ଲୋଇସିଂହା,୧୦।୨(ସୁଶାନ୍ତ ବାରିକ):ବଲାଙ୍ଗୀର ଜିଲା ଲୋଇସିଂହା ବ୍ଲକ ସଭାଗୃହରେ ରବିବାର ନବଗଠିତ ଲୋଇସିଂହା ଏନ୍ଏସି ସୀମା ନିର୍ଦ୍ଧରଣ ପାଇଁ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ପ୍ରଶାସନ ପକ୍ଷରୁ ଆହୂତ ଉକ୍ତ ବୈଠକରେ ସ୍ଥାନୀୟ ବିଧାୟକ ତଥା ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡ.ମୁକେଶ ମହାଲିଙ୍ଗ ଯୋଗ ଦେଇଥିଲେ। ବୈଠକରେ ଏନଏସି ଦାୟିତ୍ୱରେ ଥିବା ପ୍ରଥମ କାର୍ଯ୍ୟନିର୍ବାହୀ ଅଧିକାରୀ ତଥା ବିଡିଓ ଅକ୍ଷୟ ପାଣି ଉଦ୍ଦୁଙ୍କ ଅନୁପସ୍ଥିତିରେ ତହସିଲଦାର ଟିକୁନୁ ପୁଟା, ବ୍ଲକ ଅଧ୍ୟକ୍ଷ ଯତୀନ୍ଦ୍ର ପଟେଲ ମଞ୍ଚାସୀନ ଥିଲେ। ଏବିଡିଓ କିଶୋର ମାନସିଂ, ଲୋଇସିଂହା, ବୁର୍ଡା, ହୀରାପୁର ସରପଞ୍ଚଙ୍କ ସମେତ ଏନଏସି ଅଧୀନ ଗ୍ରାମର ବୁଦ୍ଧିଜୀବୀ ଓ ଆଞ୍ଚଳିକ ବିକାଶ ପରିଷଦର ସଦସ୍ୟ ଉପସ୍ଥିତ ଥିଲେ। ପ୍ରାରମ୍ଭରେ ଏବିଡିଓ ମାନସିଂ ସ୍ବାଗତ ଅଭିଭାଷଣ ରଖିବା ସହିତ ଏନଏସି ସୀମା ନିର୍ଦ୍ଧରଣ ସମ୍ପର୍କରେ ସୂଚନା ପ୍ରଦାନ କରିଥିଲେ। ଲୋଇସିଂହା, ବୁର୍ଡା ପଞ୍ଚାୟତର ସମସ୍ତ ଗାଁ ଓ ହୀରାପୁର ପଞ୍ଚାୟତର ପନେସରା ଓ ସେମେଲମୁଣ୍ଡା ଏପରି ଭାବେ ୧୦ ଖଣ୍ଡ ଗାଁକୁ ନେଇ ଏନଏସି ଗଠିତ ହୋଇଛି। ୨୦୧୧ ଜନଗଣନାକୁ ଆଧାର କରି ଏହି ଏନଏସି ଗଠିତ ହୋଇଛି। ଏନଏସି ଅଧୀନ ଜନସଂଖ୍ୟା ୧୪ ହଜାର ୩୮୧ ରହିଥିବା ବେଳେ ୧୧ ହଜାର ୩୧୪ ଜଣ ଭୋଟର ଥିବା ଏବିଡିଓ ମାନସିଂ ସୂଚନା ଦେଇଥିଲେ। ମନ୍ତ୍ରୀ ମହାଲିଙ୍ଗ କହିଥିଲେ, ଦୀର୍ଘ ଗୋଟିଏ ଦଶନ୍ଧିର ଆନ୍ଦୋଳନ ସଫଳ ହୋଇଛି। ଜିଲାରେ ଏକମାତ୍ର ଏବଂ ଲୋଇସିଂହା ଏନଏସି ନାମରେ ପ୍ରଥମ ବୈଠକ ହୋଇଥିବାରୁ ସେ ଖୁସିବ୍ୟକ୍ତ କରିଥିଲେ। ନୂତନ ଏନଏସିରେ ୧୩ ଟି ୱାର୍ଡ ପାଇଁ ସରକାର ପରିକଳ୍ପନା କରିଥିବା ନେଇ ମନ୍ତ୍ରୀ ମହାଲିଙ୍ଗ ସୂଚନା ଦେଇଥିଲେ। ମ୍ୟୁନସିପାଲିଟି ଡାଇରେକ୍ଟରଙ୍କ ନିର୍ଦ୍ଦେଶ କ୍ରମେ ନିର୍ଦ୍ଦେଶାନାମର ୬ ମାସ ମଧ୍ୟରେ ଏନଏସି ନିର୍ବାଚନ ଅନୁଷ୍ଠିତ ହେବାକୁ ଯାଉଛି। ଏଣୁ ସୀମା ନିର୍ଦ୍ଧାରଣ ପାଇଁ ପ୍ରଶାସନ ପକ୍ଷରୁ ଉକ୍ତ ବୈଠକ ଆହୂତ କରାଯାଇ ବୁଦ୍ଧିଜୀବୀଙ୍କ ମତାମତ ଲୋଡା ଯାଉଛି।
ମତାମତକୁ ଆଧାର କରି ଅଧିକାରୀମାନେ କ୍ଷେତ୍ର ପରିଦର୍ଶନ କରିବା ସହ ଜନସାଧାରଣଙ୍କ ସୁବିଧା ମୁତାବକ ୱାର୍ଡ ଗଠନ କରାଯିବ। ସମସ୍ତଙ୍କ ସହଯୋଗ ହେଲେ ଏକ ଉନ୍ନତ ଏନଏସି ଗଠନ ହୋଇ ପାରିବ। ସ୍ଥାନୀୟ ପ୍ରତିନିଧି ଭାବରେ ମଧ୍ୟ ତାଙ୍କ ଉତ୍ତର ଦାୟିତ୍ୱ ରହିଥିବା ମନ୍ତ୍ରୀ ମହାଲିଙ୍ଗ ପ୍ରକାଶ କରିଥିଲେ। ୨୦୨୭ ଫେବୃଆରୀରୁ ଜନଗଣନା କରାଯିବ। ଏବେ ଭୋଟ ତାଲିକା ସଂଶୋଧନ କାର୍ଯ୍ୟ ଚାଲିଥିବା ନେଇ ମନ୍ତ୍ରୀ ସୂଚନା ଦେଇଥିଲେ। ଆଇନଜୀବୀ ଦିଲୀପ କୁମାର ବେହେରା, ପ୍ରଶାନ୍ତ ବେହେରା, ଅଶୋକ ସାହୁ, ସହଦେବ ସା, ବିମଳେନ୍ଦୁ ସାହୁ, ନୟୁ ଖାନଙ୍କ ସମେତ ସରପଞ୍ଚ ନବକିଶୋର ନାଏକ. ସୁଦୀପ କୁମାର ସା ଓ ରମାକାନ୍ତ ବିଶ୍ୱାଳ ନିଜର ସୁଚିନ୍ତିତ ମତାମତ ରଖିଥିଲେ। ୱାର୍ଡ ପ୍ରତି ୧ ହଜାରରୁ ଊର୍ଦ୍ଧ୍ୱ ଭୋଟର ଥିବା ବେଳେ ଆଗକୁ ଜନଗଣନା ଥିବାରୁ ଏହି ସଂଖ୍ୟା ଢେର ବୃଦ୍ଧି ପାଇବ। ଏଣୁ ଭବିଷ୍ୟତକୁ ଆଖି ଆଗରେ ରଖି ୱାର୍ଡ ସଂଖ୍ୟା ବଢାଇବାକୁ ବୈଠକରେ ମତପ୍ରକାଶ ପାଇଥିଲା। ଏଥିପ୍ରତି ମନ୍ତ୍ରୀ ଆବଶ୍ୟକ ପଦକ୍ଷେପ ନେବାକୁ ନିବେଦନ କରାଯାଇଥିଲା। ଆଗାମୀ ଦିନରେ ଏନଏସି କାର୍ଯ୍ୟାଳୟ ଓ ସୀମା ନିର୍ଦ୍ଧାରଣକୁ ନେଇ ମୁହାଁମୁହିଁ ପରିସ୍ଥିତି ହେବାର ଆଶଙ୍କା ଥିବା ଉକ୍ତ ବୈଠକରୁ ଆଭାସ ମିଳିଥିଲା ା
Dharitri – Odisha’s No.1 Odia Daily
