ବାହାନଗା,୧୪।୧୧(ଡି.ଏନ.ଏ.): ବାଲେଶ୍ୱର ଜିଲା ବାହାନଗା ବ୍ଲକ କାର୍ଯ୍ୟାଳୟ ପରିସରରେ ସ୍ଥାପନ କରାଯାଇଛି ‘ମୋ ସରକାର କକ୍ଷ’। ଏହି କକ୍ଷ ବ୍ଲକ କାର୍ଯ୍ୟାଳୟ ପରିସରରେ ୨ବର୍ଷରୁ ଊର୍ଦ୍ଧ୍ୱ ହେଲାଣି ସ୍ଥାପନ କରାଯାଇଥିଲେ ମଧ୍ୟ ସେ କକ୍ଷରେ କୌଣସି କାର୍ଯ୍ୟ ନାହଁ କି କେହି ଅଧିକାରୀ ସେଥିପାଇଁ ନିଯୁକ୍ତି ହୋଇନାହାନ୍ତି।
ରାଜ୍ୟ ସରକାର ୫-ଟି ଅଧୀନରେ ବିଭିନ୍ନ ବିଭାଗକୁ ସାମିଲ କରି ସେଗୁଡିକୁ ରୂପାନ୍ତରଣ କରି ଚଳଚଞ୍ଚଳ କରୁଛନ୍ତି। ତେବେ ଲୋକଙ୍କୁ ସୁବିଧା ଓ ସହଯୋଗ କରିବା ନିମନ୍ତେ ‘ମୋ ସରକାର କକ୍ଷ’ ଅଫିସ୍ଗୁଡିକରେ ସ୍ଥାପନ କରାଯାଇ ଲୋକଙ୍କ ବିଶ୍ୱାସ ସରକାରଙ୍କ ପ୍ରତି ବଢାଇବା ସହିତ ସରକାରୀ କାର୍ଯ୍ୟରେ ଯେପରି ସାଧାରଣ ଲୋକଟିଏ ଅସୁବିଧାର ସମ୍ମୁଖୀନ ନ ହେବ ସେଥିପ୍ରତି ରାଜ୍ୟ ସରକାର ‘ମୋ ସରକାର କକ୍ଷ’ ବ୍ଲକ କାର୍ଯ୍ୟାଳୟରେ ଖୋଲି ଜଣେ ନୋଡାଲ ଅଫିସରମାନଙ୍କୁ ସେଠାରେ ନିଯୁକ୍ତି କରିଥାନ୍ତି। ମାତ୍ର ବାହାନଗା ବିଡିଓଙ୍କ କାର୍ଯ୍ୟାଳୟ ସାମ୍ନାରେ ୨ ବର୍ଷରୁ ଊର୍ଦ୍ଧ୍ୱ କାଳ ହେଲାଣି ‘ମୋ ସରକାର କକ୍ଷ’ ଖୋଲାଯାଇଛି ା ହେଲେ ସେ କକ୍ଷରେ ବସିବା ପାଇଁ କେହି ନୋଡାଲ ଅଫିସର ନିଯୁକ୍ତ ହୋଇନାହାନ୍ତି। ସାଧାରଣ ଲୋକ ବ୍ଲକ ଯାଇ ସୁବିଧାରେ ନିଜର ଅଭିଯୋଗ କରିବା ବିଭିନ୍ନ ବିଭାଗ ବାବଦରେ ବୁଝାବୁଝି କରିବା ସହ ସାଧାରଣ ଲୋକଙ୍କୁ ମୋ ସରକାର କାର୍ଯ୍ୟ ବାବଦରେ ସଚେତନ କରିବାରେ ବାହାନଗା ବ୍ଲକ ବିଫଳ ହୋଇଛି ା କେବଳ ମୋ ସରକାର କକ୍ଷ ଖୋଲା ହୋଇଥିଲେ ମଧ୍ୟ ତାହା ସାଧାରଣରେ କୌଣସି କାର୍ଯ୍ୟରେ ଆସୁନାହିଁ। କେବଳ ତାହା ଭିତରେ ଏକ ଟେବୁଲ ଚେୟାର ପଡିବା ସହିତ କିଛି ଭଙ୍ଗା ଚେୟାର ପଡିଛି। ଏ ବିଷୟରେ ବିଡିଓ ଗୌରାଙ୍ଗ ଘୋଷ କୁହନ୍ତି, ବ୍ଲକରେ ଆବଶ୍ୟକ କର୍ମଚାରୀ ନ ଥିବା ବେଳେ ଆମେ କାହାକୁ ଏହି କକ୍ଷରେ ବସାଇବୁ ବୋଲି ପ୍ରଶ୍ନ କରିଥିଲେ। ଏଠି ଜଣେ ନୋଡାଲ ଅଫିସର ଭାବେ ଡବ୍ଲ୍ୟୁଇଓ (ବ୍ଲକ ଜନମଙ୍ଗଳ ସମ୍ପ୍ରସାରଣ ଅଧିକାରୀ) ନିଯୁକ୍ତି ହୋଇଥାନ୍ତି। ବ୍ଲକରେ କେହି ଡବ୍ଲ୍ୟୁଇଓ ନ ଥିବା ଫଳରେ ମୋ ସରକାର କକ୍ଷରେ ବସୁନାହାନ୍ତି। ତୁରନ୍ତ ସରକାରଙ୍କ ମୋ ସରକାର କକ୍ଷ ମାଧ୍ୟମରେ ସରକାରଙ୍କ ଯୋଜନା ଓ ବିଭିନ୍ନ ଅଫିସରେ ଲୋକଙ୍କୁ ସୁବିଧାରେ କାର୍ଯ୍ୟ କରାଇ ସରକାରଙ୍କ ପ୍ରତି ଲୋକଙ୍କ ବିଶ୍ୱାସ ବଢ଼ାଇବାକୁ ହେଲେ ତୁରନ୍ତ ବ୍ଲକ ପରିସରରେ ଥିବା ‘ମୋ ସରକାର କକ୍ଷ’କୁ ତ୍ୱରାନ୍ବିତ କରାଯିବାକୁ ଦାବି ହେଉଛି।
