ନୂଆଦିଲ୍ଲୀ,୧୭ା୧୨: କରୋନା ଭାଇରସର ନୂଆ ଭାରିଆଣ୍ଟ ଓମିକ୍ରନ ଦ୍ରୁତ ଗତିରେ ବ୍ୟାପିବାରେ ଲାଗିଛି। ବର୍ତ୍ତମାନ ଭାରତରେ ୧୦୦ ଟପିଛି ଓମିକ୍ରନ ଆକ୍ରାନ୍ତଙ୍କ ସଂଖ୍ୟା। ଆଜି ଦେଶରେ ୧୦୧ ଆକ୍ରାନ୍ତ ଚିହ୍ନଟ ହୋଇଥିବା ନେଇ ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ଶୁକ୍ରବାର ସନ୍ଧ୍ୟାରେ ସୂଚନା ଦିଆଯାଇଛି। ଡବ୍ଲୁଏଚ୍ଓ ଚେତାବନୀ ଦେଇଛି ଯେ, ନୂତନ ଏବଂ ଅଧିକ ସଂକ୍ରାମକ ଷ୍ଟ୍ରେନ ମୋଟ୍ କରୋନାର ୨.୪ ପ୍ରତିଶତ ଅଟେ। ଭାରତରେ ଆଉ ୧୯ଟି ଜିଲାରେ ଏହି ମାମଲା ବୃଦ୍ଧି ହେବାର ଆଶଙ୍କା ରହିଥିବା ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ଆୟୋଜିତ ଏକ ବୈଠକରେ କୁହାଯାଇଛି।
ଏଥିରୁ ମୁକ୍ତି ପାଇବା ପାଇଁ କରୋନା କଟକଣା ମାନିବା ଉଚିତ୍ ବୋଲି ସ୍ବାସ୍ଥ୍ୟ ମନ୍ତ୍ରଣାଳୟ କହିଛି। ମାସ୍କ ପିନ୍ଧିବା, ସାମାଜିକ ଦୂରତା ବଜାୟ ରଖିବା, ଜନଗହଳି ସ୍ଥାନରେ ବୁଲାବୁଲି ନ କରିବା ଜରୁରୀ ଅଟେ। ଆଜି ଗୋଟିଏ ଦିନରେ ରାଜଧାନୀ ଦିଲ୍ଲୀରୁ ୧୦ ଆକ୍ରାନ୍ତ ଚିହ୍ନଟ ହେବା ପରେ ଆହୁରି ଚିନ୍ତା ବଢ଼ିଯାଇଛି।
