ନବରଙ୍ଗପୁର, ୧୯।୫(ବି.ପ୍ର.): ପାଣି ଗରମ କଲା ବେଳେ ୱାଟର ହିଟରର ବିଦ୍ୟୁତ୍ ସଂସ୍ପର୍ଶରେ ଆସି ଗୁରୁବାର ଜଣେ ମହିଳାଙ୍କ ମୃତ୍ୟୁ ହୋଇଛି। ସେ ହେଲେ ନବରଙ୍ଗପୁର ସହର ସଙ୍ଖାରିସାହିର କିଶୋର କୁମାର ବେହେରାଙ୍କ ସ୍ତ୍ରୀ ପ୍ରତିମା ବେହେରା (୨୫)।
ସୂଚନାନୁଯାୟୀ, କୋରାପୁଟ ଜିଲା କୋଟପାଡ଼ ଅଞ୍ଚଳର ପ୍ରତିମା ପ୍ରାୟ ୩ ବର୍ଷ ତଳେ ନବରଙ୍ଗପୁର ସଙ୍ଖାରିସାହିର କିଶୋରଙ୍କୁ ବିବାହ କରିଥିଲେ। କିଶୋର ତୀର୍ଥ କରିବାପାଇଁ ବାହାର ରାଜ୍ୟକୁ ଯାଇଛନ୍ତି। ଘରେ ପ୍ରତିମା ତାଙ୍କ ଶାଶୁ, ନଣନ୍ଦ ଓ ୨ ବର୍ଷର ପୁଅ ସହ ଅଛନ୍ତି। ପ୍ରତିଦିନ ଭଳି ଗୁରୁବାର ପ୍ରତିମା ସକାଳୁ ଉଠି ଘର କାମ ସାରିଥିଲେ। ଗାଧୋଇବା ପାଇଁ ପାଣି ଗରମ କରିବାକୁ ଓ୍ବାଟର ହିଟର ଲଗେଇଥିଲେ। କିଛି ସମୟ ପରେ ଘର ଲୋକ ଦେଖିଲା ବେଳକୁ ୱାଟର ହିଟର ପାଖରେ ପ୍ରତିମା ଅଚେତ ହୋଇ ପଡ଼ିଥିଲେ। ଘର ଲୋକ ତୁରନ୍ତ ଡାକ୍ତରଖାନା ନେବା ପରେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
