ବାଲେଶ୍ୱର,୧୦।୭ (ମାନସ ବିଶ୍ୱାଳ) : ବାଲେଶ୍ୱର ଜିଲାରେ ଡେଙ୍ଗୁ ବ୍ୟାପିବା ନେଇ ଆଶଙ୍କା ଦେଖାଦେଇଛି। ଏହାକୁ ଦୃଷ୍ଟିରେ ରଖି ସ୍ବାସ୍ଥ୍ୟ ବିଭାଗ ନିୟନ୍ତ୍ରଣ ଲାଗି ତପତ୍ରତା ଦେଖାଇଛି। ଜିଲା ମୁଖ୍ୟ ଚିକିତ୍ସାଳୟରେ ସ୍ବତନ୍ତ୍ର ବ୍ୟବସ୍ଥା ସହ ଘର ଘର ବୁଲି ସଚେତନ କରିବାକୁ ଆଶାକର୍ମୀଙ୍କୁ ନିର୍ଦ୍ଦେଶ ଦିଆଯାଇଛି। ଅଦ୍ୟାବଧି ଜିଲାରେ ୧୦ଜଣ ଡେଙ୍ଗୁ ରୋଗୀ ଚିହ୍ନଟ ହୋଇସାରିଲେଣି। ଆଗକୁ ବର୍ଷାଦିନ ଥିବାରୁ ଏହା ଦ୍ୱିଗୁଣିତ ହେବାର ଆଶଙ୍କାକୁ ଏଡ଼ାଇ ଦିଆଯାଇ ନ ପାରେ।
ଅଧିକାଂଶ ଜିଲାରେ ଡେଙ୍ଗୁ ରୋଗୀ ଚିହ୍ନଟ ହୋଇସାରିଲାଣି। ଖୋର୍ଦ୍ଧା ଜିଲାରେ ଅଧିକ ରୋଗୀ ଚିହ୍ନଟ ହୋଇଛନ୍ତି। ବାଲେଶ୍ୱରର ସ୍ଥିତି ଏବେ ସୁଦ୍ଧା ଆୟତ୍ତ ରହିଛି। ଡେଙ୍ଗୁ ମୁକାବିଲା ପାଇଁ ଜିଲା ସ୍ବାସ୍ଥ୍ୟ ବିଭାଗ ପକ୍ଷରୁ ତତ୍ପରତା ସହ ବିଭିନ୍ନ ସଚେତନତାମୂଳକ କାର୍ଯ୍ୟକ୍ରମ ହାତକୁ ନିଆଯାଇଛି। ସ୍ବାସ୍ଥ୍ୟ ବିଭାଗ ଆସନ୍ତା ୧୦ ତାରିଖରୁ ବିଭିନ୍ନ ବ୍ଲକରେ ସଚେତନତା କାର୍ଯ୍ୟକ୍ରମ ଆରମ୍ଭ କରିବାକୁ ଯାଉଛି। ୩ ମାସ ଧରି ଘର ଘର ବୁଲି ଆଶା କର୍ମୀ ଲୋକଙ୍କୁ ସଚେତନ କରାଇବେ। ଡେଙ୍ଗୁ ରୋଗ କିପରି ବ୍ୟାପେ, ଏହାର ଲକ୍ଷଣ ଓ ନିରାକରଣ ଉପରେ ସତର୍କ କରାଇବେ। ବିଶେଷକରି ବାଲିଆପାଳ, ଭୋଗରାଇ ବ୍ଲକରେ ଡେଙ୍ଗୁ ରୋଗ ବ୍ୟାପିଥାଏ। ଏହି ଅଞ୍ଚଳରେ ଅଧିକ ପାନବରଜ ଥିବାବେଳେ ବରଜରେ ଲଗାଯାଇଥିବା ବାଉଁଶ ଗୁଡ଼ିକରେ ପାଣି ଜମି ଏଡିସ୍ ମଶା ଜନ୍ମ ହୋଇଥାନ୍ତି। ସେହିପରି ଶିଳ୍ପାଞ୍ଚଳଗୁଡ଼ିକରେ ଡେଙ୍ଗୁ ରୋଗ ବୃଦ୍ଧି ହେବାର ଆଶଙ୍କା ରହିଥାଏ।
ସୂଚନା ମୁତାବକ, ଜିଲାରେ ଗତ ୨୦୨୧ରେ ୧୧୨ ଜଣ ଡେଙ୍ଗୁ ରୋଗୀ ଚିହ୍ନଟ ହୋଇଥିବା ବେଳେ ଗତ ୨୦୨୨ରେ ୩୧୩ ରୋଗୀ ଚିହ୍ନଟ ହୋଇଥିଲେ। ଚଳିତବର୍ଷ ବର୍ତ୍ତମାନ ସୁଦ୍ଧା ୨୨୩୯ ନମୁନା ପରୀକ୍ଷା କରାଯାଇଛି। ସେଥିମଧ୍ୟରୁ ୧୦ ଜଣ ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି। ତେବେ ଆଗକୁ ବର୍ଷାଦିନ ଥିବାରୁ ଡେଙ୍ଗୁ ରୋଗୀ ଅଧିକ ବଢ଼ିବାର ଯଥେଷ୍ଟ ଆଶଙ୍କା ରହିଛି। ବିଶେଷ କରି ଜୁଲାଇରୁ ସେପ୍ଟେମ୍ବର ମଧ୍ୟରେ ଡେଙ୍ଗୁ ରୋଗୀ ଅଧିକ ଚିହ୍ନଟ ହୋଇଥାନ୍ତି। ତେଣୁ ଏଥିପାଇଁ ଜିଲା ମୁଖ୍ୟ ଚିକିତ୍ସାଳୟରେ ଆବଶ୍ୟକ ପଦକ୍ଷେପ ଗ୍ରହଣ କରାଯାଇଛି। ୧୦ ଶଯ୍ୟା ବିଶିଷ୍ଟ ୱାର୍ଡ଼ ପ୍ରସ୍ତୁତ ଥିବା ବେଳେ ଔଷଧ ବି ମହଜୁଦ ରହିଛି। ରୋଗୀ ସଂଖ୍ୟା ବୃଦ୍ଧି ପାଇଲେ ଶଯ୍ୟା ବୃଦ୍ଧି କରାଯିବ ବୋଲି ସମ୍ପୃକ୍ତ ବିଭାଗ ପକ୍ଷରୁ ପ୍ରକାଶ କରାଯାଇଛି।
