ମସ୍କୋ, ୨୧।୪ : ୟୁକ୍ରେନରେ ଚାଲିଥିବା ଯୁଦ୍ଧ ମଧ୍ୟରେ ରୁଷିଆ ଆର୍ଏସ୍-୨୮ ସରମାଟ କ୍ଷେପଣାସ୍ତ୍ର ପରୀକ୍ଷା କରି ଆତଙ୍କ ସୃଷ୍ଟି କରିଛି। ଏହି କ୍ଷେପଣାସ୍ତ୍ର ଆଣବିକ ୱାରହେଡ ସହିତ ଆକ୍ରମଣ କରିବାରେ ସକ୍ଷମ। ଏହାର ଲକ୍ଷ୍ୟଭେଦ କ୍ଷମତା ୧୮୦୦୦ କିଲୋମିଟରରୁ ଅଧିକ ରହିଛି।
ଏହାର ପରୀକ୍ଷଣ ବିଷୟରେ ସୂଚନା ରାଷ୍ଟ୍ରପତି ଭ୍ଲାଦିମିର ପୁଟିନ ନିଜେ ପ୍ରଦାନ କରିଛନ୍ତି। ସେ କହିଛନ୍ତି ଯେ ରୁଷିଆ ସରମାଟ ଆନ୍ତର୍ଦେଶୀୟ ବାଲାଷ୍ଟିକ କ୍ଷେପଣାସ୍ତ୍ରକୁ ସଫଳତାର ସହ ପରୀକ୍ଷଣ କରିଛି। ଏଭଳି ପରିସ୍ଥିତିରେ କ୍ରେମଲିନ୍ ଶତ୍ରୁମାନଙ୍କୁ ଏବେ ଦୁଇଥର ଚିନ୍ତା କରିବାକୁ ପଡ଼ିବ। ଧମକ ଦେବା ପୂର୍ବରୁ ପ୍ରଥମେ ସେମାନଙ୍କୁ ପରିଣାମ ଚିନ୍ତା କରିବାର ଆବଶ୍ୟକତା ରହିଛି ବୋଲି ପୁଟିନ୍ କହିଛନ୍ତି।
ପୁଟିନ କହିଛନ୍ତି ଯେ ସରମାଟ କ୍ଷେପଣାସ୍ତ୍ରର ସଫଳ ଉତକ୍ଷେପଣ ପାଇଁ ମୁଁ ଦେଶବାସୀଙ୍କୁ ଅଭିନନ୍ଦନ ଜଣାଉଛି। ଏହା ପ୍ରକୃତରେ ଏକ ଅନନ୍ୟ ଅସ୍ତ୍ର, ଯାହା ଆମର ସଶସ୍ତ୍ର ବାହିନୀର ଯୁଦ୍ଧ କ୍ଷମତାକୁ ସୁଦୃଢ଼ କରିବ। ଏହା ବାହ୍ୟ ଧମକରୁ ରୁଷର ସୁରକ୍ଷାକୁ ନିଶ୍ଚିତ କରିବ ଏବଂ ଯେଉଁମାନେ ଆମ ଦେଶକୁ ଧମକ ଦେବାକୁ ଚେଷ୍ଟା କରିବେ ଏହା କ୍ଷେପଣାସ୍ତ୍ର ସେମାନଙ୍କୁ ଆକ୍ରମଣାତ୍ମକ ବକ୍ତବ୍ୟ ଦେବା ପୂର୍ବରୁ ଦୁଇଥର ଚିନ୍ତା କରିବା ସମ୍ପର୍କରେ ସୂଚିତ କରିବ।
ସୂଚନାଯୋଗ୍ୟ, କିଛି ଦିନ ପୂର୍ବରୁ ଆମେରିକା ଏବଂ ୟୁକ୍ରେନ ଆଶଙ୍କା ପ୍ରକାଶ କରିଛନ୍ତି ଯେ ଯୁଦ୍ଧକୁ ଶେଷ କରିବା ପାଇଁ ପୁଟିନ ପରମାଣୁ ଅସ୍ତ୍ର ବ୍ୟବହାର କରିପାରନ୍ତି। ଏବେ ସେହି ଆଶଙ୍କା ସତ୍ୟରେ ପରିଣତ ହେବାକୁ ଯାଉଛି।
