାନର ବୋଲି ପରିଚୟ ଦେବା ସହ ସେମାନେ ହିନ୍ଦୁ ଏବଂ କେବଳ ପେଟ ପୋଷିବା ପାଇଁ ଏହି ସବୁ ବିକ୍ରି କରୁଥିବା କହିଥିଲେ। ଏହି ଘଟଣା ସମୟରେ ଜଣେ ମହିଳା ବେପାରୀ ମଧ୍ୟ ସେଠାରେ ଉପସ୍ଥିତ ଥିଲେ। ସମ୍ପୃକ୍ତ ଯୁବକମାନେ ବେପାରୀଙ୍କୁ ଏଭଳି ସାମଗ୍ରୀ ବିକ୍ରି ପାଇଁ ପ୍ରଶାସନର ଅନୁମତି ନେବାକୁ କହିଥିଲେ। ଏହି ଘଟଣାଟି ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।
