ବରୀ,୪ା୪(ଡି.ଏନ.ଏ.): ରାଜ୍ୟ ସରକାର ପ୍ରତି ପରିବାରକୁ ବିଶୁଦ୍ଧ ପାନୀୟ ଜଳ ଯୋଗାଇ ଦେବା କ୍ଷେତ୍ରରେ ଗୁରୁତ୍ୱ ଦେଉଛନ୍ତି। ଏଥିଲାଗି ପ୍ରକଳ୍ପ ନିର୍ମାଣ ନିମନ୍ତେ ଅର୍ଥ ମଞ୍ଜୁର ହେଉଛି। ମାତ୍ର ଦାୟିତ୍ୱରେ ଥିବା ଠିକାଦାରଙ୍କ ମନମୁଖି କାର୍ଯ୍ୟ ଓ ବିଭାଗୀୟ କର୍ତ୍ତୃପକ୍ଷଙ୍କ ଅବହେଳା ଯୋଗୁ ବହୁ ନିର୍ମାଣାଧୀନ ପାନୀୟ ଜଳ ପ୍ରକଳ୍ପ ଅଧାପନ୍ତରିଆ ଭାବେ ପଡ଼ିରହିଛି। ଫଳରେ ଲୋକେ ପାଣି ପାଇଁ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି, ଯାହାର ଉଦାହରଣ ଦେଖିବାକୁ ମିଳିଛି ବରୀ ବ୍ଲକ୍ ଅଞ୍ଚଳରେ। ଏହି ବ୍ଲକ୍ ଅଧୀନ ୨୯ ପଞ୍ଚାୟତର ୧୧୧ଟି ରାଜସ୍ବ ଗ୍ରାମ ମଧ୍ୟରୁ ଅର୍ଦ୍ଧାଧିକ ଗ୍ରାମବାସୀ ଅଦ୍ୟାବଧି ଶୁଦ୍ଧ ପାନୀୟ ଜଳ ପାଇବାରୁ ବଞ୍ଚତ୍ତ ହୋଇଛନ୍ତି। ବିଶେଷକରି ବ୍ଲକ ଅଧୀନ ଗୋଳକୁଣ୍ଡ ପଞ୍ଚାୟତର ମେଣ୍ଢ, ଅଟିରା ପଞ୍ଚାୟତ, ଧାରପୁର, ମହାକାଳପଡ଼ା, ବାଲିବିଲ ଓ ଅମଠପୁର ଆଦି ପଞ୍ଚାୟତରେ ଚାଲିଥିବା ପ୍ରକଳ୍ପଗୁଡ଼ିକ ନିର୍ଦ୍ଦିଷ୍ଟ ସମୟସୀମା ମଧ୍ୟରେ ଶେଷ କରିବାକୁ ଦାୟିତ୍ୱରେ ଥିବା ଠିକାଦାର ଚୁକ୍ତିବଦ୍ଧ ହୋଇଥିଲେ ମଧ୍ୟ ଅଧାରୁ କାମ ବନ୍ଦ ରଖିଛନ୍ତି। ଏଥିଯୋଗୁ ଅଞ୍ଚଳରେ ଉତ୍କଟ ଜଳ ସମସ୍ୟା ଦେଖାଦେଇଛି।
ଏତଦ୍ବ୍ୟତୀତ ଗ୍ରୀଷ୍ମଋତୁ ଆରମ୍ଭରୁ ବ୍ରାହ୍ମଣୀ ନଦୀ ଶଯ୍ୟା ଶୁଷ୍କ ପଡ଼ିବା ଓ ଭୂତଳ ଜଳସ୍ତର କ୍ରମଶଃ କମୁଥିବାରୁ ଏହି ଅଞ୍ଚଳରେ ଥିବା କୂଅଗୁଡିକ ଶୁଖିବାକୁ ଲାଗିଲାଣି। ଅମଠପୁର ପଞ୍ଚାୟତର ୧ ନଂ. ଓ ୨ନଂ. ଓ୍ବାର୍ଡର ମହିଳାମାନେ ନିକଟସ୍ଥ ବିରୂପା ନଦୀରୁ ପାନୀୟ ଜଳ ସଂଗ୍ରହ କରିବା ସରକାରଙ୍କ ବସୁଧା ଯୋଜନାକୁ ଅଙ୍ଗୁଳି ନିର୍ଦ୍ଦେଶ କରୁଛି। ଏପରି କି ବିଭିନ୍ନ ସମୟରେ ସ୍ଥାନୀୟ ଲୋକେ ପାନୀୟଜଳ ନିମନ୍ତେ ଜିଲା ପ୍ରଶାସନଠାରୁ ଆରମ୍ଭ କରି ବ୍ଲକ୍ ପ୍ରଶାସନ ନିକଟରେ ଦାବି କରି ଆସୁଥିଲେ ମଧ୍ୟ ପ୍ରଶାସନିକ ଅଧିକାରୀଙ୍କ ପ୍ରତିଶ୍ରୁତି ପାଣିରଗାର ପାଲଟିଛି। ବିଶ୍ୱ ଜଳ ଦିବସରେ ମହାକାଳପଡ଼ା ପଞ୍ଚାୟତ ଅଧୀନ ମିତ୍ରସେନପୁର ଗ୍ରାମର ମହିଳା ଓ ଗ୍ରାମବାସୀ ହାତରେ ମାଠିଆ ଏବଂ ବାଲ୍ତି ଧରି ଆନ୍ଦୋଳନ କରିଥିବା ଦେଖିବାକୁ ମିଳିଥିଲା। ତେବେ ଗ୍ରୀଷ୍ମ ପ୍ରବାହ କ୍ରମଶଃ ବୃଦ୍ଧି ପାଉଥିବାରୁ ଲୋକଙ୍କ ଆବଶ୍ୟକତାକୁ ଆଖି ଆଗରେ ରଖି ଅଧାପନ୍ତରିଆ ପାନୀୟ ଜଳ ପ୍ରକଳ୍ପ ଗୁଡିକର କାର୍ଯ୍ୟ ଶୀଘ୍ର ଶେଷ କରିବା ଦିଗରେ ଜିଲାପାଳ ପଦକ୍ଷେପ ନେବାକୁ ସାମାଜିକ କର୍ମୀ ପର୍ଶୁରାମ ବିଶ୍ୱାଳ, ସତ୍ୟରଞ୍ଜନ କର, କୁଳମଣି ଶୁକ୍ଳ, ନିମାଇଁ ରାୟ ଓ ରମାକାନ୍ତ ମଣ୍ଡଳ ପ୍ରମୁଖ ଦାବି କରିଛନ୍ତି। ଏ ସମ୍ପର୍କରେ ଜଳ ଓ ପରିମଳ ବିଭାଗ ନିର୍ବାହୀ ଯନ୍ତ୍ରୀ ସୁଶାନ୍ତ କୁମାର ଘଡ଼ାଇଙ୍କୁ ପଚାରିବାରେ ସେ କହିଛନ୍ତି, ବରୀରେ ନିର୍ମାଣାଧୀନ ବହୁ ପ୍ରକଳ୍ପରୁ ଲୁଣାପାଣି ବାହାରୁଥିବାରୁ ତାହା ପାନୀୟ ଉପଯୋଗୀ ହୋଇପାରୁନାହିଁ। ଖୁବ୍ଶୀଘ୍ର ସେହି ଜଳକୁ ବିଶୋଧନ କରାଯାଇ ପାନୀୟ ଉପଯୋଗୀ କରିବା କ୍ଷେତ୍ରରେ ପଦକ୍ଷେପ ନିଆଯିବ। ତେବେ ଅନ୍ୟ ଯେଉଁ ସ୍ଥାନରେ ଜଳ ସମସ୍ୟା ରହିଛି ତା’ର ତୁରନ୍ତ ସମାଧାନ କରାଯିବ ବୋଲି ଘଡ଼ାଇ ପ୍ରକାଶ କରିଛନ୍ତି।
