ଜୟପୁର, ୨୭।୯ : ରାଜସ୍ଥାନରେ ନୂତନ ମୁଖ୍ୟମନ୍ତ୍ରୀଙ୍କ ପାଇଁ ଚାଲିଥିବା ଛକାପଞ୍ଛା ଦିନକୁ ଦିନ ଜଟିଳ ହେବାରେ ଲାଗିଛି। ଅଶୋକ ଗେହଲଟଙ୍କ ସ୍ଥାନରେ ମୁଖ୍ୟମନ୍ତ୍ରୀ ପଦ ପାଇଁ ସଚିନ ପାଇଲଟଙ୍କ ନାମ ଆସିବା ମାତ୍ରେ ଗେହଲଟଙ୍କ ସମର୍ଥକ ବିଧାୟକମାନେ ବିଦ୍ରୋହୀ ଆଭିମୁଖ୍ୟ ଗ୍ରହଣ କରିଛନ୍ତି। କଂଗ୍ରେସ ହାଇକମାଣ୍ଡଙ୍କ ବାର୍ତ୍ତା ନେଇ ଜୟପୁର ଯାଇଥିବା ପର୍ଯ୍ୟବେକ୍ଷକ ଅଜୟ ମାକନ ଏଭଳି କାର୍ଯ୍ୟକୁ ଅନୁଶାସନହୀନ ବୋଲି କହିଛନ୍ତି।
ଏଥି ସହିତ, ଗେହଲଟଙ୍କ ଶିବିରର ନେତାମାନେ ପାଇଲଟ ମୁଖ୍ୟମନ୍ତ୍ରୀ ହେବାରେ ଏକ ବଡ଼ ପ୍ରତିବନ୍ଧକ ପାଲଟିଛନ୍ତି। ବିଦ୍ରୋହୀ ନେତା କଂଗ୍ରେସ ହାଇକମାଣ୍ଡଙ୍କ ଦ୍ୱାରା ଜୟପୁରକୁ ପଠାଯାଇଥିବା ପର୍ଯ୍ୟବେକ୍ଷକ ମାକନ ଏବଂ ମଲ୍ଲିକା ଅର୍ଜୁନ ଖାର୍ଗେଙ୍କୁ ମଧ୍ୟ ସିଧାସଳଖ ଆହ୍ବାନ ଦେଉଛନ୍ତି ବୋଲି ରାଜନୈତିକ ସମୀକ୍ଷକ ମତପୋଷଣ କରିଛନ୍ତି। ଏହି ପରିପ୍ରେକ୍ଷୀରେ ରାଜ୍ୟ ସରକାରଙ୍କ ମନ୍ତ୍ରୀ ଶାନ୍ତି କୁମାର ଧାରିୱାଲ ମାକେନଙ୍କୁ ଏହି ଘଟଣା ପାଇଁ ଦାୟୀ କରିଛନ୍ତି।
ପାର୍ଟି ହାଇ କମାଣ୍ଡକୁ ଚ୍ୟାଲେଞ୍ଜ କରୁଥିବା ଲୋକଙ୍କ ମଧ୍ୟରେ ଶାନ୍ତି କୁମାରଙ୍କ ମଧ୍ୟ ରହିଛି। ଧାରିୱାଲଙ୍କୁ କଂଗ୍ରେସର ବରିଷ୍ଠ ନେତା ତଥା ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କ ସମର୍ଥକ ଭାବରେ ବିବେଚନା କରାଯାଏ। ଗେହଲଟଙ୍କ ବିରୋଧରେ ଷଡ଼ଯନ୍ତ୍ର ହୋଇଛି ବୋଲି ଶାକ୍ତି କୁମାର ଅଭିଯୋଗ କରିଛନ୍ତିି। ଏକ ସାକ୍ଷାତକାରରେ ସେ ଏଭଳି କହିଛନ୍ତି।
ସମସ୍ତ ବିଧାୟକ ଏନେଇ ଅସନ୍ତୋଷ ବ୍ୟକ୍ତ କରିଛନ୍ତି। ସମସ୍ତେ ଚାହୁଁଥିଲେ ଯେ ଯଦି କେହି ମୁଖ୍ୟମନ୍ତ୍ରୀ ହେବେ ତେବେ ୧୦୨ ଜଣ ବିଧାୟକଙ୍କ ମଧ୍ୟରୁ କାହାକୁ କରାଯାଉ। ବିଧାୟକଙ୍କ ମଧ୍ୟରୁ କଂଗ୍ରେସ ଅଧ୍ୟକ୍ଷ ସୋନିଆ ଗାନ୍ଧୀ ଯାହାକୁ କହିବେ ସେ ହେବେ। କୌଣସି ନେତା ସୋନିଆଙ୍କ ଆଦେଶକୁ ଚ୍ୟାଲେଞ୍ଜ କରିପାରିବେ ନାହିଁ। କିନ୍ତୁ ପ୍ରତାରକଙ୍କୁ ପୁରସ୍କାର ମିଳୁ ତାହା ରାଜସ୍ଥାନର ବିଧାୟକମାନେ କଦାପି ଗ୍ରହଣ କରିବେ ନାହିଁ।
