ଢେଙ୍କାନାଳ ଅଫିସ୍/ସାତମାଇଲ,୧୯।୫, (ଡି.ଏନ୍.ଏ.): ଗ୍ରାମର କେତେଜଣ ମହିଳାଙ୍କ ପାଖରେ ଦେଖିବାକୁ ମିଳିଥିଲା ଅସ୍ବାଭାବିକ ଆଚରଣ। ଏହାପରେ ଗାଁ ଲୋକଙ୍କ ମଧ୍ୟରେ ସୃଷ୍ଟି ହୋଇଥିଲା ଗୁଣିଗାରେଡ଼ି ସନ୍ଦେହ। ଏଥିରେ ସମ୍ପୃକ୍ତ ଅଭିଯୋଗରେ ଜଣେ ମହିଳା ଏବଂ ତାଙ୍କ ପରିବାର ସଦସ୍ୟଙ୍କୁ ସର୍ବସମ୍ମୁଖରେ ଦିଆଯାଇଛି ଅକଥନୀୟ ନିର୍ଯାତନା। ଏମିତି କି ସେମାନଙ୍କୁ ଜୋରଦବରଦସ୍ତ ଘୋଡ଼ା ପରିସ୍ରା ପିଇବାକୁ ବାଧ୍ୟ କରାଯାଇଛି। ମାନବିକତାକୁ ଲଜ୍ଜିତ କରିବା ଭଳି ଘଟଣା ଘଟିଛି ଢେଙ୍କାନାଳ ଜିଲା ଓଡ଼ାପଡ଼ା ବ୍ଲକ ମୋଟଙ୍ଗା ଥାନା ଅନ୍ତର୍ଗତ ଗୋପାଳପୁର ଗ୍ରାମରେ। ଗତ ୧୫ ତାରିଖରେ ଏହି ଘଟଣା ଘଟିଥିବାବେଳେ ପୀଡ଼ିତା ୧୭ ତାରିଖରେ ଏ ସଂକ୍ରାନ୍ତରେ ଥାନାରେ ବିଧିବଦ୍ଧ ଭାବେ ଅଭିଯୋଗ କରିଛନ୍ତି। ନିର୍ଯାତନାରେ ସମ୍ପୃକ୍ତ ଥିବା ୨୮ଜଣଙ୍କ ନାମରେ ଏତଲା ଦିଆଯିବା ପରେ ପୋଲିସ ତଦନ୍ତ ଆରମ୍ଭ କରିଛି।
ଅଭିଯୋଗ ଅନୁଯାୟୀ, କିଛିଦିନ ହେଲା ଗୋପାଳପୁର ଗ୍ରାମର କେତେଜଣ ମହିଳା ଅସ୍ବାଭାବିକ ଆଚରଣ ପ୍ରଦର୍ଶନ କରୁଥିଲେ। ସେମାନଙ୍କୁ ଭୂତ ଲାଗୁଥିବା ଏବଂ ଗ୍ରାମର କୌଣସି ବ୍ୟକ୍ତି ଗୁଣିଗାରେଡ଼ି କରି ଏଭଳି କାଣ୍ଡ କରୁଥିବା ସନ୍ଦେହ ହୋଇଥିଲା। ଏହାର କାରଣ ଜାଣିବା ଲାଗି ଗ୍ରାମବାସୀଙ୍କ ନିଷ୍ପତ୍ତିକ୍ରମେ ୧୫ ତାରିଖ ସକାଳେ ମନ୍ଦିରରେ ପୂଜା ଅନୁଷ୍ଠିତ ହୋଇଥିଲା। କାଳିଶି ଲାଗିବା ପରେ ଏଭଳି ଘଟଣାରେ ସମ୍ପୃକ୍ତ ମହିଳାଙ୍କ ସମ୍ପୃକ୍ତି ଥିବା ସେ ଇଙ୍ଗିତ କରିଥିଲେ। ଉକ୍ତ ଦିନ ସନ୍ଧ୍ୟାରେ ମହିଳା, ତାଙ୍କ ସ୍ବାମୀ ଏବଂ ପୁଅଙ୍କୁ ଘରୁ ଘୋଷାରି ଆଣି ଗାଁ ଦାଣ୍ଡରେ ନିସ୍ତୁକ ମାଡ଼ ମରାଯାଇଥିଲା। ଅର୍ଦ୍ଧନଗ୍ନ କରି ନିର୍ଯାତନା ଦେବା ସହ ଘୋଡ଼ା ପରିସ୍ରା ପାଟିରେ ଭର୍ତ୍ତି କରାଯାଇଥିଲା। ଘଟଣା ସାର୍ବଜନୀନ କଲେ ନିଅଁାପାଣି ବାସନ୍ଦ ସାଙ୍ଗକୁ ହତ୍ୟା କରିବାକୁ ଧମକ ମଧ୍ୟ ଦିଆଯାଇଥିଲା। ଘଟଣା ପରେ ଭୟଭୀତ ପରିବାର ପାଟି ବନ୍ଦ କରିଥିବାବେଳେ ୧୭ ତାରିଖରେ ସାହସ ଜୁଟାଇ ଥାନାର ଦ୍ୱାରସ୍ଥ ହୋଇଥିଲେ। ଏ ନେଇ ନଂ. ୧୧୫/୨୨ରେ ଏକ ମାମଲା ରୁଜୁ କରାଯାଇଛି। ମହିଳାଙ୍କ ପରିବାରକୁ ନିର୍ଯାତନା ଦେଇଥିବା ୨୮ ଜଣ ଗ୍ରାମବାସୀଙ୍କ ନାମ ଏତଲାରେ ଦର୍ଶାଯାଇଛି। ଏ ସଂକ୍ରାନ୍ତରେ ଥାନାଧିକାରୀ ନିରଞ୍ଜନ ସେଠୀ କୁହନ୍ତି, ଏଏସ୍ଆଇ ବିଭୂତି ଭୂଷଣ ନାୟକଙ୍କୁ ଘଟଣାର ତଦନ୍ତ ଦାୟିତ୍ୱ ଦିଆଯାଇଛି। ମାମଲାର ଅନୁଧ୍ୟାନ କରାଯାଉଛି। କେହି ଗିରଫ ହୋଇ ନ ଥିବା ଥାନାଧିକାରୀ କହିଛନ୍ତି।
