ନର୍ଲା,୮।୫(ଡି.ଏନ୍.ଏ.): କଳାହାଣ୍ଡି ଜିଲା ନର୍ଲା ବ୍ଲକ ଅନ୍ତର୍ଗତ ରୁପ୍ରା ରୋଡ୍ ପଞ୍ଚାୟତର ବରଗା ଗ୍ରାମର ଭିକାରୀ ସାହୁ (୩୦) ବିଦ୍ୟୁତତାର ସଂସ୍ପର୍ଶରେ ଆସିବାରୁ ଶନିବାର ତାଙ୍କର ମୃତ୍ୟୁ ଘଟିଛି। ସେ ଅସୁରଗଡ଼ ଗ୍ରାମର ରୋହିତ ମହାନନ୍ଦଙ୍କ ଷ୍ଟାଣ୍ଡ ହାଉସ ଠାରେ କାମ କରୁଥିଲେ। ଏହି ସମୟରେ ଭୁଲ ବଶତଃ ବିଦ୍ୟୁତତାରଟି ତାଙ୍କ ଗୋଡ଼ରେ ଲାଗି ଯାଇଥିଲା। ଫଳରେ ସେ ବେହୋସ ହୋଇଯାଇଥିଲେ। ତାଙ୍କର ସହଯୋଗୀମାନେ ନର୍ଲା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନେଇଥିଲେ। ତେବେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଷ୍ଟାଣ୍ଡ ମାଲିକ ପ୍ରଥମେ ନର୍ଲା ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତିକରି ନର୍ଲା ପୋଲିସ କେସ ନଂ ୯/୨୧ରେ ଏକ ଅପମୃତ୍ୟୁ ମାମଲା ରୁଜୁ କରି ମୃତଦେହ ବ୍ୟବଚ୍ଛେଦ ନିମନ୍ତେ ରାମପୁର ପଠାଇଥିଲା। ରିପୋର୍ଟ ଆସିବା ପରେ ମୃତଦେହ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି।
