ଚାନ୍ଦବାଲି,୯ା୧୨(ଡି.ଏନ୍.ଏ.): ଚାଷୀମାନଙ୍କଠାରୁ ସରକାରୀ ଧାର୍ଯ୍ୟ ଦର କ୍ୱିଣ୍ଟାଲ ପ୍ରତି ୨୦୪୦ଟଙ୍କା ଦରରେ ଧାନ କ୍ରୟ ନିମନ୍ତେ ସମବାୟ ସମିତି ଓ ମହିଳା ମଣ୍ଡଳଗୁଡ଼ିକ ମାଧ୍ୟମରେ ଚାଷୀମାନଙ୍କୁ ଅନ୍ଲାଇନ ପଞ୍ଜୀକରଣ କରାଯାଇଛି। ଧାନ ଅମଳ ଆରମ୍ଭ ହେବା ମାତ୍ରେ ଭଦ୍ରକ ଜିଲା ଚାନ୍ଦବାଲିର ଚାଷୀ ଅଭାବୀ ବିକ୍ରିର ଶିକାର ହେବା ଆରମ୍ଭ ସୋଇଛି । ପଶ୍ଚିମବଙ୍ଗର ଦୁଇଟି ଧାନ ବୋଝେଇ ଟ୍ରକ୍କୁ ମତୋ ପୋଲିସ ଫାଣ୍ଡି ଗୁରୁବାର ରାତିରେ ଅଟକ ରଖିଛି। ଚାନ୍ଦବାଲି ଅଞ୍ଚଳରୁ ଧାନ ବେପାରୀମାନଙ୍କ ମାଧ୍ୟମରେ ପ୍ରାୟ ୫ଶହରୁ ଊର୍ଦ୍ଧ୍ୱ କ୍ୱିଣ୍ଟାଲ ଧାନ ଲୋଡ୍ କରି ଚାନ୍ଦବାଲିରୁ ଭଦ୍ରକ ଅଭିମୁଖେ ଯାଉଥିବା ସମୟରେ ପାଞ୍ଚପଡ଼ା ନିକଟରେ ଥିବା ଆରଏମ୍ସି ଚେକ୍ ଗେଟ୍ର କର୍ମଚାରୀ ଅଟକାଇବା ପରେ ସେଠାରେ ନ ରହି ଉକ୍ତ ଦୁଇଟି ଟ୍ରକ୍ ଦ୍ରୁତ ଗତିରେ ପଳାଇ ଆସିଥିଲେ। ଖବର ପାଇ ମତୋ ଫାଣ୍ଡି ପୋଲିସ ଅଟକାଇବା ପରେ କିଛି ସମୟ ପାଇଁ ମୁଖ୍ୟ ରାସ୍ତା ଜନଗହଳି ହୋଇପଡ଼ିବା ଦ୍ବାରା ଚାନ୍ଦବାଲି ଥାନା ପୋଲିସ ପହଞ୍ଚି ପରିସ୍ଥିତିକୁ ଆୟତ୍ତ କରିଥିଲା। ବିନା ସରକାରୀ ଚାଲାଣରେ ଏତେ ପରିମାଣର ଧାନ ନେବାକୁ ବଙ୍ଗ ବେପାରୀମାନେ ସାହସ କଲେ କେମିତି ବୋଲି ସାଧାରଣରେ ସନ୍ଦେହ ସୃଷ୍ଟି କରିଛି। କେତେକ ସରକାରୀ କର୍ମଚାରୀଙ୍କ ସଲାସୁତରାରେ ବଙ୍ଗ ବେପାରୀମାନେ ବହୁଳ ପରିମାଣର ଓଡ଼ିଶା ଧାନକୁ ଶାଗମାଛ ଦରରେ କ୍ରୟ କରି ନେବାର ଜଣାପଡ଼ିଛି। ଏହି ପରି ୬ଟି ଧାନ ବୋଝେଇ ଟ୍ରକ୍ ଖେରଙ୍ଗ ଆରଏମ୍ସି ଚେକ୍ ଗେଟ୍ରେ ଅଟକିଛି। ଖବର ପାଇ ତହସିଲଦାର ସୁଶାନ୍ତ ସୂତାର ଓ ଥାନାଧିକାରୀ କରୁଣାକର ରାଉତ ଘଟଣାସ୍ଥଳରେ ପହଞ୍ଚିଛନ୍ତି।
