ମୁମ୍ବାଇ,୪।୩: T୨୦ ବିଶ୍ୱକପ ୨୦୨୬ର ହାଇଭୋଲଟେଜ ସେମିଫାଇନାଲରେ ଭାରତ ଓ ଇଂଲଣ୍ଡ ମଧ୍ୟରେ ମୁକାବିଲା ହେବାକୁ ଯାଉଛି। ଏହି ଗୁରୁତ୍ୱପୂର୍ଣ୍ଣ ମ୍ୟାଚ ପୂର୍ବରୁ ଭାରତୀୟ ଦଳର ବୋଲିଂ କୋଚ ମର୍ନେ ମର୍କେଲ ଦଳକୁ ସତର୍କ କରିବା ସହ ଇଂଲଣ୍ଡକୁ ଏକ ଅତ୍ୟନ୍ତ ବିପଜ୍ଜନକ ଦଳ ଭାବେ ବର୍ଣ୍ଣନା କରିଛନ୍ତି।
ମୁମ୍ବାଇରେ ଆୟୋଜିତ ଏକ ଖବରଦାତା ସମ୍ମିଳନୀରେ ମର୍କେଲ କହିଛନ୍ତି ଯେ, “ଇଂଲଣ୍ଡ ଏକ ଶକ୍ତିଶାଳୀ ଦଳ ଏବଂ ସେମାନେ ବହୁତ ଭଲ ଖେଳୁଛନ୍ତି। ଯଦି ଆପଣ ଆଶା କରୁଛନ୍ତି ଯେ ଆମେ ସେମାନଙ୍କୁ ୧୨୦ କିମ୍ବା ୧୫୦ ରନ୍ରେ ଅଲଆଉଟ କରିଦେବୁ, ତେବେ ତାହା ଠିକ ହେବନାହିଁ। ଆମେ ସେମିଫାଇନାଲରେ ପହଞ୍ଚିଛୁ ଏବଂ ଜିତିବା ଲକ୍ଷ୍ୟରେ ହିଁ ଏଠାକୁ ଆସିଛୁ। ଭାରତରେ ଜିତିବା ଓ ହାରିବା ମଧ୍ୟରେ ବ୍ୟବଧାନ ବହୁତ କମ ଥାଏ।”
ପୂର୍ବ ପ୍ରଦର୍ଶନ ଅପେକ୍ଷା ଆଗାମୀ ମ୍ୟାଚ ଉପରେ ଗୁରୁତ୍ୱ ଦେଇ ସେ କହିଛନ୍ତି, “ଆପଣ ସେମିଫାଇନାଲରେ କେମିତି ପହଞ୍ଚିଲେ ତାହା ଗୁରୁତ୍ୱ ରଖେ ନାହିଁ। ବରଂ ଆଗାମୀ ଦୁଇଟି ମ୍ୟାଚ୍ (ସେମିଫାଇନାଲ ଓ ଫାଇନାଲ)ରେ ଆପଣ କିପରି ପ୍ରଦର୍ଶନ କରୁଛନ୍ତି, ତାହା ହିଁ ଅସଲ କଥା।”
ଦଳରେ ଅନେକ ପ୍ରତିଭାବାନ ଖେଳାଳି ଅଛନ୍ତି ଯେଉଁମାନେ ଯେକୌଣସି ପରିସ୍ଥିତିରେ ମ୍ୟାଚ୍ର ମୋଡ଼ ବଦଳାଇ ପାରିବେ। ଖେଳରେ ସଫଳତାର କୌଣସି ଗ୍ୟାରେଣ୍ଟି ନ ଥାଏ, କିନ୍ତୁ ପଡ଼ିଆକୁ ଓହ୍ଲାଇ ନିଜର ଶ୍ରେଷ୍ଠ ପ୍ରଦର୍ଶନ କରିବା ହିଁ ଦଳର ମୁଖ୍ୟ ଲକ୍ଷ୍ୟ।
ଦକ୍ଷିଣ ଆଫ୍ରିକାର ପୂର୍ବତନ ଦ୍ରୁତ ବୋଲର ମର୍କେଲଙ୍କ ଅନୁଯାୟୀ, ଗତବର୍ଷର ବିଜୟ ଏବେ କୌଣସି ମହତ୍ତ୍ୱ ରଖେନାହିଁ। ସେ କହିଛନ୍ତି, “ଇଂଲଣ୍ଡ ଦଳ ଅତ୍ୟନ୍ତ ଚତୁର। ସେମାନଙ୍କ ପାଖରେ ବହୁତ ଭଲ ବ୍ୟାଟିଂ ଲାଇନଅପ ଅଛି। ସେମାନେ ନିର୍ଭୟରେ ଖେଳନ୍ତି ଏବଂ ମ୍ୟାଚ୍କୁ ନିଜ ସପକ୍ଷକୁ ନେବା ପାଇଁ ସବୁବେଳେ ଚେଷ୍ଟା କରନ୍ତି। ବୋଲିଂରେ ମଧ୍ୟ ସେମାନଙ୍କ ପାଖରେ ଅନେକ ବିକଳ୍ପ ରହିଛି। ଗୁରୁବାର ଦିନ ଦୁଇଟି ଆକ୍ରମଣାତ୍ମକ ଦଳ ମଧ୍ୟରେ ଏକ ରୋମାଞ୍ଚକର ଲଢ଼େଇ ଦେଖିବାକୁ ମିଳିବ।”
