ରାଇକିଆ,୧୮ା୭(ପ୍ରଦୀପ ବେହେରା): ରାଇକିଆ ଅଞ୍ଚଳରେ ଗତ କିଛିଦିନ ହେଲା ପନିପରିବା ଅଭାବ ଦେଖାଦେଇଛି। ବଜାରକୁ ଆଦୌ ପନିପରିବା ଆସୁ ନ ଥିବା ବେଳେ ଯାହା ଆସୁଛି ଚଢ଼ା ଦରରେ ବିକ୍ରି ହେଉଛି। ଫୁଲ କୋବି, ବନ୍ଧା କୋବି, ବିନ୍ସ ଉତ୍ପାଦନ ପାଇଁ ଖ୍ୟାତି ଅର୍ଜନ କରିଥିବା ରାଇକିଆ ଅଞ୍ଚଳରେ ବିନ୍ସ କିଲୋ ବର୍ତ୍ତମାନ ୧୫୦ ଟଙ୍କାରେ ବିକ୍ରି ହେଉଛି। ବାହାର ଜିଲା ବିଶେଷ କରି ଗଞ୍ଜାମ ଜିଲା ହିଞ୍ଜିଳିକାଟୁ ଅଞ୍ଚଳର ବନ୍ଧାକୋବି ରାଇକିଆରେ କିଲୋ ପ୍ରତି ୪୦ ଟଙ୍କାରେ ବିକ୍ରି ହେଉଛି । ବର୍ଷକରେ ତିନି ଚାରିମାସ ବ୍ୟାପକ ପରିମାଣରେ ରାଜ୍ୟର ବିଭିନ୍ନ ଜିଲାକୁ ଏଠାରୁ ବିନ୍ସ ଓ ଫୁଲ କୋବି, ବନ୍ଧାକୋବି ପଠାଯାଉଥିବା ବେଳେ ବାକି ପନିପରିବା ସଙ୍କଟ ଦେଖାଦେଉଛି। ବର୍ଷରେ କେବଳ ଖରିଫ ଋତୁରେ ହିଁ ବର୍ଷା ଜଳ ଭରସାରେ ଚାଷୀ ପନିପରିବା ଚାଷ କରନ୍ତି। ତାହା ଅମଳ ହେଲା ବେଳକୁ ନଭେମ୍ବର, ଡିସେମ୍ବର ମାସ ହୋଇଯାଇଥାଏ। ଏହି ସମୟରେ ମାତ୍ରାଧିକ ଉତ୍ପାଦନ ଯୋଗୁ ଚାଷୀ ଅଭାବୀ ବିକ୍ରିର ଶିକାର ହୋଇଥାଏ। ଅନ୍ୟପକ୍ଷରେ ଜଳସେଚନର ସୁବିଧା ନ ଥିବାରୁ ଅଧିକାଂଶ ଚାଷୀ ରବି ଋତୁରେ କୌଣସି ପରିବା ଚାଷ କରିପାରନ୍ତି ନାହିଁ। ତାହାର ପ୍ରଭାବ ଜୁନ, ଜୁଲାଇ, ଅଗଷ୍ଟ ମାସର ବଜାର ଉପରେ ପଡ଼ିଥାଏ ଏବଂ ବଜାରରେ ପନିପରିବା ସଙ୍କଟ ଦେଖାଦେବା ସହ ଅତ୍ୟନ୍ତ ଚଢ଼ା ଦରରେ ବିକ୍ରି ହୋଇଥାଏ। ଏହି ସମୟରେ ଅନେକ ପରିବା ବାହାର ଜିଲାରୁ ଆସିଥାଏ। ଏ ନେଇ ଚାଷୀ ସୁବଳ ପ୍ରଧାନ କୁହନ୍ତି, ତାଙ୍କ ଜମି ନିକଟରେ ପୋଖରୀ ଥିବା ଯୋଗୁ ଖରା ଦିନେ ବିନ୍ସ ଚାଷ କରିଥିଲେ କିନ୍ତୁ ପ୍ରବଳ ଖରା ଯୋଗୁ ତାହା ପୋଡ଼ି ନଷ୍ଟ ହୋଇଗଲା। ଏବେ ଫୁଲ କୋବି ଲଗାଇଛନ୍ତି ପାଗ ଯଦି ଠିକଠାକ ରୁହେ ଅକ୍ଟୋବର କିମ୍ବା ନଭେମ୍ବର ଆଡ଼କୁ ତାହା ଉତ୍ପାଦନ ହେବ କିନ୍ତୁ ସେତେବେଳେ ଦର ବହୁ କମ ରହିବାର ସମ୍ଭାବନା ଥିବାରୁ ଲାଭ ମଧ୍ୟ କମ ହେବ। ଗୁମାମାହା ଅଞ୍ଚଳର ମଳୟ ନାୟକ କୁହନ୍ତି, ପାଣି ସୁବିଧା ନ ଥିବାରୁ ଆମେ କେବଳ ବର୍ଷା ଦିନରେ ହିଁ ଚାଷ କରୁଛୁ। ଅନ୍ୟ ସମୟରେ ଆମକୁ ନିଜ ପାଇଁ ମଧ୍ୟ ପରିବା ବଜାରରୁ କିଣିବାକୁ ପଡୁଛି।
