କେନ୍ଦ୍ରାପଡ଼ା ଅଫିସ,୫।୭: କରୋନା କେନ୍ଦ୍ରାପଡ଼ା ଜିଲାବାସୀଙ୍କ ଜୀବନ ଓ ଜୀବିକା ଉପରେ ପ୍ରଭାବ ପକାଇଛି। ପ୍ରାୟ ଦେଢ଼ବର୍ଷ ଧରି ପ୍ରବାସୀ ଜିଲାକୁ ଫେରି କର୍ମନିଯୁକ୍ତି ସମସ୍ୟାରେ ଥିବା ବେଳେ ସ୍ଥାନୀୟ ଅଞ୍ଚଳର ସାମୂହିକ ସମସ୍ୟାର ସମାଧାନ ପାଉନାହାନ୍ତି। ଏଥିସହ ବ୍ୟକ୍ତିଗତ ସମସ୍ୟାର ସମାଧାନ ହେଉ ନ ଥିବାରୁ ପାରିବାରିକ ଅଶାନ୍ତି ବଢ଼ୁଛି। ସମସ୍ୟାର ସମାଧାନ ପାଇଁ ପ୍ରଶାସନିକ ସ୍ତରରେ ଉଦ୍ୟମ ହେଉଥିଲା। ଜନଶୁଣାଣି ମାଧ୍ୟମରେ ସାମୂହିକ ସହ ବ୍ୟକ୍ତିଗତ ସମସ୍ୟାର ସମାଧାନ ହେଉଥିଲା। ତେବେ ୨୦୨୦ରେ ଲକ୍ ଡାଉନ ଆରମ୍ଭ ପରଠାରୁ ଏହା ବନ୍ଦ ରହିଛି। କରୋନା ପାଇଁ ପ୍ରଶାସନିକ ଅଧିକାରୀ କାର୍ଯ୍ୟାଳୟରେ ରହୁ ନ ଥିବାରୁ ଗୁହାରି କାହାକୁ କରିବେ ବୋଲି ଲୋକମାନେ ଏବେ ପ୍ରଶ୍ନ ଉଠାଇଛନ୍ତି। କୋର୍ଟରେ ୨୧ ହଜାରରୁ ଅଧିକ ମାମଲା ଗଡୁଥିବା କୁହାଯାଇଛି। ଏଥିପାଇଁ କର୍ମଚାରୀ ଅଭାବ ସମସ୍ୟାକୁ ଅଧିକ ଜଟିଳ କରୁଛି।
ରାଜନଗର ଥାନା ଅଞ୍ଚଳର ଜଣେ ଶିକ୍ଷୟିତ୍ରୀ କହିଛନ୍ତି, ଭିତରକନିକା ସଂଲଗ୍ନ ନିଜର କିଛି ସମ୍ପତ୍ତି ଅଛି। ଏହି ସମ୍ପତ୍ତିକୁ କେତେଜଣ ଚିଙ୍ଗୁଡି ବ୍ୟବସାୟୀ ଜବରଦଖଲ କରି ଘେରି କରିଛନ୍ତି। ଏ ନେଇ କିଛିଦିନ ପୂର୍ବେ ଥାନାରେ ଅଭିଯୋଗ ପରେ ଆଇଆଇସି ସେମାନଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ। ତେବେ ଥାନାରୁ ଫେରି ଅଭିଯୁକ୍ତମାନେ ଉଗ୍ର ହୋଇଛନ୍ତି। ସ୍ବାମୀଙ୍କୁ ମାଡ ମାରିବା ସହ ନିଜେ ଚଳାଉଥିବା ସ୍କୁଟିକୁ ଛଡାଇ ନେଇଛନ୍ତି। କରୋନା ସଂକ୍ରାନ୍ତୀୟ ଡାଟା ସଂଗ୍ରହ ପାଇଁ ଏବେ ସମସ୍ୟାରେ ଥିବା ବେଳେ ସ୍କୁଟି ଉଦ୍ଧାର ପାଇଁ ପୋଲିସ ଓ ଜିଲା ପ୍ରଶାସନର ଦ୍ୱାରସ୍ଥ ହେବାକୁ ଆସିଛନ୍ତି। ତେବେ କୌଣସି ପ୍ରଶାସନିକ ଅଧିକାରୀ କାର୍ଯ୍ୟାଳୟରେ ନ ଥିବାରୁ ଫେରି ଯାଉଛନ୍ତି। ବୁଦ୍ଧିଜୀବୀ ଆଶିଷ କୁମାର ଖଟୁଆ କହିଛନ୍ତି, କେନ୍ଦ୍ରାପଡ଼ା ଜିଲାରେ ପ୍ରତିବର୍ଷ ଜନଶୁଣାଣିରେ ଅନୂ୍ୟନ ୨ ହଜାର ସାମୂହିକ ସମସ୍ୟା ଓ ୫ ହଜାର ବ୍ୟକ୍ତିଗତ ସମସ୍ୟା ପ୍ରଶାସନିକ ଅଧିକାରୀଙ୍କ ନିକଟକୁ ଆସୁଥିଲା। ଏଥିମଧ୍ୟରୁ କେତେଗୋଟି ସାମୂହିକ ଓ ବ୍ୟକ୍ତିଗତ ସମସ୍ୟାର ସମାଧାନ ହେବା ନଜିର ରହିଛି। ଲୋକଙ୍କ ଦାବି ଫଳରେ ପ୍ରଶାସନିକ ଅଧିକାରୀ ଅଧିକ କର୍ମଚଞ୍ଚଳ ହେଉଥିଲେ। ଜନଶୁଣାଣି ବନ୍ଦ ଫଳରେ ସ୍ଥାନୀୟ ଅଞ୍ଚଳର ସମସ୍ୟା ବଢ଼ିଚାଲିଛି। ଆଇନଜୀବୀ ବିଭୂତି ଭୂଷଣ ସ୍ବାଇଁ କହିଛନ୍ତି, କରୋନା ସଂକ୍ରମଣ ପାଇଁ କୋର୍ଟରେ ମାମଲାଗୁଡିକ ଠିକ୍ ଭାବେ ପରିଚାଳନା ହୋଇପାରୁନାହିଁ। ଫଳରେ ଗ୍ରାମାଞ୍ଚଳରେ ଆଇନ ଶୃଙ୍ଖଳା ପରିସ୍ଥିତି ଅଧିକ ଗୁରୁତର ହୋଇଛି। କେନ୍ଦ୍ରାପଡ଼ା ଜିଲା କୋର୍ଟ ଅଧୀନରେ ଗତ ୨୦୨୦ ଡିସେମ୍ବର ଶେଷ ସୁଦ୍ଧା ମୋଟ ୨୦, ୮୪୨ ମାମଲା ରହିଥିଲା। ଏଥିମଧ୍ୟରେ ସିଭିଲ କେସ୍ ୭,୪୪୮ ଥିବା ବେଳେ ୧୩,୩୯୪ଟି କ୍ରିମିନାଲ କେସ୍ ଅଛି। ବିଚାର ବିଭାଗ ପରିଚାଳନା ପାଇଁ ସାମାଜିକ ଦୂରତ୍ୱ ବାଧକ ହୋଇଛି। କେତେକ ମାମଲାର ପରିଚାଳନା ଭିଡିଓ କନ୍ଫରେନ୍ସ ମାଧ୍ୟମରେ ହେଉଥିଲେ ମଧ୍ୟ ତାହା ମହକିଲଙ୍କ ପାଇଁ ପର୍ଯ୍ୟାପ୍ତ ହେଉନାହିଁ। ଏହାଦ୍ୱାରା କୃଷିକ୍ଷେତ୍ରଠାରୁ ଆରମ୍ଭ କରି ସାମାଜିକ ଚଳଣିରେ ବ୍ୟାଘାତ ସୃଷ୍ଟି ହୋଇଛି। ଜନଶୁଣାଣି ସମ୍ପର୍କରେ ଏଡିଏମ୍ ବସନ୍ତ କୁମାର ରାଉତ କହିଛନ୍ତି, କେନ୍ଦ୍ରାପଡ଼ା ଜିଲା ଅଦ୍ୟାବଧି କରୋନା ସଂକ୍ରମଣରୁ ମୁକ୍ତ ହୋଇନାହିଁ। ଜୀବନ ବଞ୍ଚାଇବାକୁ ଏବେ ଜିଲା ପ୍ରଶାସନ ପ୍ରାଥମିକତା ଦେଇଛି। ଏଥିସହ ସାମୂହିକ ଓ ବ୍ୟକ୍ତିଗତ ସମସ୍ୟା ସମ୍ପର୍କରେ ଜନଶୁଣାଣି ହେଉ ନ ଥିଲେ ମଧ୍ୟ କାର୍ଯ୍ୟାଳୟରେ ଏ ନେଇ ଆସୁଥିବା ଅଭିଯୋଗକୁ ଭିତ୍ତିକରି କାର୍ଯ୍ୟାନୁଷ୍ଠାନ ନିଆଯାଉଛି।
