ଭବାନୀପାଟଣା,୮।୨(ସ୍ବ.ପ୍ର,): ଗ୍ରାମାଞ୍ଚଳର ବିକାଶ ପାଇଁ ସରକାର କୋଟି କୋଟି ଟଙ୍କା ଖର୍ଚ୍ଚ କରି ବିଭିନ୍ନ ଯୋଜନା କରୁଛନ୍ତି। ହେଲେ ଆଜି ବି ଉପାନ୍ତ ଇଲାକାରେ ଅପହଞ୍ଚ ସରକାରୀ ଯୋଜନା। ଶିକ୍ଷା, ସ୍ବାସ୍ଥ୍ୟ ଗମନାଗମନ ଭଳି ମୌଳିକ ସୁବିଧାରୁ ବଞ୍ଚତ୍ତ ଲୋକେ। ବଣଜଙ୍ଗଲ ମଧ୍ୟରେ ଥିବା କିଛି ଗାଁର ଲୋକେ ଆଜି ବି ଜିଉଁଛନ୍ତି ଅଭିଶପ୍ତ ଜୀବନ। ଏଭଳି ଏକ ଦୃଶ୍ୟ ଦେଖିବାକୁ ମିଳିଛି କଳାହାଣ୍ଡି ଜିଲା ଆଦିବାସୀ ଅଧ୍ୟୁଷିତ ଥୁଆମୂଳ ରାମପୁର ବ୍ଲକ ତୁମୁଣିଖୋଲଗାଁରେ। ଗାଁକୁ ଯିବାକୁ ହେଲେ ପାରି ହେବାକୁ ପଡେ ଦୁଇଟି ପାହାଡ଼। ଅବଡାଖବଡା ପଥର ରାସ୍ତା ଦେଇ ୩ କି.ମି. ପାଦରେ ଚାଲି ଗଲେ ପଡେ ଏହି ଗାଁ। ଆଉ ଗାଁ ଦେଖିଲେ ଲାଗେ ସତେଯେମିତି ଅଭିଶପ୍ତ ଜୀବନ ଜିଇଁବାକୁ ବାଧ୍ୟ ଗ୍ରାମବାସୀ। ତୁମୁଣିଖୋଲ ଗାଁର ଜନସଂଖ୍ୟା ପ୍ରାୟ ୨ ଶହ। ବ୍ଲକ ମୁଖ୍ୟାଳୟଠାରୁ ପ୍ରାୟ ୩୦ କି.ମି. ଦୂରରେ ରହିଛି। ମୁଖ୍ୟ କଥା ହେଉଛି ଥୁଆମୂଳ ରାମପୁର ବ୍ଲକରେ ଏହି ଗାଁ ଆସୁଥିବା ବେଳେ ଗାଁକୁ ଯିବାକୁ ହେଲେ କଲମପୁର ବ୍ଲକ ଦେଇ ଯିବାକୁ ପଡେ। ଏହି ଗାଁକୁ ନାହିଁ ସିଧାସଳଖ ରାସ୍ତା। ଗାଁକୁ ସଂଯୋଗ କରୁଥିବା ଅଙ୍କାବଙ୍କା ପାହାଡିଆ ରାସ୍ତାରେ ୩ କି.ମି. ଚାଲି ଯିବାଆସିବା କରନ୍ତି ଗ୍ରାମବାସୀ। ନିତିଦିନିଆ କାମ ହେଉ ଅବା ପଞ୍ଚାୟତ କାର୍ଯ୍ୟାଳୟକୁ ପିଡିଏସ ସାମଗ୍ରୀ ପାଇଁ ଯିବାକୁ ହେଲେ ଗ୍ରାମବାସୀଙ୍କୁ ପ୍ରଥମେ ରାସ୍ତାରେ ଚାଲି ଚାଲି ଯିବାକୁ ପଡେ। ଗାଁକୁ ଭଲ ରାସ୍ତା ନ ଥିବାରୁ ରୋଗୀଙ୍କୁ ଖଟିଆରେ ବୋହି କର୍ଲାପଡା ପର୍ଯ୍ୟନ୍ତ ନେଇ ସେଠାରୁ ଆମ୍ବୁଲାନ୍ସରେ କଲମପୁର ମେଡ଼ିକାଲକୁ ନେଇଥାନ୍ତି। ଗାଁରେ ଥିବା ଏହି ବିଦ୍ୟାଳୟ ଗୃହ ଗତ ୫ ବର୍ଷ ତଳେ ବର୍ଷାରେ ଭାଙ୍ଗି ଯାଇଛି। ସ୍କୁଲରେ ନିଯୁକ୍ତ ଶିକ୍ଷକ ୮ ବର୍ଷ ହେଲା ସ୍କୁଲ ବାରଣ୍ଡା ମାଡିନାହାନ୍ତି। ଫଳରେ ଶିକ୍ଷାରୁ ବଞ୍ଚତ୍ତ ଏଠାକାର ଛାତ୍ରୀଛାତ୍ର। ସେପଟେ ଗ୍ରାମବାସୀ ପିଇବା ପାଣି ପାଇଁ ବର୍ଷତମାମ ହନ୍ତସନ୍ତ ହୋଇପଡନ୍ତି। ଗାଁରେ ଗୋଟିଏ ହେଲେ ନଳକୂପ ନାହିଁ। ଫଳରେ ନାଳର ଦୂଷିତ ପାଣି ପିଇବା ପାଇଁ ବାଧ୍ୟ ହୋଇଥାନ୍ତି ଗ୍ରାମବାସୀ। ପାଣି ପାଇଁ ମୁଣ୍ଡରେ ଗରା ଧରି ୨ କି.ମି. ଦୂର ନାଳକୁ ଯାଇ ଆଣିଥାନ୍ତି। ଏ ହେଉଛି ବିକାଶର ଚିତ୍ର। ସେପଟେ ଗାଁରେ ଆଜି ପର୍ଯ୍ୟନ୍ତ ବିଜୁଳି ପହଞ୍ଚତ୍ ପାରିନାହିଁ। ଫଳରେ ମୌଳିକ ସୁବିଧାରୁ ବଞ୍ଚତ୍ତ ଗ୍ରାମବାସୀ। ସରକାରଙ୍କ ବିକାଶ ମୂଳକ ସ୍ଲୋଗାନ ଗାଁକୁ ଚାଲ-ଗାଁକୁ ଗଢ ସତେ ଯେମିତି ଏଠିକାର ବାସ୍ତବ ଚିତ୍ରକୁ ଦେଖିଲେ ସ୍ଲୋଗାନ ଫିକା ଲାଗୁଛି। ଗାଁରେ ପ୍ରାୟ ୩୦ଜଣ ପିଲା ଶିକ୍ଷା ଗ୍ରହଣ ପାଇଁ ଯୋଗ୍ୟ ଥିଲେ ହେଁ ସ୍କୁଲ ସାଜିଛି ବାଧକ। କଳାହାଣ୍ଡିର ଏହି ଗୋଟିଏ ଗାଁ ନୁହେଁ, ଲାଞ୍ଜିଗଡ ଓ ଥୁଆମୂଳ ରାମପୁର ବ୍ଲକ ଭଳି ଦୁର୍ଗମ ଇଲାକାରେ ଏଭଳି ଅନେକ ଗାଁ ରହିଛି। ଏ ପ୍ରସଙ୍ଗ ନେଇ ଲାଞ୍ଜିଗଡ ବିଧାୟକଙ୍କ ଦୃଷ୍ଟି ଆକର୍ଷଣ ପରେ ସେହି ଚିରାଚରିତ ଉତ୍ତର ଦେଇ କହିଲେ ବିକାଶ ପାଇଁ ନିଆଯାଉଛି ଅନେକ ପଦକ୍ଷେପ। ତେବେ ତୁମୁଣିଖୋଲବାସୀ ବିକାଶ ସ୍ରୋତରେ କେବେ ସାମିଲ ହେବେ ତାକୁ ହିଁ ଅପେକ୍ଷା।
ରିପୋର୍ଟ: ଉତ୍ତମ କୁମାର ଦାଶ
