ନୂଆଦିଲ୍ଲୀ,୭।୭: କେନ୍ଦ୍ର କ୍ୟାବିନେଟ ସମ୍ପ୍ରସାରଣରେ ୭ ଜଣ ମହିଳା ସ୍ଥାନ ପାଇଛନ୍ତି। ସେମାନଙ୍କ ମଧ୍ୟରୁ ଅନୁପ୍ରିୟା ସିଂ ପଟେଲ ଉତ୍ତରପ୍ରଦେଶ ମିର୍ଜାପୁରରୁ ଦୁଇଥର ନିର୍ବାଚିତ ହୋଇଥିବା ବେଳେ ପୂର୍ବ ମୋଦି ସରକାରରେ ସ୍ବାସ୍ଥ୍ୟ ରାଷ୍ଟ୍ରମନ୍ତ୍ରୀ ଥିଲେ। ସେହିପରି ସୁଶ୍ରୀ ଶୋଭା କରଣ୍ଡଲାଜେ କର୍ନାଟକର କୁଡୁପି ଚିକ୍ମାଗାଲୁରୁରୁ ଦୁଇଥର ଏମ୍ପି ହୋଇଛନ୍ତି। କର୍ନାଟକ ସରକାରରେ ସେ କ୍ୟାବିନେଟ ମନ୍ତ୍ରୀ ଥିଲେ। ଦର୍ଶନା ବିକ୍ରମ ଜର୍ଡୋସ ଗୁଜରାଟ ସୁରଟରୁ ୩ ଥର ଲୋକ ସଭାକୁ ନିର୍ବାଚିତ ହୋଇଛନ୍ତି। ମୀନାକ୍ଷୀ ଲେଖି ନୂଆଦିଲ୍ଲୀରୁ ୨ ଥର ଲୋକ ସଭାକୁ ଯାଇଛନ୍ତି। ସେ ସୁପ୍ରିମକୋର୍ଟର ଆଇନଜୀବୀ ଏବଂ ସାମାଜିକ କର୍ମୀ। ଅନ୍ନପୂର୍ଣ୍ଣା ଦେବୀ ଝାଡ଼ଖଣ୍ଡର କୋଦର୍ମାରୁ ପ୍ରଥମ ଥର ଏମ୍ପି ହୋଇଛନ୍ତି। ତେବେ ସେ ଝାଡ଼ଖଣ୍ଡ ସରକାରରେ କ୍ୟାବିନେଟ ମନ୍ତ୍ରୀ ଥିଲେ। ପ୍ରତିମା ଭୌମିକ ତ୍ରିପୁରା ଓ୍ବେଷ୍ଟରୁ ପ୍ରଥମ ଥର ନିର୍ବାଚିତ ହୋଇଛନ୍ତି। ଭାରତୀ ପ୍ରବୀଣ ପାଓ୍ବାର ମହାରାଷ୍ଟ୍ରର ଡିଣ୍ଡୋରିରୁ ପ୍ରଥମ ଥର ଏମ୍ପି ହୋଇଛନ୍ତି। ରାଜନୀତିକୁ ଆସିବା ପୂର୍ବରୁ ସେ ଜଣେ ଡାକ୍ତର ଭାବେ କାର୍ଯ୍ୟ କରୁଥିଲେ।
