କଟକ ଅଫିସ,୨୧ା୧୧: ରାଜ୍ୟ ସରକାର ତଥା ପରିବହନ ବିଭାଗ ପ୍ରତ୍ୟେକ ଗାଡ଼ିରେ ହାଇ ସିକ୍ୟୁରିଟି ନମ୍ବର ପ୍ଲେଟ୍ ଲଗାଇବାକୁ ବାଧ୍ୟତାମୂଳକ କରିଛନ୍ତି। ହେଲେ ବିନା ନମ୍ବର ପ୍ଲେଟ୍ରେ କଟକ ସହରରେ ବହୁସଂଖ୍ୟକ ଗାଡି ଚାଲୁଛି। ବିଶେଷକରି ସହରର ପ୍ରମୁଖ ରାସ୍ତାରେ ଅନାୟାସରେ ଏଭଳି ଗାଡ଼ିଗୁଡିକ ଚାଲୁଥିବାବେଳେ କାର୍ଯ୍ୟରତ ପୋଲିସ ଅଧିକାରୀ ଓ କର୍ମଚାରୀମାନେ ଏହାକୁ ଜବତ ନ କରିବା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି।
କଟକ ସହରରେ ରାଜ୍ୟ ପରିବହନ କାର୍ଯ୍ୟାଳୟ, ପୋଲିସ ମୁଖ୍ୟାଳୟ ସମେତ ଅନେକ କାର୍ଯ୍ୟାଳୟ ରହିଛି। ବିଭିନ୍ନ ସମୟରେ ଏଠାରେ ଅପରାଧୀମାନେ ଅପରାଧ ଘଟାଇ ସହଜରେ ଖସି ପଳାଉଛନ୍ତି। ଅପରାଧ ନିୟନ୍ତ୍ରଣ ପାଇଁ ସହରର ପ୍ରମୁଖ ଛକ ସମେତ ବିଭିନ୍ନ ଅଞ୍ଚଳରେ ସିସିଟିଭି କ୍ୟାମେରା ଲଗାଯାଇଛି। ଏହି କ୍ୟାମେରାଗୁଡ଼ିକ ସିଧାସଳଖ ଡିସିପିଙ୍କ କାର୍ଯ୍ୟାଳୟରୁ ନିୟନ୍ତ୍ରିତ ହେଉଛି। ସେଠାରେ ନିୟୋଜିତ ପୋଲିସ ଅଧିକାରୀ ଓ କର୍ମଚାରୀ ସହରର ବିଭିନ୍ନ ଅଞ୍ଚଳ ଉପରେ ନଜର ରଖିପାରୁଛନ୍ତି। ଏହାସତ୍ତ୍ୱେ ବିଭିନ୍ନ ସମୟରେ ଚୋରି, ଗୁଳି ମାଡ଼ ଭଳି ଅନେକ ଆପରାଧିକ ଘଟଣା ଘଟୁଛି। କିଛିଦିନ ତଳେ ମହାନଦୀ ବିହାର ଅଞ୍ଚଳର ଜଣେ ପ୍ରତିଷ୍ଠିତ ବ୍ୟବସାୟୀଙ୍କ ଘରୁ ଲୁଟ୍ ହୋଇଥିଲା। ସେହିପରି ୨ ଦିନ ତଳେ ସିଏମ୍ସିର ଜଣେ କର୍ମଚାରୀଙ୍କ ଘର ଉପରକୁ ଗୁଳିମାଡ଼ ହୋଇଥିଲା। ଅନେକ ସମୟରେ ଅପରାଧୀମାନେ ବ୍ୟବହାର କରୁଥିବା ଗାଡ଼ିର ରେଜିଷ୍ଟ୍ରେଶନ ନମ୍ବରରୁ ସେମାନଙ୍କୁ ଠାବ କରିବା ପୋଲିସ ପକ୍ଷେ ସହଜ ହେଉଛି। ଯଦି ବିନା ନମ୍ବର ଥିବା ଗାଡ଼ି ବ୍ୟବହାର କରିବେ ତା’ହେଲେ ସେମାନଙ୍କୁ ଧରିବା କଷ୍ଟକର ହୋଇପଡିବ। ଏପରିସ୍ଥଳେ ବିନା ନମ୍ବରରେ ବହୁସଂଖ୍ୟକ ଗାଡ଼ି ସହରରେ ଚାଲୁଛି। ହେଲେ ପୋଲିସ ତାହାକୁ ଜବତ କରିପାରୁନାହିଁ। ଉଦାହରଣ ଭାବେ ଏଠାରେ ୩ଟି ଗାଡିକୁ ଉପସ୍ଥାପନ କରାଯାଇଛି। ବକ୍ସିବଜାର ଅଞ୍ଚଳରେ ଏହି ଗାଡ଼ିଗୁଡିକରେ ଏକାଧିକ ଲୋକ ବସି ଅନାୟାସରେ ଯାଉଛନ୍ତି। ଗୋଟିଏ ସ୍କୁଟିରେ ଆଦୌ ନମ୍ବର ପ୍ଲେଟ୍ ନ ଥିବାବେଳେ ଅନ୍ୟଟିର ନମ୍ବର ପ୍ଲେଟ୍ ଅଧା ନଷ୍ଟ ହୋଇଯାଇଛି। ସେହିପରି ଗୋଟିଏ ବାଇକ୍ର ନମ୍ବର ପ୍ଲେଟ୍ ଥିବାବେଳେ କୌଣସି ରେଜିଷ୍ଟ୍ରେସନ ନମ୍ବର ସେଥିରେ ଲେଖା ନାହିଁ। ଅନ୍ୟ ଏକ ଦିଗଟି ହେଲା ଏହି ନମ୍ବରବିହୀନ ବାଇକରେ ବସିଥିବା ଯୁବକମାନେ ହେଲ୍ମେଟ୍ ପିନ୍ଧି ନାହାନ୍ତି। ବାଇକ ଚାଳକ ବା ଆରୋହୀ ହେଲ୍ମେଟ୍ ପିନ୍ଧି ନଥିଲେ ପୋଲିସ କର୍ମଚାରୀ ଉକ୍ତ ଗାଡ଼ିର ଫଟୋ ଉଠାଇ ଇ-ଚାଲାଣ କାଟିବାର ଅନ୍ଲାଇନ ବ୍ୟବସ୍ଥା ରହିଛି। ହେଲେ ନମ୍ବର ପ୍ଲେଟ୍ ନଥିବା ଗାଡ଼ିରୁ ଜରିମାନା କିଭଳି ଆଦାୟ କରାଯିବ ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏହା କେବଳ ନମୁନା ମାତ୍ର। ବାସ୍ତବ କ୍ଷେତ୍ରରେ ଏଭଳି ବିନା ନମ୍ବରରେ ବହୁସଂଖ୍ୟକ ଗାଡ଼ି ଚାଲୁଥିବାବେଳେ ସରକାରଙ୍କ ହାଇ ସିକ୍ୟୁରିଟି ନମ୍ବର ପ୍ଲେଟ୍ ବ୍ୟବସ୍ଥା ଏହା ଉପହାସ କରୁଥିବା ସାଧାରଣରେ ଚର୍ଚ୍ଚା ହେଉଛି। ତୁରନ୍ତ ପୋଲିସ ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ଦାବି ହେଉଛି। ଏ ସମ୍ପର୍କରେ ଅତିରିକ୍ତ ଡିସିପି ଅନିଲ କୁମାର ମିଶ୍ର କହିଛନ୍ତି, ପୋଲିସ ପକ୍ଷରୁ ବିଭିନ୍ନ ସମୟରେ ଯାଞ୍ଚ କରାଯାଇ ବିନା ନମ୍ବର ପ୍ଲେଟ୍ରେ ଚାଲୁଥିବା ଗାଡିକୁ ଜବତ କରାଯାଉଛି। ଏଥିସହ ଚାଳକଙ୍କ ଠାରୁ ଜରିମାନା ଆଦାୟ କରାଯାଉଛି। ତଥାପି ଲୋକେ ସଚେତନ ହେଉନାହାନ୍ତି।
