ଭଞ୍ଜନଗର,୩।୪(ଡି.ଏନ୍.ଏ): ଗଞ୍ଜାମ ଜିଲା ବେଲଗୁଣ୍ଠା ଏନ୍ଏସିରେ ବିଭିନ୍ନ ସମୟରେ ବିଭିନ୍ନ କାମରେ ଅନିୟମିତତା ନେଇ ଅଭିଯୋଗ ହେଉଥିବା ବେଳେ ରବିବାର ଆଉ ଏକ ଗୁରୁତ୍ୱପୂର୍ଣ୍ଣ ଅଭିଯୋଗ ଆସିଛି । ଏନଏସି ପାଇଁ ୧୦ଟି କାମର ଟେଣ୍ଡର ଗତ ୨୧ ତାରିଖରେ ବାହାରିଛି । ଆସନ୍ତା ୫ ତାରିଖରେ ଟେଣ୍ଡର ପେପର ଖୋଲିବ। ଏହାପୂର୍ବରୁ କେତେକ ୱାର୍ଡ଼ରେ କାମ ଆରମ୍ଭ ହୋଇଛି, ଯାହାକି ବେନିୟମ। ପୂର୍ବତନ କାଉନସିଲର ଯତୀନ ପାତ୍ର ବେଲଗୁଣ୍ଠା ଏନ୍ଏସିର ଏହି କାମରେ ଟେଣ୍ଡର ଫିକ୍ସିଂ ହୋଇଥିବା ଗୁରୁତର ଅଭିଯୋଗ ଆଣିଛନ୍ତି । ଏନେଇ ସେ ରବିବାର ବିଭାଗୀୟ ଉଚ୍ଚ ପଦାଧିକାରଙ୍କ ପାଖକୁ ମୋବାଇଲ ଫୋନରେ କାମ ଚାଲିଥିବା କେତେକ ରାସ୍ତାର ଫଟୋ ପଠାଇ ଘଟଣା ସମ୍ପର୍କରେ ଅଭିଯୋଗ କରିଥିଲେ। ଏହାପରେ କାମ ବନ୍ଦ ହୋଇଥିବା ଆଲୋଚନା ହେଉଛି। ପ୍ରକାଶଯେ ବେଲଗୁଣ୍ଠା ଏନଏସି ଟେଣ୍ଡର ନୋଟିସ୍ ନଂ ୬୫୨ରେ ଗତ ୨୧ ତାରିଖରେ ୧୦ଟି କାମ ପାଇଁ ଇ-ଟେଣ୍ଡର ବାହାରିଥିଲା । ଆସନ୍ତା ୪ ତାରିଖ ୧୧ଟା ସୁଧା ଟେଣ୍ଡର ପେପର ପକାଇବା ଏବଂ ୫ ତାରିଖ ୧୧ଟାରେ ଟେଣ୍ଡର ପେପର ଖୋଲାଯିବାର ତାରିଖ ଧାର୍ଯ୍ୟ ଥିଲା। ଏହାପରେ ଠିକାଦାରଙ୍କ ସହ କାର୍ଯ୍ୟର ଚୁକ୍ତି ପରେ କାମ ଆରମ୍ଭ ହେବ । ସମସ୍ତ କାମ ୯୦ ଦିନ ମଧ୍ୟରେ ଶେଷ କରିବା ବ୍ୟବସ୍ଥା ଅଛି । ସି କ୍ଲାସ ଏବଂ ତାଠାରୁ ଅଧିକ ଲାଇସେନ୍ସ ଥିବା ଠିକାଦାର ଉକ୍ତ କାମ ପାଇଁ ଟେଣ୍ଡର ପେପର ପକାଇ ପାରିବେ । ୱାର୍ଡ଼ ନଂ ୬ର ୩ଟି କାମ, ୱାର୍ଡ଼ ନଂ ୧ର ଗୋଟିଏ କାମ, ୱାର୍ଡ଼ ନଂ ୯, ୧୧, ୧୨ର ଗୋଟିଏ ଲେଖଁାଏ କାମ ଏହିଭଳି ୧୦ଟି କାମର ଟେଣ୍ଡର ବାହାରିଛି । କିନ୍ତୁ ବଡ଼ଦାଣ୍ଡ, ଜିଟି ହାଇସ୍କୁଲ ରାସ୍ତା ଗାର୍ଡ଼ ୱାଲ୍ କାମ, ଭଗବତପାଟଣା ରାସ୍ତା ସମେତ ଅନେକ କାମ ଟେଣ୍ଡର ପେପର ଖୋଲିବା ପୂର୍ବରୁ କାମ ଆରମ୍ଭକୁ ନେଇ ବିବାଦ ଦେଖାଦେଇଛ, ଯାହାର ନିରପେକ୍ଷ ତଦନ୍ତ କରି ପାଇଁ ଯତିନ ବିଭାଗୀୟ ଉଚ୍ଚ ପଦାଧିକାରୀଙ୍କୁ ନିବେଦନ କରିଛନ୍ତି । ଅପରପକ୍ଷେ ଏନେଇ ଏନଏସି ନିର୍ବାହୀ ଅଧିକାରୀ ରାକେଶ କୁମାର ପାତ୍ର କହିଛନ୍ତି, ଟେଣ୍ଡର ପେପର ଖୋଲିବା ପୂର୍ବରୁ କୈଣସି କାମ ଆରମ୍ଭ ହୋଇଥିବା ଖବର ଆମ ନଜରରେ ନାହିଁ। ଯଦି କୈଣସି ବ୍ୟକ୍ତି ମନଇଛା କାମ କରୁଥିବେ ସେଥିପାଇଁ ସେ ନିଜେ ଦାୟୀ ରହିବେ। ଜିଟି ହାଇସ୍କୁଲ, ଭଗବତପାଟଣା ରାସ୍ତା କାମ ପୂର୍ବରୁ ହୋଇଥିଲା, ତାହା ଅଧାରେ ଅଛି । ଯେଉଁମାନେ ଅଭିଯୋଗ କରୁଛନ୍ତି ତାହା ସମ୍ପୂର୍ଣ୍ଣ ମିଥ୍ୟା ବୋଲି ଶ୍ରୀ ପାତ୍ର ଏଠାରେ ସୂଚନା ଦେଇଛନ୍ତି।
