ଦାରିଙ୍ଗବାଡି,୧୫।୧(ଡି.ଏନ୍.ଏ.): ଓଡିଶାର କଶ୍ମୀର ଦାରିଙ୍ଗବାଡିରେ ତାପମାତ୍ରା ବୃଦ୍ଧି ଯୋଗୁ ସପ୍ତାହେ ହେଲା ଶୀତ କମୁଛି। ଫଳରେ ଏଠାକୁ ଆସୁଥିବା ପର୍ଯ୍ୟଟକ ନିରାଶ ହେଉଛନ୍ତି। ଏହି ସମୟରେ ତାପମାତ୍ରା ୫ଡିଗ୍ରୀ ତଳକୁ ରହିବା କଥା, ହେଲେ ବୁଧବାର ସବିନିମ୍ନ ତାପମାତ୍ରା ୧୩ ଡିଗ୍ରୀ ରହିଥିଲା। ପ୍ରତିବର୍ଷ ଦାରିଙ୍ଗବାଡିରେ ଡିସେମ୍ବର ଏବଂ ଜାନୁୟାରୀରେ ପ୍ରବଳ ଶୀତ ସହ ତୁଷାରପାତ ହୁଏ। ଚଳିତଥର ଡିସେମ୍ବରରେ କିଛିଦିନ ତୁଷାରପାତ ହୋଇଥିଲେ ସୁଦ୍ଧା ଏହାପରେ ତାପମାତ୍ରା ବୃଦ୍ଧି ଘଟିଥିଲା। ନୂଆବର୍ଷ ପାଇଁ ଶହଶହ ପର୍ଯ୍ୟଟକ ଦାରିଙ୍ଗବାଡିରେ ପହଞ୍ଚତ୍ ନିରାଶ ହୋଇଥିଲେ।
ପର୍ଯ୍ୟଟନକେନ୍ଦ୍ର ମଧ୍ୟରେ ହିଲ୍ଭିୟୁପାର୍କ ସମେତ ଜଙ୍ଗଲ ଓ ପରିବେଶ ବିଭାଗର ନେଚରପାର୍କ, କଫିବଗିଚା, ମିଡିୟୁବାନ୍ଦା ୱାଟର୍ଫଲ, ସାଇଲେଣ୍ଟ ଭ୍ୟାଲି, ଡଡୁବାଡା ଲଭର୍ସ ପଏଣ୍ଟ ଆଦି ପର୍ଯ୍ୟଟନସ୍ଥଳୀ ପୂର୍ବଭଳି ଅସଜଡା ରହିଥିବା ସହ ପାର୍କରେ ଫୁଲବଗିଚାର ଅଭାବ ସାଙ୍ଗକୁ ହିଲ୍ଭିୟୁ ପାର୍କରେ ଦୀର୍ଘଦିନ ହେଲା ଫାଉଣ୍ଟେନ୍ ଭାଙ୍ଗି ଯାଇଥିଲେ ମଧ୍ୟ ସଜଡା ହେଉନାହିଁ। ଟୟଟ୍ରେନ୍ ମଧ୍ୟ ଲକ୍ଡ଼ାଉନ୍ ମଧ୍ୟରେ ଖରାପ ହୋଇଯାଇଛି। ପ୍ରଶାସନ ମରାମତି ପାଇଁ ପଦକ୍ଷେପ ନେଉ ନଥିବାରୁ ପର୍ଯ୍ୟଟକ ଅସନ୍ତୋଷ ବ୍ୟକ୍ତ କରୁଛନ୍ତି। ଏସବୁ ପର୍ଯ୍ୟଟନକେନ୍ଦ୍ର ନିକଟରେ କୁଢ଼କୁଢ଼ ଅଳିଆ ପଡିଛି। ଫଳରେ ପରିବେଶ ଦୂଷିତ ସହ ପର୍ଯ୍ୟଟକ ନାକ ଟେକୁଛନ୍ତି।
ପର୍ଯ୍ୟଟକଙ୍କ ଆଗମନକୁ ନଜରରେ ରଖି ରାଜ୍ୟ ସରକାର ଇକୋରିଟ୍ରିଟ୍ କରିଛନ୍ତି। ସେଠାକୁ ଆସୁଥିବା ପର୍ଯ୍ୟଟକ ମଧ୍ୟ ପର୍ଯ୍ୟଟନ କ୍ଷେତ୍ର ବୁଲି ଅସନ୍ତୁଷ୍ଟ ହେଉଛନ୍ତି। କଫି ବଗିଚା ସହ ହିଲ୍ଭିୟୁ ପାର୍କ, ନେଚର ପାର୍କ ଆଦିରେ ପର୍ଯ୍ୟଟକଙ୍କଠାରୁ ଟିକେଟ ବାବଦକୁ ୧୦ରୁ ୨୦ଟଙ୍କା ପର୍ଯ୍ୟନ୍ତ ଆଦାୟ କରାଯାଉଥିବା ବେଳେ ଗାଡି ପାର୍କି ଫି’ ମଧ୍ୟ ସଂଗ୍ରହ କରାଯାଉଛି। ହେଲେ ସେଠାରେ ପର୍ଯ୍ୟଟକଙ୍କ ପାଇଁ ମୌଳିକ ସୁବିଧା ନଥିବା ଭୁବନେଶ୍ୱର ଖଣ୍ଡଗିରି ଅଞ୍ଚଳର ପର୍ଯ୍ୟଟକ ହୃଦାନନ୍ଦ ଜେନା କହିଛନ୍ତି।
ସୂଚନାଯୋଗ୍ୟ, କରୋନା ମହାମାରୀ ପାଇଁ ୨୦୨୦ମାର୍ଚ୍ଚରୁ ଜିଲାର ସମସ୍ତ ପାର୍କ ବନ୍ଦ ହୋଇଥିଲା। ଡିସେମ୍ବର ୯ରୁ ପୁଣି ଖୋଲିଛି। ତେବେ ନେଚର୍ ପାର୍କକୁ ଡିସେମ୍ବର ୧୦ରୁ ୩୧ ପର୍ଯ୍ୟନ୍ତ ମୋଟ ୧୧,୧୧୩ ପର୍ଯ୍ୟଟକ ଆସିଥିବା ବିଭାଗ ସୂତ୍ରରୁ ସୂଚନା ମିଳିଛି। ସେମାନଙ୍କ ଠାରୁ ଫି’ ବାବଦକୁ ୨,୨୨,୨୬୦ ଟଙ୍କା ଆଦାୟ ହୋଇଛି। କଫି ବଗିଚାକୁ ସେହି ସମୟ ମଧ୍ୟରେ ୧୮,୧୫୦ ପର୍ଯ୍ୟଟକ ଆସିଥିବାବେଳେ ୧,୮୧,୫୦୦ଟଙ୍କା, ହିଲ୍ଭିୟୁ ପାର୍କକୁ ୧୫,୭୮୭ ଏବଂ ଶିଶୁ ପର୍ଯ୍ୟଟକ ୩୦୮ ବୁଲିଥିବା ବେଳେ ମୋଟ ୨,୩୭,୪୭୫ ଟଙ୍କା ଓ ଗାଡି ପାର୍କିଂ ବାବଦକୁ ୫୯,୯୩୦ଟଙ୍କା ସଂଗ୍ରହ କରାଯାଇଛି। ସେହିପରି ଟୟଟ୍ରେନ ଅଚଳ ଯୋଗୁ ମାତ୍ର ୬୭୦ ଟଙ୍କା ସଂଗ୍ରହ ହୋଇଛି।
ଏନେଇ ଦାରିଙ୍ଗବାଡି ବିଡିଓ ଅଭିମନ୍ୟୁ ବେହେରା କହିଛନ୍ତି, ପାର୍କରେ ରହିଥିବା ସମସ୍ୟା ସମାଧାନ ପାଇଁ ବାଲିଗୁଡା ଉପଜିଲାପାଳଙ୍କୁ ଜଣାଯାଇଛି। ଶୀଘ୍ର ଟେକ୍ନିସିଆନ ଆସିଲେ ଫାଉଣ୍ଟେନ ସହ ଟୟଟ୍ରେନ୍ ମରାମତି ହେବ। ସେହିପରି ନେଚରପାର୍କରେ ମଧ୍ୟ ଅର୍କିଟ୍ ହାଉସ ସମେତ ଠେକୁଆ, ଏମୁ ପକ୍ଷୀ ରଖାଯିବା ସହ କୁଟିଆ କନ୍ଧଙ୍କ ଚଳନୀ ଦେଖିବା ବ୍ୟବସ୍ଥା କରାଯାଇଥିବା ଘରର ମରାମତି କରାଯାଇଥିବା ବିଭାଗ ପକ୍ଷରୁ କୁହାଯାଇଛି।
(ଅରୁଣ କୁମାର ସାହୁ)
