ବଲାଙ୍ଗୀର, ୪।୨(ସୁନୀଲ କୁମାର ମହାନ୍ତି): ବଲାଙ୍ଗୀର ଟାଉନ ଥାନା ପୋଲିସ ଟିମ ମଙ୍ଗଳବାର ପାଟ୍ରୋଲିଂ କରିବାବେଳେ ହାଇୱେ ଏବଂ ଆଖପାଖରେ ଡକାୟତି ଯୋଜନା କରୁଥିବା ୪ ଜଣ ଡକାୟତଙ୍କୁ ଗିରଫ କରିଛି । ସେମାନଙ୍କଠାରୁ ଏକ ୟୁଏସଏ ତିଆରି ମାଉଜର, ଜୀବନ୍ତ କେଟ୍ରିକ, ଏକ କଟୁରି, ଦୁଇଟି ଲୁହାରଡ, ୪ଟି ମୋବାଇଲ ଫୋନ ଏବଂ ନଗଦ ୧୮ହଜାର ୫୩୦ ଟଙ୍କା ଜବତ କରାଯାଇଛି। ଗିରଫ ୪ ଅଭିଯୁକ୍ତ ହେଲେ ବଲାଙ୍ଗୀର ବରପାଲିପଡାର ସୁମନ୍ତ ଓରଫ ମୋଟୁ ବରାଡ ( ୨୩), ସିଲୁ ପଧାନ(୨୬), ବିଭୂତିପଡାର କରୁଣା ଓରଫ ଆଶିଷ ସୱାଇଁ (୨୪) ଏବଂ ପୁଇଁନ୍ତଲା ଥାନା କୁଲଥିପାଲି ଗାଁର କୁଶଳେଶ୍ବର ବାଗ (୨୫)। ଗିରଫ ଅଭିଯୁକ୍ତମାନେ ବଲାଙ୍ଗୀର ଡିକେ ଗ୍ୟାଙ୍ଗର ସଦସ୍ୟ। ଏହି ଗ୍ୟାଙ୍ଗର ମୁଖ୍ୟ ଦୀପକ କୁମ୍ଭାର (ଡିକେ)ଙ୍କ ସହ ଅନ୍ୟ ଜଣେ ଯୁବକ ଫେରାର୍ ହୋଇଯାଇଥିଲେ। ବଲାଙ୍ଗୀର ସଦର ଏସଡିପିଓ ସରୋଜ ଉପାଧ୍ୟାୟ ଏବଂ ଟାଉନ ଥାନା ଆଇଆଇସି ଅବନୀ ସାହୁ ମଙ୍ଗଳବାର ସନ୍ଧ୍ୟାରେ ସ୍ଥାନୀୟ ଟାଉନ ଥାନାରେ ଖବରଦାତା ସମ୍ମିଳନୀ ଡାକି ଡକାୟତି ଯୋଜନା ସମ୍ପର୍କରେ ସବିଶେଷ ସୂଚନା ଦେଇଥିଲେ। ସୂଚନା ଅନୁଯାୟୀ, ଅପରାହ୍ଣ ସାଢ଼େ ୩ଟା ସମୟରେ ଟାଉନ ଥାନା ଏସଆଇ ଡି. ଶତପଥୀ ଏବଂ ଏଏସଆଇ ବୈକୁଣ୍ଠନାଥ ଦେହୁରୀ ବଲାଙ୍ଗୀର ସହର ସାଲେପାଲି , ରାଜୀବ ନଗର ଏବଂ ଆଖପାଖ ଅଞ୍ଚଳରେ ପାଟ୍ରୋଲିଂ କରୁଥିବା ବେଳେ ଇଣ୍ଡଷ୍ଟ୍ରିଆଲ ଇଷ୍ଟେଟ ପଛପଟେ ୬-୭ ଜଣ ଯୁବକ ଡକାୟତି ପାଇଁ ଯୋଜନା କରୁଥିବା ନିର୍ଭରଯୋଗ୍ୟ ସୂତ୍ରରୁ ଖବର ପାଇଥିଲେ। ପୋଲିସ ଟିମ ଉକ୍ତ ସ୍ଥାନରେ ଅତର୍କିତ ଚଢ଼ାଉ କରି ୪
ଜଣ ଅଭିଯୁକ୍ତଙ୍କୁ ଗିରଫ କରିବାରେ ସଫଳ ହୋଇଥିଲେ। ଘଟଣାସ୍ଥଳରୁ ଦୁଇଜଣ ଅଭିଯୁକ୍ତ ଫେରାର ମାରିବାରେ ସଫଳ ହୋଇଥିଲେ। ପୋଲିସ ଉକ୍ତ ୪ ଜଣଙ୍କୁ କାବୁ କରି ଟାଉନ ଥାନାକୁ ଆଣିବା ପରେ ଜେରା କରାଯିବାରୁ ସେମାନେ ବଲାଙ୍ଗୀର-ଭବାନୀପାଟଣା ୨୬ ନମ୍ବର ଜାତୀୟ ରାଜପଥ ଏବଂ ଆଖପାଖ ଅଞ୍ଚଳରେ ବଡଧରଣର ଡକାୟତି ଯୋଜନା କରୁଥିବା ସ୍ବୀକାର କରିଥିଲେ। ଡି କୁମ୍ଭାର ଡି କେ ଗ୍ୟାଙ୍ଗ କରି ଏକାଧିକ ହାୱାଇ ଏବଂ ଅନ୍ୟାନ୍ୟ ସ୍ଥାନରେ ଡକାୟତ କରୁଥିବା ଗିରଫ ଅଭିଯୁକ୍ତମାନେ କହିଥିବା ଏସଡିପିଓ ସରୋଜ ଉପାଧ୍ୟାୟ ସୂଚନା ଦେଇଛନ୍ତି l
ବିଭିନ୍ନ ରାସ୍ତାରେ ଯାତ୍ରୀମାନଙ୍କୁ ଅଟକାଇ ସେମାନଙ୍କୁ ମାରଣାସ୍ତ୍ର ଦେଖାଇ ଏବଂ ଆକ୍ରମଣ ଲୁଟରେ ଏମାନେ ସମ୍ପୃକ୍ତ ଥିବା ସେ କହିଥିଲେ। ଗିରଫ ଅଭିଯୁକ୍ତମାନଙ୍କ ନାଁରେ ଏକାଧିକ ଥାନାରେ ଏକାଧିକ ମାମଲା ରହିଥିବା ସୂଚନା ଦେଇଥିଲେ। ଗିରଫ ଅଭିଯୁକ୍ତ ସିଲୁ ପ୍ରଧାନଙ୍କ ଠାରୁ ମାଉଜର, ଗୁଳି ଜବତ କରାଯାଇଛି। ଡିକେ ଗ୍ୟାଙ୍ଗର ମୁଖ୍ୟ ଫେରାର ହୋଇଯାଇଥିବାରୁ ତାଙ୍କୁ ଏବଂ ତାଙ୍କ ଅନ୍ୟ ସହଯୋଗୀଙ୍କୁ ଖୁବଶୀଘ୍ର ଗିରଫ କରାଯିବ ବୋଲି ଏସଡିପିଓ ଉପାଧ୍ୟାୟ ସୂଚନା ଦେଇଛନ୍ତି। ପୋଲିସର ସମୟୋଚିତ ପଦକ୍ଷେପ ପାଇଁ ବଡଧରଣର ଅଘଟଣ ଟଳିଲା ବୋଲି କୁହାଯାଉଛି। ଅପରାଧୀ ମାନେ ଜେଲରୁ ବାହାରିଲା ପରେ ଏକ ଅପରାଧୀ ଗ୍ୟାଙ୍ଗ ତିଆରି କରି ଜିଲ୍ଲାର ବିଭିନ୍ନ ସ୍ଥାନରେ ଓ ସହରରେ ଭୟ ଆଶାନ୍ତି ସୃଷ୍ଟି କରୁଥିବାରୁ ସାଧାରଣରେ ଆଲୋଚନା ହେଉଛି ।
