ନୂଆଦିଲ୍ଲୀ,୩।୩: ଭାରତ ଏବଂ ନ୍ୟୁଜିଲାଣ୍ଡ ୨ ମାର୍ଚ୍ଚରେ ଦୁବାଇରେ ଚାମ୍ପିଅନ୍ସ ଟ୍ରଫି ୨୦୨୫ରେ ମୁହାଁମୁହିଁ ହେବେ। ଯଦିଓ ଉଭୟ ଦଳ ସେମିଫାଇନାଲ ପାଇଁ ଯୋଗ୍ୟତା ଅର୍ଜନ କରିସାରିଥିଲେ, କିନ୍ତୁ ଏହି ମ୍ୟାଚ୍ରେ ଫଳାଫଳ ସ୍ପଷ୍ଟ କରିଦେଇଛି ସେମିଫାଇନାଲରେ କେଉଁ ଦଳ କାହା ସହିତ ମୁକାବିଲା କରିବ। ଭାରତ ନ୍ୟୁଜିଲାଣ୍ଡକୁ ୪୪ ରନରେ ପରାସ୍ତ କରି ଟୁର୍ନାମେଣ୍ଟରେ କ୍ରମାଗତ ତୃତୀୟ ବିଜୟ ହାସଲ କରିଛି ଏବଂ ଗ୍ରୁପ ଏରେ ଶୀର୍ଷ ସ୍ଥାନ ଅଧିକାର କରିଛି। ଏହା ସହିତ ଏହା ସ୍ଥିର ହୋଇଛି ଯେ, ଏବେ ଟିମ ଇଣ୍ଡିଆ ସେମିଫାଇନାଲରେ ବିଶ୍ୱ ଚାମ୍ପିଅନ ଅଷ୍ଟ୍ରେଲିଆକୁ ଭେଟିବ ଏବଂ ନ୍ୟୁଜିଲାଣ୍ଡ ଦଳ ଦକ୍ଷିଣ ଆଫ୍ରିକାକୁ ଭେଟିବ।
ପ୍ରଥମେ ବ୍ୟାଟିଂ କରି ଟିମ ଇଣ୍ଡିଆ ୫୦ ଓଭରରେ ୯ ଉଇକେଟ ହରାଇ ମାତ୍ର ୨୪୯ ରନ କରିପାରିଥିଲା। ଶ୍ରେୟସ ଆୟର ସର୍ବାଧିକ ୭୯ ରନର ଇନିଂସ ଖେଳିଥିଲେ। ନ୍ୟୁଜିଲାଣ୍ଡ ପାଇଁ ମ୍ୟାଟ ହେନରୀ ଚମତ୍କାର ବୋଲିଂ କରିଥିଲେ ଏବଂ ୫ ଜଣ ଭାରତୀୟ ବ୍ୟାଟସମ୍ୟାନଙ୍କୁ ପ୍ୟାଭିଲିୟନ ପଠାଇଥିଲେ। ମ୍ୟାଟ ହେନରୀ ଯୁବ ଓପନର ଶୁଭମନ ଗିଲ, ବିରାଟ କୋହଲି, ହାର୍ଦ୍ଦିକ ପାଣ୍ଡ୍ୟା, ରବିନ୍ଦ୍ର ଜାଡେଜା ଏବଂ ମହମ୍ମଦ ଶାମିଙ୍କ ଉଇକେଟ ନେଇଥିଲେ। ଭାରତର ୨୪୯ ରନ ଜବାବରେ ନ୍ୟୁଜିଲାଣ୍ଡ ୪୫.୩ ଓଭରରେ ୨୦୫ ରନ କରି ଅଲଆଉଟ ହୋଇଗଲା। ନ୍ୟୁଜିଲାଣ୍ଡ ପାଇଁ କେବଳ କେନ ୱିଲିୟମସନ ଏକ ବଡ଼ ଇନିଂସ ଖେଳିପାରିଥିଲେ। ସେ ୮୧ ରନ କରିଥିଲେ। ନ୍ୟୁଜିଲାଣ୍ଡକୁ ଏତେ କମ ସ୍କୋରରେ ସୀମିତ ରଖିବାରେ ବରୁଣ ଚକ୍ରବର୍ତ୍ତୀ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ବରୁଣ ପ୍ରଥମ ଥର ପାଇଁ ICC ଦିନିକିଆ ଟୁର୍ନାମେଣ୍ଟରେ ଅଂଶଗ୍ରହଣ କରିବା ସମୟରେ ୫ ଉଇକେଟ ନେବାର ମହାନ କୃତିତ୍ୱ ହାସଲ କରିଥିଲେ। ଏହିପରି ଏକଦିବସୀୟ କ୍ରିକେଟ ଇତିହାସରେ ଏକ ନୂତନ ରେକର୍ଡ ସୃଷ୍ଟି ହେଲା।
ବରୁଣ ଚକ୍ରବର୍ତ୍ତୀ ୧୦ ଓଭରରେ ୪୨ ରନ ଦେଇ ୫ଟି ଉଇକେଟ ନେଇଥିଲେ। ସେହି ସମୟରେ ମ୍ୟାଟ ହେନରୀ ମଧ୍ୟ ୮ ଓଭରରେ ୪୨ ରନ ଦେଇ ୫ ଜଣ ଭାରତୀୟ ବ୍ୟାଟସମ୍ୟାନଙ୍କୁ ଆଉଟ କରିଥିଲେ। ଏହିପରି ଏକଦିବସୀୟ କ୍ରିକେଟ ଇତିହାସରେ ଏକ ଆଶ୍ଚର୍ଯ୍ୟଜନକ ରେକର୍ଡ ସୃଷ୍ଟି ହୋଇଛି। ଦିନିକିଆ କ୍ରିକେଟରେ ଏହା ପ୍ରଥମ ଥର ପାଇଁ ଘଟିଛି, ଗୋଟିଏ ମ୍ୟାଚ୍ରେ ଦୁଇଜଣ ବୋଲର ସମାନ ରନ ଦେଇଥିଲେ ଏବଂ ସମାନ ଉଇକେଟ ନେଇଥିଲେ। ବରୁଣ ଏବଂ ହେନରୀ ଉଭୟେ ୪୨ ରନ ଦେଇ ୫ଟି ଲେଖାଏ ଉଇକେଟ ନେଇଥିଲେ। ଏପର୍ଯ୍ୟନ୍ତ ୪୮୫୨ଟି ଦିନିକିଆ ମ୍ୟାଚ ଖେଳାଯାଇଛି ଏବଂ ପ୍ରଥମ ଥର ପାଇଁ କୌଣସି ମ୍ୟାଚ୍ରେ ଏପରି ଅନନ୍ୟ ଦୃଶ୍ୟ ଦେଖିବାକୁ ମିଳିଛି।
ଚାମ୍ପିଅନ୍ସ ଟ୍ରଫି ୨୦୨୫ର ପ୍ରଥମ ସେମିଫାଇନାଲ ମ୍ୟାଚ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ୪ ମାର୍ଚ୍ଚରେ ଦୁବାଇ ନ୍ୟାଶନାଲ୍ ଷ୍ଟାଡିୟମରେ ଖେଳାଯିବ। ନ୍ୟୁଜିଲାଣ୍ଡ ଏବଂ ଦକ୍ଷିଣ ଆଫ୍ରିକା ୫ ମାର୍ଚ୍ଚରେ ଲାହୋରର ଗଦ୍ଦାଫି ଷ୍ଟାଡିୟମରେ ଦ୍ୱିତୀୟ ସେମିଫାଇନାଲରେ ପରସ୍ପରକୁ ମୁହାଁମୁହିଁ ହେବେ।
