ଗଞ୍ଜାମ,୧୩ା୫(ଡି.ଏନ୍.ଏ.): ଦିନକୁ ଦିନ ପ୍ରବଳ ଗ୍ରୀଷ୍ମ ପ୍ରବାହ ସାଙ୍ଗକୁ ଅସହ୍ୟ ଗୁଳୁଗୁଳି l ଖରାର ଉତ୍ତାପ ଏତେ ପ୍ରଖର ଯେ, ଲୋକେ ଘରୁ ବାହାରକୁ ବାହାରି ପାରୁନାହାନ୍ତି l ଏହି ଭଳି ପରିସ୍ଥିତିରେ ପାନୀୟ ଜଳ ସମସ୍ୟା ଲୋକଙ୍କ ସମସ୍ୟାକୁ ଦ୍ୱିଗୁଣିତ କରିଛି l ଏହିଭଳି ଏକ ଘଟଣା ଦେଖିବାକୁ ମିଳିଛି ଗଞ୍ଜାମ ଏନ୍ଏସି ୩ ନଂ ଓ୍ବାର୍ଡର ବଜାର ଗୌଡ଼ସାହିରେ। ଗତ ୭ ଦିନ ହେଲା ଉକ୍ତ ସାହିକୁ ଠିକ ଭାବେ ପାଇପରେ ପିଇବା ପାଣି ଆସୁନାହିଁ l ଫଳରେ ପାଣି ପାଇଁ ହନ୍ତସନ୍ତ ହେଉଛନ୍ତି ସାହି ବାସିନ୍ଦା l ବାଧ୍ୟ ହୋଇ ଶନିବାର ସାହିର ୫୦ରୁ ଊର୍ଦ୍ଧ୍ୱ ମହିଳା ଗରାମାଠିଆ, ହାଣ୍ଡି,ବାଲ୍ଟି ଧରି ଏହାର ପ୍ରତିବାଦ କରିଥିବା ଦେଖିବାକୁ ମିଳିଛି l ଠିକ୍ ଭାବେ ପାଣି ନ ଆସିବାରୁ ଉକ୍ତ ସାହି ମହିଳାମାନେ ଖରାରେ କୂଅ ପାଣି ବ୍ୟବହାର କରିବାକୁ ବାଧ୍ୟ ହେଉଛନ୍ତି ବୋଲି ଅଭିଯୋଗ ହୋଇଛି। ଏନେଇ ମହିଳାମାନେ ପ୍ରଶାସନିକ ଅଧିକାରୀଙ୍କୁ ଅବଗତ କରୁଥିଲେ ମଧ୍ୟ କିଛି ଫଳପ୍ରଦ ହେଉନାହିଁ। ଶନିବାର ଏନ୍ଏସି କାର୍ଯ୍ୟାଳୟ ଛୁଟି ଥିବାରୁ ଫୋନ ଯୋଗେ ଏନ୍ଏସି ଇଓ ଅବିନାଶ ମିଶ୍ରଙ୍କୁ ସମସ୍ୟା ସମ୍ପର୍କରେ ସାହିବାସୀଜଣାଇଥିଲେ l ଅଭିଯୋଗ ପାଇବା ପରେ ଶ୍ରୀ ମିଶ୍ର ସଙ୍ଗେ ସଙ୍ଗେ ଜନସ୍ବାସ୍ଥ୍ୟ ବିଭାଗ ସହ ଆଲୋଚନା କରିଛନ୍ତି। ଉକ୍ତ ସମସ୍ୟା ଖୁବ୍ଶୀଘ୍ର ସମାଧାନ ହୋଇଯିବ ବୋଲି ସେ ପ୍ରତିଶ୍ରୁତି ଦେଇଛନ୍ତି। ଅନ୍ୟପଟେ ସ୍ଥାୟୀ ସମାଧାନ ନ ହେଲେ ରାଜରାସ୍ତାରେ ଆନ୍ଦୋଳନ କରାଯିବ ବୋଲି ସାହିବାସୀ ଚେତାବନୀ ଦେଇଛନ୍ତି।
