କୁଲିମାନଙ୍କୁ ଆପଣ ନିଶ୍ଚିତ ଦେଖିଥିବେ। ଯିଏ ଲୋକଙ୍କର ଅଖା, ବ୍ୟାଗ୍, ବାକ୍ସ, ଆଟାଚ ଆଦି ବହୁ ଓଜନିଆ ଜିନିଷ ମୁଣ୍ଡାଇ ବସ୍ କିମ୍ବା ଟ୍ରେନ୍ରେ ଚଢ଼ିଥାନ୍ତି। ମାତ୍ର ଏବେ ଏମିତି ଜଣେ କୁଲିଙ୍କ ଭିଡିଓ ଭାଇରାଲ ହେଉଛି, ଯିଏ ଏକ ବାଇକ୍ ମୁଣ୍ଡରେ ରଖି ବସ୍ ଛାତକୁ ଚଢୁଛନ୍ତି। ଏହା ଦେଖି ଲୋକେ ଆଶର୍ଯ୍ୟ ହୋଇଛନ୍ତି।
ଏହି ଯୁବକଙ୍କ ନାମ ଅର୍ଜୁନ। ଯିଏ ରାଞ୍ଚିର ଖଦଗଡ଼ ବସ୍ଷ୍ଟାଣ୍ଡରେ କୁଲି ଭାବରେ କାମ କରୁଥିଲେ। ସୋସିଆଲ ମିଡିଆରେ ଅର୍ଜୁନଙ୍କ ଏକ ଭିଡିଓ ଦିନକୁ ଦିନ ଭାଇରାଲ ହେବାରେ ଲାଗିଛି। ଯେଉଁଥିରେ ସେ ବାଇକ ମୁଣ୍ଡାଇ ବସ୍ ଛାତକୁ ଚଢୁଛନ୍ତି। ଯଦିଓ ଏହା ତାଙ୍କ ପାଇଁ ଏକ ନିତିଦିନିଆ କାମ ତଥାପି ଭିଡିଓ ଭାଇରାଲ ହେବା ପରେ ସେ ଚର୍ଚ୍ଚାକୁ ଆସିଛନ୍ତି।
ବାଇକ୍ ମୁଣ୍ଡରେ ରଖି ବସ୍ ଉପରକୁ ଚଢ଼ିବା ଏକ ସହଜ କାମ ନୁହେଁ। ଏହା ବହୁତ ଭାରୀ। କାରଣ ମୁଣ୍ଡର ସନ୍ତୁଳନ ରକ୍ଷା କରିବା ସମସ୍ତଙ୍କ ଦ୍ୱାରା ସମ୍ଭବ ହୋଇ ନ ଥାଏ। ଯାହାକି ଅର୍ଜୁନ କରି ଦେଖାଇଛନ୍ତି। ସେ ତାଙ୍କ ମୁଣ୍ଡରେ ଏକ ତଉଲିଆ ରଖିଛନ୍ତି ଏବଂ କିଛି ଲୋକଙ୍କ ସାହାଯ୍ୟରେ ବାଇକ ତାଙ୍କ ମୁଣ୍ଡରେ ଉଠାଉଛନ୍ତି। ତା’ପରେ କୌଣସି ସମର୍ଥନ ବିନା ପାହାଚ ଚଢ଼ି ବସ୍ ଛାତକୁ ଯାଉଛନ୍ତି। ଏହି ଦୃଶ୍ୟ ଯେଉଁମାନେ ଦେଖିଛନ୍ତି ସେମାନେ ଅର୍ଜୁନଙ୍କୁ ବାହୁବଳୀଠାରୁ କମ୍ କହିନାହାନ୍ତି।
ଅର୍ଜୁନ କହିଛନ୍ତି, କିଛି ଦିନ ପୂର୍ବରୁ ଜଣେ ବ୍ୟକ୍ତି ଏହି ଭିଡିଓର ଶୁଟିଂ କରିଥିଲେ। ସେହି ବାଇକଟି ଭିଡିଓ ତିଆରି କରିଥିବା ବ୍ୟକ୍ତିଙ୍କର ଥିଲା।ସେ ଏହି ଭିଡିଓକୁ ନିଜ ଇନ୍ଷ୍ଟାଗ୍ରାମରେ ରଖିଥିଲେ। ଯାହା ଭାଇରାଲ ହୋଇଥିଲା। ଅର୍ଜୁନ କହିଛନ୍ତି, ସେ ନିଜେ ଇନ୍ଷ୍ଟାଗ୍ରାମରେ ଏହି ଭିଡିଓ ଦେଖି ଆଶ୍ଚର୍ଯ୍ୟ ହୋଇଯାଇଥିଲେ।
୧୯ ବର୍ଷୀୟ ଅର୍ଜୁନ କହିଛନ୍ତି, ମାଟ୍ରିକ ପରୀକ୍ଷା ପରେ ସେ ଏହି କାର୍ଯ୍ୟରେ ଜଡ଼ିତ ହୋଇଥିଲେ। ଘରର ଆର୍ଥିକ ଅବସ୍ଥା ଭଲ ନୁହେଁ ଏବଂ ଅଧ୍ୟୟନ ଜାରି ରଖିବା ପାଇଁ ତାଙ୍କୁ ଏହା କରିବାକୁ ପଡ଼ିବ। ବସ୍ରେ ବାଇକ ନେବା ପାଇଁ ୨୦୦ ଟଙ୍କା ନେଇଥାନ୍ତି। ପାଠପଢ଼ା ପରେ ସେ ପୋଲିସରେ ଯୋଗଦେବାକୁ ଚାହୁଁଛନ୍ତି ବୋଲି କହିଛନ୍ତି। ଅର୍ଜୁନ ଚଳିତ ବର୍ଷ ମଧ୍ୟବର୍ତ୍ତୀ ପରୀକ୍ଷାରେ ଉତ୍ତୀର୍ଣ୍ଣ ହୋଇଛନ୍ତି। ବର୍ତ୍ତମାନ ସ୍ନାତକୋତ୍ତରରେ ଆଡ୍ମିଶନ କରିବେ। ସେ ପୋଲିସରେ ଯୋଗ ଦେବାକୁ ସମସ୍ତ ପ୍ରସ୍ତୁତି ଆରମ୍ଭ କରିଛନ୍ତି।
