ନୂଆଦିଲ୍ଲୀ,୧୯।୪: ଶୁକ୍ରବାର ପ୍ରଥମ ପର୍ଯ୍ୟାୟ ମତଦାନ ଚାଲିଛି। ଏହି ପରିପ୍ରେକ୍ଷୀରେ ୧୦୨ଟି ଲୋକସଭା ଆସନ ପାଇଁ ଭୋଟ ଗ୍ରହଣ ହେଉଥିବା ବେଳେ ବିହାରର ୪ଟି ଲୋକସଭା ପାଇଁ ମଧ୍ୟ ମତଦାନ ହେଉଛି। ବିହାରର ଗୟା, ଔରଙ୍ଗାବାଦ, ନବାଦା ଓ ଜମୁଇ ଲୋକସଭା ଆସନ ପାଇଁ ମତଦାନ ହେଉଛି। ଅଧିକରୁ ଅଧିକ ଭୋଟର ବୁଥକୁ ଆସି ମତଦାନ କରିବାକୁ ପ୍ରାର୍ଥୀମାନେ ନିବେଦନ କରିଛନ୍ତି।
ଏଭଳି ସ୍ଥିତିରେ ରାଷ୍ଟ୍ରୀୟ ଜନତାନ୍ତ୍ରିକ ମେଣ୍ଟ ପକ୍ଷରୁ ଭାଜପାର ଜଣେ ପ୍ରାର୍ଥୀ, ଲୋକ ଜନଶକ୍ତିର ପାର୍ଟିର ଜଣେ ପ୍ରାର୍ଥୀ, ମହାମେଣ୍ଟ ପକ୍ଷରୁ ରାଷ୍ଟ୍ରୀୟ ଜନତାଦଳର ୨ଜଣ ଏମ୍ପି ପ୍ରାର୍ଥୀ ଭୋଟ ଦେଇପାରିବେ ନାହିଁବୋଲି ଜଣାପଡିଛି। ୫ଜଣ ପ୍ରାର୍ଥୀଙ୍କ ମଧ୍ୟରୁ ଶୁକ୍ରବାର ୪ ଜଣ ପ୍ରାର୍ଥୀଙ୍କ ଆସନରେ ଭୋଟ ହେଉଛି ।
ବିହାରର ପୂର୍ବତନ ମୁଖ୍ୟମନ୍ତ୍ରୀ ଜିତନ ରାମ ମାଞ୍ଝୀ ଏନ୍ଡିଏ ମେଣ୍ଟରୁ ଗୟା ଲୋକସଭା ଆସନରୁ ପ୍ରତିଦ୍ୱନ୍ଦିତା କରୁଛନ୍ତି । ହେଲେ ମାଞ୍ଝୀ ନିଜେ ଗୟା ଲୋକସଭା ଆସନର ଭୋଟର ନୁହଁନ୍ତି । ଫଳରେ ସେ ଆଜି ନିଜକୁ ଭୋଟ ଦେଇପାରିନାହଁନ୍ତି । ସେହିପରି ନାବାଦା ଲୋକସଭା ଆସନରୁ ଭାଜପା ଟିକେଟରୁ ପ୍ରାର୍ଥୀ ହୋଇଥିବା ବିବେକ ଠାକୁର ମଧ୍ୟ ଭୋଟ ଦେଇପାରିବେ ନାହିଁ । ବିବେକ ଠାକୁର ନିଜେ ପାଟନା ସାହିବ ଲୋକସଭା ଆସନର ଭୋଟର । ଅନ୍ୟପକ୍ଷେ ଲୋକ ଜନଶକ୍ତିର ପାର୍ଟିର ମୁଖ୍ୟ ଚିରାଗ ପାସୱାନଙ୍କ ଭିଣୋଇ ଅରୁଣ ଭାରତୀ ଜମୁଇ ଲୋକସଭା ଆସନରୁ ପ୍ରାର୍ଥୀ ହୋଇଛନ୍ତି । ହେଲେ ସେ ପାଟଳିପୁତ୍ର ସଂସଦୀୟ କ୍ଷେତ୍ରର ଭୋଟର ହୋଇଥିବାରୁ ସେ ମଧ୍ୟ ଭୋଟ ଦେଇପାରିବେ ନାହିଁ।
ଆର୍ଜେଡି ପକ୍ଷରୁ ଜମୁଇ ଆସନରୁ ପ୍ରାର୍ଥୀ ହୋଇଥିବା ଅର୍ଚ୍ଚନା ରବିଦାସ ମୁଙ୍ଗେର ସଂସଦୀୟ କ୍ଷେତ୍ରର ଭୋଟର ହୋଇଥିବାରୁ ସେ ମଧ୍ୟ ଭୋଟ ଦେଇପାରିବେ ନାହିଁ। ସେହିଭଳି ଔରଙ୍ଗାବାଦ ଲୋକସଭା ଆସନରୁ ଆରଜେଡି ଟିକେଟରୁ ପ୍ରାର୍ଥୀ ହୋଇଥିବା ଅଭୟ କୁଶୱାହା ମଧ୍ୟ ଭୋଟ ଦେଇପାରିବେ ନାହିଁ । ସେ ଗୟା ଲୋକସଭା ଆସନର ଭୋଟର।
